Read Western Dani Ayup 36 Bible Online

Ayup 36 - Western Dani bible

Ayup 36

¹Yoge nagagerik, at Eliku nen kunik aret yoge logonet,

²“Ala nen yokkirukwak an wone ambi yokkege, Kiniki abet mbarenok nduk, ambi mamunggege, Eeriyak awo wonage me, We mbuuluk puk o.

³An wone irip-unggut abok wa nagak yokkege, At ogobakkigi'nabeegerak nogo nen abe koonak mban eeke kaanok nduk, aana'le mbangge, Eerigin me,

⁴At pilit arilik abet aret yo'nege nombake, Yi wone ndi wone abok eenu nen ari nombake, Eeke logot o.

⁵At Ala ti, omaawi ambik menggerak kwe, Aakumi ti meek aret iigi o, yinuk, mbakeelik o. Yi wone ndi wone eenggo'lek lek abok aret eenu menggerak o.

⁶It aap maluk eeka ineenik teppiigeelik o. It aaninggin inoba agaatak tebenak wonogwe nogo, eekaatak ndak-ndak li'lak inawone mbangge,

⁷It abe koonak eeka nogo enegen wogoren nage, It aap inendagembogut wone lengganogo yorogwe me, Inom yorogo logowak nduk, nabenogo piige, Inendage mondok tiyanak logowak nduk, eeppiige, Eeke menggerak kwe,

⁸It aap mbuti keele paga maarak kwak, Aaninggin-paaninggin inoba kwi'nagaatak tebenak wonogwe iinok perak,

⁹At Ala nen, Ti eekotak paga kinoba agaarak o, yinuk, kin paga yorage, Kiniki wogoppako logonet maluk eekotak o, yinuk, yorage, Eeke logomenggerik,

¹⁰Inaruk wake nogo liippuwak nduk, eeppiige, Inomaluk mbo puwak nduk, wone lengganogo yorage, Eeke mbaremenggi,

¹¹Yorage konembunuk, at mugurok nogwe iinok, It nda'nogogwaarak eyom ari wage kagak, Ineebe obeelom inale'nggen paga wonogwe, Yi tahun ndi tahun eeke kagak, Iniki ugun tayenak wonogwe, Eeko logogun kwe,

¹²Inaruk konengga'lek wonogwe iinok perak, Inookwi iinok, yi enebaga abu-abu ari nogwe, Yi wone ndi wone ineenggo'lek logonet kanggwi, Eerugun o.

¹³It aap Ala ineebi mbaka nogo nen inanini mban mbarit nugwi, Mbuti keele paga maarogo mambiigetak kwe, It nen, Yeenggwa niraanip o, yinuk, yoraga'lek aret wonogwe,

¹⁴Awo tawe kagak kanggwi, Kugi eeko logonet, aap mban-mban wut-wut yogwe inenggela'me kanggwi, Eeko logogun kwe,

¹⁵It aaninggin-paaninggin inoba age ti paga, Ala nen inagap ndake, Ndi, andi-pandi kogwe ti paga, At oone konenggo logowak nduk, eeppiige, Eeke menggerak o.

¹⁶Nggeewo pagi eyak nggerembunuk menggi kwak, Aaninggin nen koba nggero eerogo pagit unggwage me, Wondet aago logonok nduk, Ala nen, Mok o, mok o, yokkege, Mbi abe ndiinik-piinik aago wonage me kwippagage, Eeke kwe,

¹⁷Aap maluk eekwi iinok, onggo eeppiige menggerak nogo Kat koba mban luurik wonage, Eekendak a'me nggelok eeppagage, Komaluk onggo aaninggin koba kwippagage, Eeke nogo nen

¹⁸Kambokan laganuwok nduk, nduk-nduk eekkake logonet, wu wokkugwi, Kat tu noorak mbake nogo nomoninuk alik me nanok nduk, Onggo wu nggwok aret wokkugwi, Eekwi iyo, liippege logot o.

¹⁹Kawu nggwok wogoge, Komaawi paga eerit nage, Eeke ti paga aaninggin koba wonage nogo lek eeppagarak mbaken?

²⁰Oonikiya paga aakumi inobaane'me wonogwe me, Nggigininako menggaarak me, Oonikiya ari woraawak lak, Ao, mbake ti mage o.

²¹Maluk eere'nok nduk kabut mbangge me, Maluk eeriyak koongge ti mage mban.

²²At Ala omaawi lombok menggerak me, Endage mondok tiyanak aret mbake logot o. At mamunniraga kwak, aap ta wonage o?

²³Ala eerit nage logowak nduk, aru ta nen koonogo pege, Kat maluk eekendak o, yinuk, ta nen at yoge, Eeriyak mbaken?

²⁴Lek aret me, At eerit nage nogo aakumi nen ndawi anep pugwi, It aakumi abok aret inigen kogwe, O nda nen inigen nakkogwe, Eereegwaarak nogo Tiyappenok nduk, abeke logot o.

²⁶At Ala ti, mondok iya tiyanak lombok wonage me, At nonggoti liippubok age, At ndarak kagak tahun mande eekerak nineenu age, Eeriyak meek aret o.

²⁷At Ala nen nggween aagi wonok pi lagangge, Iyaagi lenggenogo pege, Eeke nagaatik,

²⁸Mbogut paga nen mayu wurabit wage logonet, It aakumi abok aret inoba miin nggulunogo piige menggerak o.

²⁹Ndugwi wiganogo pit nage, At menggim mbogut paga nen ngguurubu eeke, Eeke menggerak nogo ti, Ta nen liippuurak mbaken?

³⁰O kimbik at enaagan-ambokan pindanogo nappit nage kwe, Yi yenggenak laut inikime perak, apit eerogo pege, Eeke menggerak o.

³¹Ti eerit nage nogo ti, aakumi inowak looniyak nduk eeke, Inambi ngginu-ngginu eerogo wogoroorak nduk eeke, Eeke menggerak.

³²O kimbik at eenggi paga waganogo, Ti wari nak o, yinuk, Yamburogo nappege menggerak me,

³³O ngguurubu eerogo nappi wage paga aakumi nen, Mayu woraakit nduk eeke o, yinuk, yogwe, Ndi, tapi-ndomba kunduk, Mayu wage agaarik o, yinuk, inoone mu agan iname unggwogwe, Eeko menggaarak o.