Read Western Dani Ayup 4 Bible Online

Ayup 4 - Western Dani bible

Ayup 4

¹Ari mbareegi, aap o Teman mendek Elipat nen Ayup yoge logonet,

²“It aakumi wone yuurak mbakwi iinok, Inambe keele maariyak meek me, yokkugwi iinok, Keebi mbarumunggun ilik, lek a?

³Kat nen aakumi ambik aret mamunirage, Ineenggi ndeyak wonogwe iinok, inomaawi eerogo piige,

⁴Yigeebu wanggwi iinok, koone paga nen iniki eyak wappiige, Inowak lek agaatak kenok, pigiren nage, Eeke menggendak kwe,

⁵O yogondak perak, Aaninggin koba kwi'nagaarak me, komanggen tayok ari, Andi-pandi eerogo pagagerak me, kiniki ma'nage, Eekkakerak wonage o.

⁶Kat nen Ala kagabiti mbake ti paga kiniki panggombunuk wonage, Aakumi inoone koba pega'lek ti paga kiniki lunik wonage, Eeke logorak lek mbaken?

⁷At Ala nen, Aap ambi maluk eeka'lek ugun wonage kagak lek eerogo pege, Ndi, iniki koonak kagak pup eerogo pege, Eekeelik nogo liippu o.

⁸Yabu waganggo mengga kwak, it aakumi maluk eerit nugwi, Ndi, awi yubunggo mengga kwak, aakumi maluk eeppiinet nugwi, Eeko menggaarak nogo ti, Anggen ti mendek mban aret mbanggo'net nugwi iige minggirak o.

⁹It aakumi ti, Ala ambebubu paga lek eerogo piige, Anini nen enete aagi paga mondok inenggaawak lek eerogo piige, Eeke menggerak.

¹⁰Singa awooluk inanini warak inoone ku agan nugwi, Inanini nen ineyak nde agan nugwi, Eeko menggaarak kwe, Ineyak kalok ari kenok,

¹¹It nunggwi mendek warogo nunggwi lek me kanggwi, Ndi, inaagalogwe yumbunik-telenak ma'nogwe, Eeko menggaarak o.

¹² Oonikiya paga it aakumi nogo nggaruk togon yugwi, Inabinggaanggo kagak mban eekwi, Eekwi iigak, Wone ambiriluk ambi kumaak-kumaak an yo'niri wage, Yagap wone paga yo'nege nogo naruk konengge, Eeke nagarik,

¹⁴An nagabiti ee'nake, naganak nuk-nuk nege, Nowak abok aret ne agan nage, Ee'nake kagak,

¹⁵O wiya kugi negen nenggaawak paga mbaanneegak nage, Namoori pilak agan lagangge, Eekerak o.

¹⁶O wiya kugi negen nogo naga'lek puk agaarak kwe, At etenggen an liippega'lek neegak, Nengga lolo nowagam wage nagaarik, Oone yagap wone paga ari konenggirak ti yogop.

¹⁷At Ala nen, Aap nggween paga mendek ambi iniki abu koonak wonage kage, At yi mendek ndi mendek ogobakkigika nen Aap ambi maluk oba lenggenak lek abu obeelom aret wonage kage, Eeke menggerak mbaken? Lek aret o!

¹⁸At Ala nen ayeloman mini inoba panggombiiga'lek logonet eeke, At ayonggo malayikat maluk eekwi iinok, maluk eekotak o, yinuk, yorage, Eeke menggerak me,

¹⁹It inawi nggabok nggween paga wurik me wonogwe, Inawi liirubu paga o eyak kwippunuk wonogwe, Tigit-tigit mbaaniigwi iigak kanggo mengga kwak, Mbet-mbet kanggwi, Eekwi nogo ti, Abunuk eeppiige logogin lek mbake agandik?

²⁰O kubondendok ineenik wonagaatik, O kiyoma ari nage kagak, ineebe yigirik-noonom eerogo lek ogwe, Ineebe liippiiga'lek iigak mondok-mondok aret lek ogwe, Eeko menggaarak o.

²¹It aakumi nogo yi wone ndi wone liippega'lek iigak, Inawooliya eyak ndenggak ari kenok kanggo menggaarak nogo lek a? Yinuk, ari konenggirak o.