Read Western Dani Ndawi 103 Bible Online

Ndawi 103 - Western Dani bible

Ndawi 103

¹Niniki yi wae. Aliku ALA tiyappege, Niniki-neebe yi wae. At endage abu abe alik leenak me, alut eeke, Eeke logot o.

²Niniki yi wae. Aliku ALA tiyappege, At yi obeelom ndi obeelom eeppagage nogo, Kobak eerogo pega'lek abeke, Eeke logot o.

³At nen komaluk lek eerogo pagage, Yi kugi ndi kugi andi eekkake nogo, at nen lek eerogo pagage,

⁴Kambunuk nogo menggam mbuun ambena wambi nage me, non mbanogo pagage, Kabuwa lombok nen iniki kunik mban eekkake,

⁵“Ndogop eerogo obeelom eeppanuwak lak, ao,” Mbake nogo aret nggwik togon eeppagage paga Towe nggindooni kwak, Kagabolo awo ena wagangge negen eerogo pagage, Eeke menggerak o.

⁶It aap tebenak wonogwe nogo abok aret Aliku ALA nen inawone mbangge logonet, Obeelom mban eeppiige, A'me nggelok koonogo piige, Eeke menggerak o.

⁷At eeppiyoorak kooneegerak nogo Muta eenu eeppege, Ndi, Iterali inigen iigak eeppiinet wage, Eereegerak o.

⁸At Aliku ALA nen aakumi inabuwa mbake, Inabuwa nen iniki yanggonak paga eeppiige, Anini mbet-mbet wunggeelik yanggoppunuk wonage, Aakumi iniki kunik nggwok togon aganake, Eeke menggerak o.

⁹“Kat maluk o,” mban yo'nirage, Anini wungge tit kagak o ambik me ari nage,

¹⁰Ninomaluk onggo aaninggin ndak-ndak eeppinanege, Maluk eerit nugwi niinok, onggo ndak-ndak eeppinangge, Eekeelik o.

¹¹It aakumi at inagabiti mbako menggaarak iniki kunik iya negen aganake nogo ti, Nggween paga nen mbogut agi tiyarogon nina nikkoorak meek nogo kwak aret menggerak o.

¹²Oonegen lagi wage menggim nen kilu yi nage menggim o nda lombok menggi kwak, Ninomaluk nda togop aret mbo nappege menggerak o.

¹³Nit nonggop eerogo ogobakkigi'ninabeegerak nogo At Aliku ALA eenu age, Nit yi, liirubu mendek mban niige, Eeke menggerak me, Aap inapuri inabuwa nggwok lombok mbako mengga kwak, Aliku ALA nen it aap at inagabiti mbakwi nogo Togop aret inabuwa mbake menggerak o.

¹⁵Nit aakumi nineenik wonogwe nogo ti, Iri'ngga kwak wonogo monggoorak o. Iri'ngga yabume anggen laambu aberogon yegetak me,

¹⁶O wiya wage logonet, mononogo wuppege kenok, Eebe lek aret aremenggerak paga “Ndogop yarak wonagagerak o,” yinuk, yogolik Abu kobak mengga kwak aret wonogo monggoorak o.

¹⁷Togop aret kwe, It aap Aliku ALA inagabiti mbakwi iniki kunik aganake nogo ti, Lek ageelik o aa'nduk nen nok peebi itok aret menggerak o. Ndi, it inombowologwe nen Inombomini Ala inom wone koonogo pereegerak nogo Liirogon porogo wonogwe, Eeko logorak wone mbo pega'lek ndak-ndak aret eekwi, Eekwi iinok, Aliku ALA nen obeelom eeppiinet wundi wage logogin.

¹⁹Aliku ALA nen wone lengganogo yorage menggim mbogut paga koonogo pereegerak wonage, Yi aakumi ndi aakumi inom, yi mendek ndi mendek inom, Abok aret abu'me piinok wonage, Eeke menggerak o.

²⁰Kit wakaa'ngget Ala wone ari kinaruk konok eeka malayikat yi wae. At Aliku ALA tiyappugwi,

²¹Kit at ayeloman mini at mbake eeka awuri wim eeka yi wae. At Aliku ALA tiyappugwi,

²²At unde menggim yi awi ndi awi abok yi mendek ndi mendek ogobakkigirik yi wae. At Aliku ALA tiyappugwi, Eeko logonip o. Ndi, niniki yi wae. Kat kunduk at Aliku ALA tiyappege logot o.