Read Western Dani Ndawi 104 Bible Online

Ndawi 104 - Western Dani bible

Ndawi 104

¹Niniki yi wae. Aliku ALA tiyappege logot o. Kaliku nogoba Ala wae. Kat mondok nggwok lombok wonage, Kat abu tiyanak kayuk warak keenok, “Wi,” kugwi nogo Kobaanggi-kobaangge li'luk eerak kwak wonage,

²Kabinak paga keebe lenggembatinuk wonage, Yum tabak paga ooliya lenggenogo punuk mengga kwak, Kat togop aret mbogut mbiganogo punuk wonage,

³Niyo agi-ogu lambunik o oolo ya'i irimbaga kat kawi eyak wuppunuk, wurogo pit lagangge, Ndugwi ti kanggweendo kwak wokkeren nega eerogo pege, O wiya a'naabit paga nege,

⁴ O wiya ti, koone wonok nega eerogo piige, Kani omoonuk ti, kayeloman mini negen eerogo piige, Eeke menggendak o.

⁵O nggween yi, abena ndoonogo punuk, Obaga kwippereegindak me, mondok nu'lek aret wonage,

⁶O nggween abena ndoonak obaga kwi'ndak nogo ti, Yum tabak ndoonak kwak, niyo yenggenogo pege, Niyo nogo yenggenit lagangge logonet, puut-puut abok aret tebenogo pege, Eereegindak kwe,

⁷Mberege mbareegin, niyo nogo wundi nage, Koone ngguurubu oone negen ari keenok, niyo agabiti nen kuwo-kuwo wungge,

⁸Puut-puut paga nen taga-taga wangge, O kobappaga at logorak koonogo pereegenom nogo yenggenit nage, Eereegerak o.

⁹Time nen kuwo-kuwo wundit nogwe iyo, kuli mbanogo pereegindak kagak wunggwi, O nggween yi, tebenogo pit nogwe, Eerugun mondok lek aret o.

¹⁰Kat nen aret niyo eneeri o kobappaga time Wundit nage logowak nduk eerogo pereegindak me, Puut aru-ogwe kagak oolo niyo wage menggerak o.

¹¹Niyo ti nogo, Ndiimbu-nggwiya karume nugu menggaarak nen nunggwi, Keledai nggwiya eyonggaame nugwi nogo, Yi abu aganake kenok nunggwi,

¹²Towe wiganinuk nugu menggaarak nen Niyo nogo aa'nggi paga inawi wuppunuk wonogwe, Eyoongga enggela'me logonet inoone yogwe, Eeko menggaarak o.

¹³Kat kawi wurogo pit lagagenom nogome nen Puut-puut paga niyo ndik-ndik eerogo wuppit wage menggendak o. Kat eeke menggendak paga nggween yi, Abu ki eerak aret wonage menggerak o.

¹⁴Tapi-ndomba inake iri'ngga mbilanuwak nduk eeppege, Aakumi nen yi mendek ndi mendek awi yarit nogo logowak nduk, eerogo pege, Eeke keenok Nggween nen nunggwi mendek wogorage nogo yi o.

¹⁵Aakumi inale'nggen mbaruwak nduk, anggur amburu magarage, Inete teretak eeke logowak nduk tayitun amburu wogorage, Aakumi inomaawi logowak nduk, mbi magarage, Eeke menggerak o.

¹⁶Kaliku ALA kageyo nggabina o Libanon mendek Yareegindak nogo liirogon unde wonage paga Abe kwit agan lagangge,

¹⁷Eyo ti nogo paga yi towe ndi towe inawi wuppunuk wonogwe, Eyo kilu-kilu abu'na towe lu inawi wuppunuk wonogwe,

¹⁸Puut-puut tiyanak paga Kambin nggwiya unde eeppatinuk wonogwe, Yugum lunik enoona pagi wanon wonogwe, Eeko menggaarak.

¹⁹Tut nen ne lingginggak yuurak koonogo pege, Ndi, oonegen nogo, Ne ndi eyom paga kilu yi nage logorak eenu wonage, Eeko menggaarak.

²⁰Kat nen o apit ariyak nappi wage kenok, O nogo kiip aremenggerak wonage kagak, ndiimbu-nggwiya nugwi,

²¹Singa nogo nen it noorak kwaarit nugu logonet, Inoone nggwok agan nugwi, Inambi wogoraanok nduk, Ala koba panggonak wonogwe, Eeko menggaarak kwe,

²²Oonegen lagi wage kenok perak, Pengge agan kumaa'narit nugwi, Iniyokan it wonogo menggam nanuk, winnari unggwogwe, Eekwi iigak,

²³It aakumi yabu eeko menggam nogome eeri wunggwi, It eeko logorak mbakwi nogo eerit nogwe, Eekwi iigak, O kiyoma aret ari nage menggerak o.

²⁴Kaliku ALA wae. Kat yi eekak ndi eekak ambik lombok eeke menggendak o. Kiniki warak nen yi mendek ndi mendek ogobakkigirogo Piyareegindak nogo O nggween paga ndak warak wonogo menggaarak.

²⁵Niyo nggwok yenggenak laut nogo ti ket o. Niyo ti, abu nggwok ambe mondok wigak togon pugume Inikime yi mendek ndi mendek mbuulogwe-iyo'nggok Ineenggi lingginiyak meek aret nugut-tiyak agan nugwi,

²⁶ Niyo ti paga yi yiiro ndi yiiro nugwi, Waalo nggwok endage Lewiyatan nogo, Niyo inikime ku'mbo-wanggak agan nugu logowak nduk, ogobakkigirogo piyareegindak nogo, Niyo ti inikime ku'mbo-wanggak agan nugwi, Eeko agaarik o.

²⁷It ti abok aret mbi nonggo menggam ari wage kenok, Inambi nawok nduk, kat paga panggonak wonogwe,

²⁸Inambi wogorage keegak, it kuwak eerogo pakwi, Ili yaga'lek nggwik togon wogorage keenok, obeelom mendek ndonggok togon nunggwi,

²⁹Wogoraga'lek kenete niminik wonage keenok, inaganak wake, Ndi, iniki wagangge keenok, kanggo nagaatik, Liirubu mendek aret me, liirubu aret ogwe, Eeko menggaarak o.

³⁰Aberiniki kimbirak wonage nogo nappi wage keenok, It inobaane'me alik nda'naruwak nduk eeppiige, O nggween yi enete ngget alik eerogo pege, Eeke menggendak o.

³¹O nggween yi, kenegen wukka wage keenok, nuk-nuk ari, Puut-puut keenggi mbaanggage keenok, ka'luk wundit wage, Eeke menggerak me, Kaliku ALA kendage tiyanak mondok-mondok wonage, Kat nen yi mendek ndi mendek Ogobakkigirogo pereegindak paga ale'nggen mbake, Eeke logot o.

³³An kangga'lek awo neenik wonage logonet, Kaliku ALA kale'nggen kaanok nduk, ndawi wake, An awo wonage logonet, Kat nogoba Ala ndawi paga kendage tiyappege, Eeke logogin o.

³⁴Kaliku ALA nen eeppanege paga nale'nggen mbake logonet, niniki koonit nage nogo, Kat kinikilom nombariyak, “Ao,” mbake kwe,

³⁵It aap maluk eeko menggaarak nogo perak, O nggween paga yime nen inenggaawak lek ogwe, It aap maluk eeka nogo ineebe lek ogwe, Eeko logowak o. Niniki yi wae. At Aliku ALA tiyappege logot o. Aliku ALA tiyappogo logowok o.