Read Western Dani Ndawi 10 Bible Online

Ndawi 10 - Western Dani bible

Ndawi 10

¹Kaliku ALA wae. Aaninggin-paaninggin noba agaarak wonage kagak, Nonggop nduk kat ndaanda wonage, Nonggop nduk kenggaawak kumaappatinuk wonage, Eeke agandik?

²It maluk eeka nen iniki wogoppako logonet, “Aap ineenggi lek ti, ndogop eeppiyaawok o,” Yinuk, kote koonogo punuk, Kwaarinabit namenggaarak kwe, It aret yilunggologwe,

³“Niniki nengge nogo aret eerit nogo ogoorik o,” yinuk, wogoppakwi, It aap yi mendek ndi mendek mban kolaawok, mbarit nugwi nogo inendage tiyappiigwi, At Aliku ALA endage meek eerogo pugwi,

⁴“An iya,” mbarit nogo logonet, Ala mugurok nogwe lek mbo pugwi, “Ala lek,” mba'nuk, ugun koonit nugwi, Eeko menggaarak kwe,

⁵It eerit nugwi nogo abe mban arit nage, “Nit iya,” mbako logonet, kat wone lengganogo yo'nirage nogo, Abu kobak eeppunuk wonogwe, Inom ogoorak wonogwe nogo mbelappiigwi, Eeko menggaarak.

⁶It nen yikkologo logonet, “Niniki lek-lek age, aaninggin ambi ninoba age, Eeke logogin mondok lek me, Niniki mondok ale'nggen mban mbako logogun o,” yinuk, yogo menggaarak.

⁷ Inikime maluk mban yagabit aago logonet, Aakumi pulunogo piigwi, Pilit wone yoranet nugwi, Aakumi inagabiti mbaruwak nduk yorogwe, Eeko menggaarak. Ndi, inoone maluk mban wundi wage logonet, maluk eeriyak mban koonogo pit nugwi, Aakumi ale-pale eerogo piyoorak mban yogwe, Eeko menggaarak.

⁸Aap inagap ndakkoloorak meek mendek nogo it nen kok nggereninabuwok nduk, Aakumi inawoore'nggam eyoongga ku'mbanak me, Kumaa'na'nuk toriigwi, Time nen it maluk eeka'lek ugun wonogwe nogo inoori wundi wogwe, Eeko menggaarak.

⁹Singa nen at noorak mendek wage kero, Iri'nggaame kumaarak tokkage menggi kwak It inagap ndakkoloorak meek mendek nogo piginabuwok nduk toriigwi, Wogwe iinok, inageele pugume nggelenak me, pigiren nogwe, Eeko menggaarak.

¹⁰It nogo nen yikkologo logonet, “Ala abe'ninaka'lek mbo pinanege, Enegen kumaappatinuk wonage me, Enegen wo'ninaka'lek wonage, Eeke agaarik o,” yinuk, It piginakaatak nogo inuut tebenogo piigwi iinok, kweyak yogwe, It inomaawi ambik paga tebenogo piigwi me, ngginnogwe, Eeko menggaarak.

¹²Togop eeko menggaarak me, Kaliku ALA wae. Pilak yu o. It aakumi inagap ndakkoloorak meek mendek yi, Kobak eerogo mbo piyoorak mage o. Ala wae. Kat yeenggwaaret o.

¹³It maluk eeka nen kat Ala miyuk-meya eerogo pagagwi, “Ala nen, Nonggop nduk eekotak, yo'niraagin lek o,” yogwe, Eekwi ti, Nonggop nduk yogo agaarik?

¹⁴Togop yogo menggaarak kwe, Ale-pale eerogo piigwi, Iniki andi eerogo piigwi, Eekwi nogo kat Ala kenegen iige, Onggo eeppiyoorak nduk, koonogo pege, Eeke menggendak o. Elege moono yeenggwaarage menggendak keenok, Aakumi inagap ndakkoloorak meek mendek nogo Kabu'me ari wogo menggaarak o.

¹⁵It aap iniki worokot inom, maluk mban eeko menggaarak inom, Inomaawi lek eerogo piige, “Nit maluk eekwi Ala niige lek o,” mbakwi nogo Inomaluk ambi tabarak logokwak, Liirit-laarit yoranet unggwage, Eeru o.

¹⁶Kat Kaliku ALA Mondok-mondok kendagembogut aret menggendak me, Yi aakumi ndi aakumi kanggween paga wonogwe nogo Lek eerogo piyaamunggun o.

¹⁷Kaliku ALA wae. It aap nggween paga mendek nen Aap iniki ma'naruwak nduk ambinom eeginako logokwak, It aakumi tebenak wonogwe iniki, “Ao,” mbakwi nogo, Kat liippiige, iniki eyak wappiige, Inale yogo logonet, yokkugwi nogo karuk konengge, Eeke logonet, It elege moono inom, it aap tebenak wonogwe inom, Inili eerogo piige menggendak o.