Read Western Dani Ayup 32 Bible Online

Ayup 32 - Western Dani bible

Ayup 32

¹At Ayup nogo nen, “An aap abe niniki koonak aret o,” mban mbake me, aap kenagan nogo wone onggo ambinom yorulik puk aret ogogwaarak.

²Puk iigak kwe, aap anebunu Aram paga wiganak o Mbut mendek endage Mbaraken aput Eliku nogo perak, at Ayup nogo nen, “An aap obeelom neegak Ala maluk eeppanege ti, nonggop nduk eeke agarik o?” ari ti paga anini ombake,

³ndi, oreewi kenagan nogo nen, “Kat maluk eekendak o,” yinuk, yogo logonet kwe, “Alom yi eekendak o,” yinuk, liik togon yoga'lek iinok, it kunduk, anini inombake, eereegerak.

⁴Aap Eliku nogo nen it aap kenagan nogo inaa'nduk ndarak me, wone aa'nduk Ayup yoruwak nduk, torinake nagagerak kwe,

⁵it kenagan nogo nen Ayup wone abu yogwi aap o Mbut mendek Mbaraken aput Eliku nogo nen yelok iige nagagerik, anini mi'nage logonet, yorage, “Kit kinaa'nduk ndarak o. Ndi, an peebi ndarak me, An niniki mbake nogo yokkiroorak nenggali age, An nagabiti mbake, Eeke nagarik,

⁷Inaa'nduk ndarak nen wone yogwe, Ndarak iigak, tahun ambik eerak kenok Iniki warak wone mendek mamunirogwe, Eeruwak, mbakirak kwe,

⁸Nineenu ariyak alom nogo ti, Niniki nen koonogo yo'nirage, Omaawi Lombok Menggerak nen ninikime mambinangge, Eeke menggerak me,

⁹It tahun ambik eerak kenok mban, Yi op, ndi, yi maluk, eraambe yelok kogwe, Aap abu inanggok kenok mban iniki warak wonogwe, Eekulik o.

¹⁰Togop aret me, An togon mbakirak nogo yokkirage me, Noone ari yi, kinaruk konenggo logonip o.

¹¹Kit wone yogwe kiigak an tokkiige, Wone ndogop aret yoruwok o, yinuk, Wone abe koonogo punuk yogwi kiigak, an naruk konengge,

¹²Eeke logonet abu aret liippigirak kwe, Kit ambi nen, Maluk eekirak, mbaruwak nduk Ayup yogwi, At wone ari nogo liik togon yogwi, Eekwi kiyoolik o.

¹³Ndi, yogondak kit nen yogo logonet, Aap iniki warak lombok kwaakkogoorak me, Aap nen at ari nogo tebenogo puurak meek o. Ata, Ala nen mban tebenogo puwak o, Yinuk, yuurak mage o.

¹⁴Ndogop yorikit o, yinuk, Ayup nen koonogo punuk an yo'nega'lek me, At nen wone an yo'nege kenok perak, Kit wone koonogo yogotak nogo ndak-ndak An onggo yorigin lek o.

¹⁵Togop me, Ayup yi, wae. It iniki kobak aganake, wone onggo ambinom yogwe, Inoone ambiriluk ambi yokkugwi,

¹⁶Eeka'lek Inoone lek we taati mi'ndak wonogwe iigak, An torinake logorak op mbaken?

¹⁷An kunduk ambi yuurak ee'nake me, ari, An kunduk mbakirak nogo yokkege, Eerikit o.

¹⁸Wone ninikime abu yagabit aago wonage, Ninikime nen, Yu o, yinuk, yo'nege, Eeke agaarik o.

¹⁹Anggur amburu togolowak abit paarak lek kwak, Ndomba agabolo ngget mendek ogobakkigirik paga Toolak tubuk togon wungge kwak, Ninikime ke'mboguk ee'nake me,

²⁰Niniki tayok togon wunduwak nduk, an wone mondok ari, Nambe paga nen wone mondok onggo ari, Eerikit o.

²¹Eeke logonet, an aap ambi wogoppege neenok, At ogobakkigirogo paneegerak nogo nen nenggaawak lek eerogo panigin me, Aap ambi nimbirak agak eeke, aap ambi wogoppegak eeke, Eerigin lek o.