Read Western Dani Ayup 30 Bible Online

Ayup 30 - Western Dani bible

Ayup 30

¹Togop eeppiige nagagirak kwe, Yogondak it nen aret nagi'ndok kanggwi, An aa'nduk ndarak neegak kwe, It peebi ndarak nen meek eerogo panugwi, Eeko agaarik o. It inogobamini nogo ti, Naanggumi ndomba inarum menggerak nggeewo nogo Inom inarum logowak nduk piyoorak kwe, Inanggok a'nuk inamiya lek agaarak paga An yeenggwa niriyak inomaawi lek me, Abu meek aret iyareegirak o.

³Inamendek lek age, mbi abu aganake, Eeke kenok, inomaalowak ko aago logonet, Oonikiya aakumi lek me karume nggween mbuk paga Iri'ngga anggup kero, kwaarit nugwi,

⁴Eyoongga ku'mbanak me kobeya anggen mbanogo nunggwi, Mbiligit owak kalenogo kani kumbunuk nogo yugwi,

⁵Inoreewi inenggela'me nen mugogo wumbiigwi, Aap kiraaka nogwe iinok, Kwa, yorogwe kwak yorogwe,

⁶Niyo nen nendaarogo pereegim nogome, nogo yit nugwi, Yugum ambe nggaganak me inom, mbuun me inom, ye mbambatinuk wonogwe,

⁷Iri'ngga ku'mbanak me nen nggeewo mba'ngge ku agan nege kwak agan nugwi, Eyo alome lom warak wonogwe,

⁸It aap ti wi-wa inendage lek mendek me, It inanggween paga nen mugogo wumbiyareegwaarak wonogwe, Eekwi iyareegirak o.

⁹Eekwi iyareegirak inapuri nogo nen Ndawi paga nanep pogo logonet, miyuk-meya eerogo panugwi, Noba agaarak pe'neenok, Ha! yinuk, an nagi'ndok kanggwi,

¹⁰Ogole o, yinuk, neya waga'lek tayorogon wonogwe, Netenggen paga inawoori lengge eerogo panggwi,

¹¹Neegin agale Ala nen nggoorogo punuk, Nomaawi lek eerogo panggerak neego nagaarik, Inoone ugun-ugun yo'nirit unggwogwe, Eeko logonet,

¹²Aap a'nggan wogonaka nen lok togon yo'nugwi, Niyok yiluk yuwak nduk keele pit nogwe, Noba kwi'nari unggwi woraawak nduk, nda'nggi pit laganggwi,

¹³Mbagangge neyo naru non mbanogo panugwi, Mage yoraga'lek puk wonogwe me, lek eerogo panuwak nduk eekwi, Eeko agaarik.

¹⁴Pak enegen woronak me, noba kwi'nari unggwogwe, Yigirik-noonom aagome, aap aago nowagam kilak yi wogwe, Eekwi iinok,

¹⁵Namineeri ne eerogo panege, O wiya nen iri'ngga wonok nage menggi kwak, Nayuk warak nege minggirak nogo wonok lek age, Ndugwi wonagaatik, lek age menggi kwak, Neebe obeelom me, nale'nggen mbake nogo lek age, Eeke agarik o.

¹⁶Togop aret me, Op agarik, mbakak neegak, Nomaawi lek ee'nabit unggwage, Liingge paga andi-pandi ee'nabit unggwage,

¹⁷Oonikiya paga nowak enoona nenet unggwage, Kugi andi nogo lek aga'lek wuru'nirit unggwage, Eeke agaarik o.

¹⁸Ala omaawi paga nen nagabolo nayum kwak pi'nake, Nayum nenggaanok nggerok ari menggi kwak, keele maarogo panege,

¹⁹Purok me tabunogo mambanege, Eekerak me, An liirubu pogom, wun pogom, agarak wonage o.

²⁰Wonage logonet, noone nggwok paga, Ala wae. Yokkigitak kwe, onggo yo'nega'lek wonage, Pe'neyaanok nduk, mi'nagatak kwe, kenegen nggut mban neege,

²¹Nabuwa nombaka'lek nggwiirit nooke, Andi yagan waruwak o, yinuk, keenggi omaawi lombok paga noorit unggwage,

²²O wiya nen wo'neren nawak nduk, mbo tek eerogo nappanege, O wiya oone pu wage logonet, nippanggak-wuppanggak ee'nabuwak nduk, eeppangge, Eeke me,

²³Kambunuk nogo menggam nappaniyak eeke, Ineenik logonuk kuwak eeri nogo menggam nappanege, Eeke nogo ti, neenu aret o.

²⁴Aap ambi aaninggin oba ndugu aago kagak Abunuk aambele eerogo pit unggwogwe, Andi nen, Yeenggwa niru o, yinuk, oone nggwok paga ari kagak, Yeenggwaaga'lek mbo pugwi, Eekulik o.

²⁵Aaninggin inoba agaatak kenok, inale ari, Ineenggi lek iinok, niniki wakkolage, Eekeelik mbakop?

²⁶An eeke minggirak aret kwe, Obeelom eeppanuwak lak, Ao, mbake neegak, maluk mban noba kwi'nage, Eya eeppanuwak lak, Ao, mbake neegak, o apit lombok noba ari wage, Eeke menggerak.

²⁷Niniki piyak-payak ee'nake nogo lek aga'lek kundugu tit wonage, Neebe nibik-nobak ee'nake nogo ko'lu-kii'me nibinogo na wagak mban eeke, Eeke agaarik o.

²⁸Niniki yumaak aago wonage me, Niniki mo pega'lek aret agaarik o. Aap kuwak aago inenggela'me mi'na'nuk, Yeenggwa ninip o, yinuk, noone nggwok yorage kwe, Yeenggwa nega'lek puk mban wonogwe me,

²⁹An mba'ngge awuluk aret age, Towe mumayo oreeluk aret age, Eekirak kagi o.

³⁰Nagabolo mili puru eerogo punuk, nggono-nggono wangge, Ninikime kani pit nage,

³¹Nanggitat nen le ndawi mban tiyangge, Nenggawiwak nen leenggu maako menggaarak mban ari, Eeko agaarik o.