Read Western Dani Ndawi 102 Bible Online

Ndawi 102 - Western Dani bible

Ndawi 102

¹Kaliku ALA wae. An tamban eeke yi, karuk konengge, Kat nen yeenggwa nirenok nduk Noone nggwok paga yokkege yi, liippege, Eeru o.

²Aaninggin noba a'nuk wonage neenok, Kenete kumaappatinuk logorak mage o. Ata, an yokkege neenok karuk konengge, Noone nggwok paga yokkege neenok, Onggo mbet-mbet yo'nege, Eeke logot o.

³Kani ka'luk lek age menggi kwak An nda'nagagirak eyom togop aret lek arit unggwage, Kani kunik ket ari menggi kwak, An nowak worarit nage, Eeke agaarik o.

⁴Iri'ngga taganak teebat age menggi kwak, Niniki togop aret ee'nake me, Mbi noorak nogo kobak eeppunuk wonage,

⁵Niniki wakko'net unggwage paga Neebe abu mbuuluk ee'nabit unggwage logonet, Nowak neno eerogo panege,

⁶Towe mumayo o karume wonage menggi kwak, Towe ndindim o wuum pereegwam wonage menggi kwak, An togop eerogo panege,

⁷Towe o kirin paga aligiluk kwi'ndak wonage menggi kwak An nogo yuurak meek, niniki lulo aago wonage, Eeke agarik o.

⁸Kubondendok nen nok kiyoma kuli ari nage kagak, It ninom ogoorak nen miyuk-meya eerogo panugwi, Inanini nombakwi nen an nendage kunogo aakumi pulunogo piigwi, Eeko agaarik o.

⁹Kat nen an nendage tiyappanege nagandik, Ti'nuk, kanini mondok alik negen noba panege logonet, Mbo panegendak me, Nambi kwak ti, liirubu aret nengge, Nale amburu naniyo inom nenggelak-kenggelak eerogo punuk nengge, Eeke agarik o.

¹¹O kiyoma inagalu'mak nggorek a'nuk lek age menggi kwak, An nda'nagagirak eyom nogo togop aret lek age, Iri'ngga teebat age menggi kwak, an togop aret age, Eeke agarik o.

¹²Kaliku ALA wae. Kat perak, Mondok-mondok kendagembogut aret o. Aa'nduk nda'narit wundi wogogwaarak iigak, Peebi nda'narit wundi nogwe iigak, Kat kendage mondok ki aret menggerak o.

¹³O kota Tiyon obeelom eeppuurak eyom panggoni wage, At eeppuurak koonak nogo abu panggo yi wage, Eekerak me, Kat pilak ari logomenggendik, O Tiyon abuwa mbake logomunggun o.

¹⁴O yugum paga wurik yugum ti, Kayeloman mini nen inikilom mbakwi, O minik liirubu kale'ngga aago kunduk abuwa mbakwi, Eeko menggaarak o.

¹⁵Kaliku ALA nen o Tiyon obaane'me wurogo pege, Kat kabinak pindan-pindan aago logonet wage, Eeke keenok, Yi aakumi ndi aakumi abok aret Kaliku ALA kendage kumbunuk, inagabiti mbakwi, It aap inendagembogut nggween paga wonogwe nogo Abok nen kendage abu tiyanak keenok kayuk wukwi, Eeko logogun o.

¹⁷It kapuri tebenak logonet tamban eekwi nogo, Kena koonogo nagiige, It nggino yokkugwi nogo, Kat nen meek inombaka'lek karuk konengge, Eeke logomunggun o.

¹⁸Aakumi peebi nda'nariyak nogo ineenu ogwe, It aakumi peebi wigannarugun nogo nen Kaliku ALA kendage tiyappugwi, Eeko logowak nduk, Inake liiru mbanogo puurak nogo yi o.

¹⁹“It aakumi keele maarak yagan wako logonet, Inoone yogwe nogo at aruk konengge, It aap inooriyak punik nogo wondet eerogo piige, Eerikit nduk, At Aliku ALA abu leenak Tiyarogon wonage menggim logonet enegen wugiya wage, O mbogut paga nen nggween paga ena wu'nari wage, Eekerak o,” Yinuk, liiru mbanogo pigi o.

²¹Togop aret me, yi aakumi ndi aakumi inom, It aap inendagembogut inabu'me piigo menggam inom, Abok aret Aliku ALA alut eeruwok nduk, kuwak eeri wogwe iinok, O Tiyon paga Aliku ALA endage kunogo yorogwe, O Yerutalem paga at endage tiyappugwi, Eeko logogun o.

²³An awo nanggok aga'lek neegak, Aliku ALA nen nomaawi lek eerogo panege, An nda'nagagirak eyom kuwagaluk eerogo panege, Eeke kenok,

²⁴An nen at yoge logonet, “Nogoba Ala wae. An awo obate paga kat nen wo'naburak mage o. Aa'nduk nda'narit wundi wogwe iigak wonagagindak me, Peebi nda'narit wundi nogwe iigak, Kat mondok aret logomunggun o.

²⁵ O maan aa'nduk nggween yi alom kwippege, Kat keenggi paga nen mbogut ogobakkigirogo pege, Eereegindak o.

²⁶Mbogut inom, nggween inom, ti lek arigin kwe, Kat perak, kitok mondok aret menggendak o. Yum maan yugu me nibik ari kenok, mbo pogo mengga kwak, Yum enete maluk agaatak kenok, Yuwi-mbuwi eerogo mbo punuk, Obaane'me alik ngget mendek yikkologo mengga kwak, Mbogut-nggween yi, togop aret eerigin kwe,

²⁷Kat perak, alik ageelik kitok aret wonage, Nda'nagagindak eyom lek ageelik mondok aret wonage, Eeke menggendak o.

²⁸It kayeloman mini inapuri nit nogo, niniki tayenak ugun aret wonogwe, Ndi, it paga wiganak nit nogo, Kenegen wo'ninake keegak, wigannarit wundi wogwe,” Eeko logogun o.