Read Western Dani Ayup 41 Bible Online

Ayup 41 - Western Dani bible

Ayup 41

¹ Waalo yele-kole niyo inikime menggaarak Lewiyatan nogo Yikwe waka keele paga warogo nikkenok wundi wage, Inambe keele maarogo piinok, wumbiya wage,

²Inogobak pelenogo muun keele paga yilunogo piige, Yikwe waka eyak kole nogo paga inondogowak me pelenogo piige, Eeke keegak,

³It inoone yanggik-yanggok yokkugwi, Ninabuwa nen teppinanu o, yinuk, yokkugwi,

⁴Teppinanege keenok, kayeloman mondok logowok o, Yinuk, kinom wone koonogo pugwi, Eerugun mbaken?

⁵Towe inom yine kunggo mengga kwak, Waalo ti, kinom yine kungge, Kapuri komologwe wonok nugu logowak nduk, inake keele nikkenok inowagam piya wage, Eeriyak op mbaken?

⁶It yikwe wagangga inoona kunggolaawak nduk, It kungga nen onggo tebeppuurak wakkogwe, Kumbunuk, ineebe mbanogo kunggo'net nugwi, Eeriyak op mbaken?

⁷Mbuti tege eyo paga kumbunuk inagabolo nenggenogo inooke, Yikwe waka woolu tege ambik paga inanobak me kunogo piige, Eeriyak op mbaken?

⁸Yogoorak ti abok eeriyak meek aret me, It ineebe piginaburak eeke keenok, It yambunik-pambunik yemenggaarak kiniki aberak logogin me, Peebi piginaburak eekkabigin mondok lek aret o.

⁹Aakumi inigen kenok mban inomanggen tayok yogo menggaarak me, Waanggo eerinaburak nduk kiimbut-kiimbut eerinaburak meek aret kaamunggun o.

¹⁰Inanini wu yogwe nogo yugwi me, ineenik eeppiigwi, Ndi, ineenik ogwe iinok, inowagam nogwe, Inookwi iinok, nibininakwi me inagap ndakkologwe, Eeriyak op mbaken? Lek mban aret me, Mbogut abu'me yi mendek ndi mendek wonogwe nogo, abok aret an mban unde minggirak o.

¹²Waalo yele-kole niyo inikime menggaarak nogo, Ineenggi-iniyok inom, inomaawi inom, ineebe abu abe amuni mbanak inom, mbininogo yokkiri o.

¹³Waalo yele-kole ti, aap ta nen inagabolo endekem mendek mondonogo nappiige, Inagabolo ku'mbin me polok togon mambiige,

¹⁴Inondogowak yendok-wandok ineyak mban mbililin eerak me. Aakumi inagabolo ne agan nage waalo nogo inambe paganogo piige, Eeriyak mbaken?

¹⁵It inamborowak paga inarin yarak kwak angge'ngget ndo aago wonogwe, Ta'mban-mban penggaarak wonogwe, Eeko menggaarak.

¹⁶Inagabolo angge'ngget mban penggaarak wonogwe me, Togwi inikime ungguurak meek aret age,

¹⁷Inagabolo angge'ngget eerak ti, Ambi paga yiluk, ambi paga yiluk, eerak me, Yelek togon wambuurak meek aret age, Eeke menggerak.

¹⁸Yatuk wakwi iinok, eya pindanogo nappege, O weege logonet, maa'ngga kunik menggi kwak, It inigen kani kunik negen kere ari,

¹⁹Inambe me nen kani omoonuk negen wundi wage, Kani komo kere'li-kere'lo agan nage,

²⁰Yugum ka'luk kwit agan lagangge menggi kwak Inogobak me ka'luk togop aret wungge,

²¹Inambebubu paga nen kani wunuk ari, Inambe me nen kani omoonuk wunuk agan wungge, Eeke menggerak.

²²It waalo yele-kole nogo ti, inali'luk inomaawi ambik wonogwe, Inom aabuk a'nuk, puruk yogwe, Eeko menggaarak.

²³Inandeemok nikkenok nugwi kwe, omaawi ambik wonage, Andeemok yuwak-talek yaga'lek omaawi nu'lek wonage,

²⁴Inamiguwak yugum kwak omaawi wonage, Yugum anggen yigika abena pugu omaawi menggi kwak, Inamiguwak togop aret wonage, Eeke menggerak o.

²⁵It pilak togon mi'nogwe iinok, Aap wakaa'ngget kwe, inomanggen ngginuk yogwe, Yambunik-pambunik eekwi iinok, Inagabiti nen inakom niruk mbaganggwi, Eeko menggaarak.

²⁶Wooluwak paga inookaatak kwe, puk togon wangge, Ndut paga, wim paga, woolu tege paga, inookaatak kwe, Polok togon unggwaga'lek pubu nage, Eeke menggerak.

²⁷Mbuti owak ti, wiiri owak mbuk kwak mbakwi, Mbuti tembaga ti, eyo pili kwak mbakwi, Eeko menggaarak.

²⁸Maale inookaatak kwe, puruk yaga'lek inogogumbuk wonogwe, Yugum anggen keele paga nggelembunuk inookaatak kwe, Wiiri anggen paga ninookwi negen age mbakwi,

²⁹Mbut mbanak ti, wuuri owak paga ninookwi kwak mbakwi, Woolu tege oone lo eekwi iinok, agi'ndok kanggwi, Eeko menggaarak.

³⁰Inuumbi abu'na pugagi telenak ngget tiyanak-wiyanak eerak kwak wonage me, Gandum anggen yigiruwak nduk, Eyo karo-karo punuk nikkenok nogwe iigak, a'lip warak eeke kwak, Purok me nogo logonet, ina'lip warak eerogo pugwi,

³¹Niyo larak kila-kila eeke menggi kwak, yi laut inikime kilaarak-mogonik eerogo nippugwi, Wam amburu lakwi iigak, tubu-tubu eeke menggi kwak, yi laut togop aret eerogo nippugwi, Eeppunuk nogo logonet,

³²Iniyok pegaanom eyak-nggweyak eerit nogwe paga, Yilaa'nggun iyagalo ineeruwak kenen lu aago wonogwe o, Yinuk, mbako menggaarak o.

³³O nggween paga yime waalo yele-kole inagabiti mbakulik ogobakkigirik ti mendek ambi wonogwe abu lek aret o.

³⁴It alik wogoppakwi abok aret inirimbaga nen inigen wuriya wagak nugwi, It iniki tiyappakwi nogo abok aret inoweewi inendagembogut it aret wonogwe, Eeko menggaarak o,” yinuk, yoreegerak.