Read Western Dani Ayup 7 Bible Online

Ayup 7 - Western Dani bible

Ayup 7

¹Aakumi o nggween paga wonogwe nogo ti, Aap wim eerit nogwe, Aap wu kolaawak nduk, Ko'lu-kii'me yabu nggwiirit-nggwaarit eekwi iigak, kambit nogwe, Eeko mengga kwak Aret wonogwe nogo lek a?

²It nogo ti, Aap ambi ayeloman mini nen, O nggun lamunninabi woraawak lak, Ao, mbakwi, Aap yabu eekaatak onggo kolaga nen, Onggo koloorak, iniki lunik wonogwe, Eeko mengga kwak Aret wonogwe nogo lek a?

³Togop aret me, An nen yi tut ndi tut penengge kagak, aanom warogo wonage, Ko'lu-kii'me oonikiya paga andi yagan wake, Eeke logorak punik wonage kagi o.

⁴An nogo yi nage nagatik, O mbet-mbet weeruwak lak, Ao, mbake neegak, O apit mban wonage, lagak-mbagak mban ari, Eeke neegak, O weege menggerak.

⁵Neebe paga nawin agap yinik-kunik eerak wonage, Anggolenggen ninggirik wonage, Nagabolo ya'lek nggogok eeke me, Nanggore'ne tubu-tubu wundit nage, Eeke agarik o.

⁶Yum yogo logonet, Keneben yimbegak-mambegak eekugak, Yum enegen nggerok yagak eeke menggi kwak, An ko'lu-kii'me neenik neegak, Togop aret age menggerak me, Niniki ambi lunik lek logonet, kambi nage agarik o.

⁷Nogoba Ala wae. An neenik wonage yi, We inambe aagi ne ambit wungge kwak aret wonage abeke logot o. Niniki ale'nggen ambinom kaagin lek aret kagi o.

⁸Kat o yogondak kenegen neege kwe, Kenegen ambinom neyaamunggun lek o. Kwaa'nabit namenggendak kwe, neebe lek me, Neyaamunggun lek o.

⁹Ndugwi wonagaatik, lek arit nage menggi kwak Aap ambi aakumi kambunuk nogo menggam wambi nanuk iyokan lagi wage,

¹⁰Ame aret nage, eeke kenok, It at awi wonagagim wonogwe nogo nen, At nogo aret wage kogo o, yinuk, yogwe, Eekulik aret o.

¹¹Togop aret me, An yuurak mbake nogo puk aga'lek aret ari, Niniki apit ee'nabit unggwage nogo kik wunake, Niniki wakkolage logonet neebi mbake nogo pagangge, Eerigin aret o.

¹²At nogo ti, niyo laut ilik, Waalo nggwok anini warak yi inikime menggerak a, Mba'nuk, narum logorak mbaken ya?

¹³An nogo yege minggim windak neegak, noba tayenogo panege, Kwi'ndak minggim kwi'ndak neegak, Neebi mbake nogo lek age, Eerigin mbake kwe,

¹⁴Nabi paga nagabiti eerogo panege, Nabinggaanggo paga nogut nagake, Eeke menggendak me,

¹⁵An nagabolo yi paga neenik logorak mbakeelik o. Nenggaanok nggubuk togon kambikit lak, Ao, mbake agarik o.

¹⁶Neenik mondok-mondok logorak mbakeelik o. Neenik wonage yi, Inambe aagi ne ambit wungge kwak aret, mba'nuk, Neenik logorak neebi lombok mbake me, mbo panu o.

¹⁷ Aakumi ti, taamini me nduk, Kat nen it iya eeppiige, it liippiige, Eeke menggendak?

¹⁸It aakumi ti, Ko'lu-kii'me kubondendok liippiya wage, Netik-netak inabut mbangge, Eeke menggendak me,

¹⁹An mbo paninuk kena nomok ari, Nawoori lunggunogo wurabikit nen nalik teppanege, Eeka'lek keegak, Ne mande logomunggun o?

²⁰Aakumi kenegen wogonaka yi, An maluk eekirak kenok nano eeppagagirak? Nonggop nduk an mban eeppanegak yuurak mbaken? An eerit nage paga aaninggin eerogo pagagirak me nduk ee'nabit unggwage agandik ya?

²¹An nen kat koone taganogo pigirak kenok, mari eerogo panege, Ndi, maluk eekirak kenok, lek eerogo panege, Eeka'lek Nonggop nduk eeke agandik? An o yogondak liirubu enggela'me winnarigin me, Kat nen kwaa'nabit namenggendak kwe, Neebe lek aret neyaamunggun o,” yinuk, yoreegerak.