Read Western Dani Ayup 6 Bible Online

Ayup 6 - Western Dani bible

Ayup 6

¹Yoge mbareegi, Ayup nen wone onggo at Elipat yoge logonet,

²“Niniki wakko'net unggwage nogo, aaninggin paga wakkage, Andi-pandi eerogo panege nogo, tugunogo aaninggin paga wakkage, Eeriyak op logonetak nen,

³Mbini niyo aa'nggi paga wonage nogo Aaninggin mbuuluk kanetak o. At Omaawi Lombok Menggerak omaale nogo Neebe paga ngguurik-ndaganak aago wonage, Maale irip paga mbeeli perenak nogo Nggonok togon ninikime unggwage, Aap ineegin warak mbiginogo wumbiige menggi kwak Ala eeke paga inagabiti mbakwi nogo mendek Noba ari wagak mban eeke, Eekerak ti paga Noone perak togon yagarak me, Yi maluk ari, nombarugun o.

⁵Keledai nggwiya iri'ngga anggup nengge logonet oone nggwok ari, Tapi mbi nengge logonet oone mu ari, Eeke menggerak mbaken?

⁶Mbi mayu eerak lek me ombat lek kagak nunggwi, Towe ako ali-ale ombat lek kagak nunggwi, Eeko menggaarak mbaken?

⁷Ti mendek nengge neenok, Peyak wurigin ee'nake menggerak me, An waganogo noorak neebi mbake minggirak o.

⁸Ala nen an neebe aan lebenogo panege, An kambikit nduk, teppanege, Niniki lunik wonage ti eeppanege, Eeruwak, Mba'nuk, nggino yoge nogo, Konenuwak lak, Ao, mbake agarik o.

¹⁰Ti eeppanege kenok, andi kunik tit neegak, At kikak naka'lek abu obeelom menggerak wone yo'nege nogo, Neebi, mba'nuk mbo pega'lek logonet kanggi o, Yinuk, kangge logominggirik, niniki kwi'nage, Nale'nggen nen mbo laganggak ari, Ee'netak o.

¹¹An nomaawi ngge paga ko wappunuk wonage, Ndi, irip paga nano eeppaniyak nduk niniki lunik wonage, Eeriyak mbaken?

¹²An nomaawi ti, yugum pogom wonage, Nagabolo ti, mbuti tembaga pogom wonage, Mba'nuk, ari agandik?

¹³An nagap ndakkolaakit nduk, nomaawi wonage, Yeenggwa niriyak yoroorak ambi panggonak wonage, Eeriyak mbaken? Lek aret o!

¹⁴Aap ambi ore iniki ma'nagaarak nogo abuwa mbaka'lek mbo pege kenok, At Omaawi Lombok Menggerak nogo aret Ayuk wuka'lek mbo pege menggerak o.

¹⁵Mayu wage kenok niyo wuke, O kibi age kenok niyo mbuuluk age, Eeke menggi kwak Kit noreewi togop aret wonogwe me, Kit nen ambi eeppaniyak kinombaka'lek aret agarik o.

¹⁶Niyo yugum negen kunogo pege, Ndugu-ndugu lenggenogo pi wambi wage, Eeketak me, Niyo aga'lek li eerogo pegetak nogo, Mo andi nen niyo eerogo pege nagaatik, Wu'nuk nage menggerak kwe,

¹⁷O kibi age kenok niyo mbuuluk arit unggwage, Mo andi nen yi nage menggim poro agan unggwage, Eeketak me,

¹⁸It aakumi unta paga yi mendek ndi mendek wonok nega nogo Tu nogo menggam nen nomoninuk niyo porok yege'nom karume time nagaatak me, kambit nogwe,

¹⁹Aap unta paga o Tema nen woraanuk, niyo kwaarit nugwi, Yi mendek ndi mendek kungga o Tiyeba nen wogwe nogo Yi noorak iniki lunik logonet kwaarit nugwi, Eekaatak kwe,

²⁰Niyo wonage mbakak panggonak wagaarak nogo, Lek kenok inenggali ogwe, nggiinggo aago puk ogwe, Eeko mengga kwak

²¹Kit togop aret ogotik o. Ogole warak mendek kogwe kenok kinagabiti mbakwi kiigi o.

²²An nen ari logonet, Ndi mendek ambi an wo'ninip o, yinuk, yokkirage, Nawone abe koonogo paniyak onggo wogoriyak me, Kinawu wo'ninip o, yinuk, yokkirage,

²³Nawim ineenggime nen kurumbi eerogo wumbanumunggup nduk yokkirage, It nabuwa mbaka'lek maluk eeppanugwi nogo, Teppanuwak nduk, Kinamendek wogoraanip o, yinuk, yokkirage, Eereegirak ilik, lek a?

²⁴Ndogop eeru o, yinuk mamunnugwi, Maluk ndogop eekendak o, yinuk, titik nugwi, Eekwi kiinok, An noone lek puk arigin o.

²⁵Aakumi inoone abet aret yorogwe iinok, Abet aret yo'nogop o, yinuk, Andi kagak waganggo menggaarak kwe, Kat ndogop eekendak o, yo'nugwi lek me, We aanom warogo yo'nogo ogotik.

²⁶An ari nogo, kit nen koonogo paniyak nduk yogo ogotik? Iniki aaninggin ndugu agan unggwage nen ari kenok, O wiya pogom ari agaarik, mbako ogotik?

²⁷Elege moono kolaawok nduk, iri'ngga mbanogo wakkogwe, Ndi, kinore aret kagak, yi mendek ndi mendek kunggo mengga kwak eerogo pugwi, Eeriyak op mbakwi kiigi o.

²⁸Togop aret kwe, O yogondak an pe'neyaanip o. Kinigen pe'neegwi kiigak, an pilit pugunogo yokkiroorak mbakop? Lek aret me

²⁹Maluk eerulik kagak, Maluk eekendak o, yo'nugwi ti, Lik togon yo'nugwi lek me, ambinom liippinip o. Liippugwi kiinok, abet aret an maluk eerulik neyaamunggup o.

³⁰At pilit pugunogo yo'nirage, nombakwi, Ndi, At ngge eekerak o? yinuk, iniki koonit naga'lek, nombakwi, Eekwi kiigi o.