Read Western Dani Ayup 38 Bible Online

Ayup 38 - Western Dani bible

Ayup 38

¹Yoge mbareegi, o wiya nombok-kombok warit wage enggela'me at Aliku ALA nen aap Ayup yoge logonet,

²“Aap wone eenggo'lek logonet, An eeriyak koongge nogo kagaarogo pit nage ti ta o?

³An nen keegwa'me wagangge, ndi, kat nen onggo an yo'nege, Eerugun me, Kat aap aret kenok, pipuk eeppunuk logot o.

⁴An o nggween yi, alom lombok kwippege neegak, kat ngga wonagagindak? Keenu kenok, mbininogo yo'niru o.

⁵O ambe ndi kuli o. Irip ndogop kuli o, yinuk, ta nen wakkagak koonogo pereegerak mbaken? Kat keenu kenok, yu o! Ta nen o yi, keele wakkagak eerogo pege,

⁶O eyak nano paga kwippege, Eereegerak mbaken? O weege kagak laaluguragan ndawi wakwi, It malayikat inale'nggen nen keekok yogwe, Eekwi iigak, O eyak iyaalok ta nen wuppereegerak mbaken?

⁸ Elege agalo inikime nen perak togon wungge kwak, Niyo laut kiluk togon wundeegerak nogo ugun-ugun nage kero, Ta nen tu narogo pit nage,

⁹Ndugwi paga ayum negen nobarogo pege, Elege ngget ndarak yum perenogo pugwi kwak Niyo laut o apit paga lenggenogo pege,

¹⁰Ari noorak kuli mbanogo pege, Arungga ogobakkigirogo mippege, Wa'mbit ogobakkigirogo nggelenogo pege,

¹¹Yi kuli woroorak op kwe, Yi kuli nen kat time noorak mage o, yoge, Eeke neyaawak o, yinuk, yi kuli mban kilaarak-mogonik eekkolage logomunggun o, yoge, Eeke neegak, Kat ngga wonagagindak?

¹²O irip-irip eya eerogo pit nage, Aap maluk eeka inobaak yobak togon agago nappiige, Nggabok nggween tabak eerak paga ayo wogo kin kogo mengga kwak, Oonegen maa'ngga kunik lagi wage logonet, puurom-alu'me kin eerogo pege, Kin eerogo pege kenok, it aap maluk eeka nen O apit paga eekwi nogo o eya eeke kenok, it eeriyak mbakwi nogo non mbanogo piige, Eeruwak nduk, O weeru o, yinuk, wone lengganogo yoge, Ndi, o weege kenok, keya ndime eerit nak o, yinuk, nappege, Eeke nagagindak ilik, lek a?

¹⁶Niyo laut inikime yi eneeri lagit wage me, kat pekka unggwage, Niyo laut abu'na nggween paga kiyok pit nage,

¹⁷Kambunuk nogo menggam tu titikkereegerak kenegen kage, Kambunuk o apit aago me ari nogo menggam tu maloppege,

¹⁸O nggween yi, ambe ngge kuli wonage nogo liippege, Eereegindak ilik lek a? Ti abok aret keenu kenok, mbininogo an yo'niru o.

¹⁹O eya menggim noorak tu nogo ngge o? Ndi, o apit menggim nggeeme wonage o?

²⁰O eya inom, o apit inom, it menggam piya nage, It iname noorak tu keenu age, Eeke menggendak ilik, lek a?

²¹Kat abu aret kanggok age, Ndarak keegak, yi tahun ndi tahun eeke, Eekendak me, Muk keenu aret mbaki o.

²²Ndugu-ndugu inom, mayu anggen inom, ambi eeppiyoorak age kenok, inoba wuppit wage, Wim mbanak paga inom, oome ili paga inom, nambukwi iinok, inoba wurabit wage, Eerikit nduk, Ndugu-ndugu pege minggim unggwage, Mayu anggen pege minggim kenegen kage, Eereegindak ilik, lek a?

²⁴O kimbik nggaganogo nappege minggim tu noorak kat keenu age, Ndi, oonegen lagi wage menggim nen o wiya nabuninuk wage alom liippege, Eeke menggendak ilik, lek a?

²⁵Nggween aakumi wonogolik me inom, aakumi lek me karume inom, miin eerogo pege, Aakumi lek nggween mbuk eerak me, iri'ngga ki laganuwak nen, nggween yawenogo pege, Eeruwak nduk, O mayu lubu-lubu wambuurak nogo ta nen aru mbininogo pege, O ngguurubu oone agan nawak nduk, ta nen aru koonogo pege, Eeke menggerak mbaken?

²⁸O mayu ogoba wonage ilik, lek a? Ndi, miin anggen ta nen ndake menggerak?

²⁹Ta inikime nen mayu anggen kilirogo wuppi wage, Ndi, aworak kani puwak nduk, mbogut paga ta nen ndarogo wuppi wage, Eeke menggerak?

³⁰Ti eeke paga niyo yugum kwak age, Yi yenggenak ogombaga mayu anggen kwak li eerogo pege, Eeke menggerak nogo o.

³¹ Laaluguragan Kartika tekkunggun aago wonage nogo kat nen yilunogo piige, Laaluguragan Belantik tekkunggun aago wonage nogo kat nen aret woronogo piige, Eeriyak op mbaken?

³²Kat nen laaluguragan yoge logonet, Ndi eyom paga kabinak aruwak o, yinuk, yoge, Laaluguragan Biduk inom ninggirik wonogwe nogo, inaru koonogo piige,

³³Mbogut inom nonggop logorak wone koonak nogo keenu age, Ndi, mbogut inom nonggop logorak wone koonak nogo Nggween paga eeko logowak nduk, koonogo piige, Eeriyak op mbaken?

³⁴O mayu miin nggulu eerogo pani mok o, yinuk, koone nggwok paga ndugwi eerogo nippege,

³⁵O kimbik kilanogo nappiyamenggendak nanuk, keya wogo logomenggaarik, Ndogop eeppunuk keya wogo, yinuk, yokkiri woraawak nduk, nappiige, Eeke menggendak ilik lek a?

³⁶Ta nen ndugwi iniki warak eerogo piige, Ta nen iyaagi ineenu aruwak nduk eeppiige, Eeke menggerak mbaken?

³⁷Ta nen iniki warak me, ndugwi eenggi linggingge, Niyo mbogut paga niyoowa'na toolak wonage nogo Ta nen kilirogo wuppi wage kenok,

³⁸liirubu wonggonogo pege, Nggween lengge eerogo pit nage, Eeke menggerak mbaken?

³⁹Singa iyagalo nengge logorak nogo Kat nen warogo wogori wage, Inaagalogwe kunduk, inawina pogonik wonogwe, Iri'ngga ku'mbanak me enaarak wonogwe, Eekwi iinok, Enggaanggum ndonggorogon nawak nduk ira wage, Eeke menggendak ya?

⁴¹Towe ya'ngge-ya'ngge oo'nu nogo, Mbi abu nen inoone nggwok paga an Ala yo'nugwi, Inambi nengga'lek me, nabuk-kabuk nogwe, Eekwi iinok, Ta nen it noorak mendek wogorage menggerak mbaken?