Read Western Dani Ayup 33 Bible Online

Ayup 33 - Western Dani bible

Ayup 33

¹Togop aret me, Ayup yi wae. Noone yokkege neegak karuk konengge, Yi wone ndi wone yokkege me liippege, Eeke logot o.

²Wone yikit nduk nambe paga lagi wage, Wone yikit nduk namili irip tombege,

³Niniki abe koonak paga nen wone wunake, Niniki abe paga nen an kage nogo kin aret yokkege, Eeke agarik o.

⁴Ala Aberiniki nen ogobakkigirogo panege, At Omaawi Lombok Menggerak nogo nen ambe aagi paga neenik eerogo panege, Eeke me,

⁵An noone yokkirigin nogo kin kage keenok onggo an yo'nege, Wagangge keenok, Ndogop yorikit o, yinuk, Koonogo punuk, an neenu eeppanege, Eeru o.

⁶Ala nen kat nimbirak ndak-ndak aret niige, Kat nimbirak ndak-ndak nggween nggabok paga ogobakkigirogo pinanege, Eereegerak me,

⁷An neenok, kaganak nuk-nuk kege, Aaninggin noba panigin kagi, yinuk, nombake, Eeriyak mage o.

⁸Koone yagandak nogo naruk konengge, Koone agan nage nogo muk liippege, Eekirak nogo yi o.

⁹Kat nen ari logonet, An wone ambi tagangga'lek obeelom aret wonage, An maluk eeka'lek abu kikak naka'lek wonage, Eekirak kwe,

¹⁰Ala nogo nen, Maluk eekendak o, ari, Kat nawim o, yinuk, yo'nege,

¹¹ Eyo eno pelenak me, niyok nonggonogo panege, Yiru-ndiru nage me, enegen wo'neren nage, Eeke agaarik o, Yinuk, ari keegirak o.

¹²Ti yagandak kwe, Wone ti abe lek maluk aret yagandak mbaki o. Ala ti, aakumi kwak lek at abok eenu kagak,

¹³Ala yogitak kwe, onggo yo'nega'lek agaarik o, Yinuk, nonggop nduk keebi mbake agandik?

¹⁴Aakumi nen kin kaga'lek kwe, Ala nen ne ambi wone yogop paga ari, Ne ambi wone ndogop paga ari, Eeke logonet,

¹⁵ Ne ambi abi paga yorage, Ne ambi paga oonikiya nogo yogo menggam nogo nggaruk togon yugwi me, Inabinggaanggo paga yorage, Eeke menggerak me,

¹⁶Aakumi inomaluk mbo puwak nduk eeppiige, It iniki wogoppakwi iyo tebenogo piige, Taambiigo menggam nogwe iyo, non mbanogo piige, Niyo mbambegak abu-abu nogo menggam nogwe iyo, yilunogo piige, Eeke logonet It aakumi ando inaruk konengga'lek iinok, konenuwak nduk, eerogo piige, Kurumbi yorage paga inagabolo ne agan nawak nduk, eeppiige, Eeke menggerak o.

¹⁹Ndi, it aakumi ando perak, Nogo yogo menggam andi yagan wakwi wonogwe me, Ala nen iniki koonogo piyaakit nduk, Inowa'na nenet unggwage kagak

²⁰Mbi noorak ineebi mbaruwak nduk eeppiige, Mbi ombat abe lombok kwe, Pekkoorak ineebi mbaruwak nduk eeppiige, Eeke menggerak paga

²¹Aa'nduk ineebe obeelom logomenggaarak kwe, Abu mbuuluk eeginabit unggwage logonet, Ineebenowak ko eerogo piige,

²²Iniki nggween taambiigo menggam ari nogwe, Kambunuk nogwe wogonaka nogo inowagam nogwe, Eeko menggaarak.

²³Togop eeko menggaarak kwe, Ala ayonggo malayikat nogo, Ineebe ambik seribu wonogwe inenggela'me aap ambi nen yeenggwaara wage logonet, Ndogop eeriyak ti op o, yinuk, yorage,

²⁴Inabuwa nen Ala yoge logonet, It kambunuk nogo menggam nogwe iyo, Inonggo pugu wonage o, yinuk, yoge Eeke kenok perak,

²⁵Inagabolo aap tawe inagabolo kwak ogwe, Aap tawe logonet mengga kwak ineebe togop aret ogwe, Eerugun o.

²⁶Togop aret ogo logomenggaarik, It nen tamban eeko logonet, Ala yogwi iinok, Ala nen inoone konembunuk, obeelom eeppiige, Ala wonage me ina ni'na'nuk inale'nggen paga Ala alut eekwi iinok, Ala nen, Aap yi obeelom aret o, yinuk, Aa'nduk wonogogwaarak kwak eerogo piige, Eerigin o.

²⁷Ti eeke kenok, It obeelom eerogo piyamenggerak nogo nen Aakumi inenggaanom paga yogo logonet, nit maluk aret eekwi, Obeelom eeriyak kagak maluk aret eerit nogwe, Eekoorak kagak kwe, At Ala nen nit maluk eekoorak nogo onggo ndak-ndak eeppinanega'lek teppinanege,

²⁸Kambunuk nogo menggam unggwogwe niyo, pi'ninake, Eeke menggerak paga Nineenik logonet, o eya ninigen kogo logogun o, yinuk, yugun o.

²⁹Ineenik logonet, o eya kogo logowak nen Kambunuk nogo menggam nogwe me, Iniyokan yungguninuk woraawak nduk, Wone ti apit aret Ala nen kulinik eeppiige logonet, Ne mbere paga eeppiige, ne kenagan paga eeppiige, Eeke menggerak o.

³¹Togop aret me, Ayup wae. An wone ari me, karuk konengge, An wone yokkege me, liippege, An ari neegak, koone lek puk wonage, Eeke logot o.

³²Kat nen ambi yo'niriyak mbake keenok, wone onggo yo'nege, Kaana'le mbanogo pagakit mbakirak me, wone ambi ari, Eeru o.

³³Ndi, lek kenok perak, An ari neegak karuk konengge, koone puk wonage, Eeke keegak, niniki warak nen wone mamunggege logokit o,” yinuk, yoreegerak.