Read Western Dani Ndawi 105 Bible Online

Ndawi 105 - Western Dani bible

Ndawi 105

¹Aliku ALA, “Wa,” yogwi, At endage kunogo kinoone nggwok paga yogwi, At eerit wagagerak nogo, Yi aakumi ndi aakumi inenggela'me yoranet nogwe,

²At ale'nggen mbaruwak nduk, ndawi wakwi, Ndawi paga endage tiyappugwi, Iya tit eeke nagagerak nogo abok aret mbininogo yoranet nogwe,

³At endage abu abe alik leenak me wogoppugwi, Kit Aliku ALA mugurok nogwe ti, kinale'nggen mbakwi, Eeko logonip o.

⁴At Aliku ALA mban mugurok nogwe, At omaawi eeppinagawak nduk nggino yogwi, Ko'lu-kii'me enggaawak koorak nduk owagam unggwogwe, Eeko logonip o.

⁵Aliku ALA ayeloman Abarakam paga wiganak yi wae. At leenogo pinagareegerak Yakup ombowologwe yi wae. At Aliku ALA iya tit eerogo pit wagagerak inom, Eerubok mendek eeke nagagerak nogo inom, “Aaninggin ndogop eeppinagagin o,” yinuk, kit kinom ogoorak yoragagerak nogo inom, Abeko logonip o.

⁷At Aliku ti, ninogoba Ala aret o. It aakumi nen eeppinagagwi iinok, “Maluk onggo ndogop eeppiyaagin o,” yugu nogo, O nggween paga yime abok aret eeppiige wonage aret o.

⁸ At eeriyak wone inom koonogo pege, Wone, “Yogop ee'nu ndogop ee'nu,” yereegerak nogo Aberak kagak, nda'narit wundi wogwe iigak, Seribu kuli aret ari nage, Wone koonogo at Abarakam abuk nggaruk togon yoge, “Ndogop eerigin o,” yinuk, kumbuk mbanogo Itak yoge, Eereegerak wone nogo ti, Mondok-mondok aberak wonage menggerak o.

¹⁰ Wone ti, wone lengganak kwak At Yakup nen mondok eeke logowak nduk omaawi eerogo pege, Wone koonogo pereegerak nogo, Mbeyok yigin lek mondok-mondok koonak wonage mbaruwak nduk, Iterali yorage logonet,

¹¹“Nggween o Kanan ti, yate kwak mondok unde logobagip nduk, wokkiraagin o,” Yinuk, yorage, Eereegerak.

¹²Ineebe mbuuluk mban wonogwe, Ineebe mbereret aap nggiru kwak wonogwe, Eeko logonet,

¹³It aakumi ambi wonogwe me nen ambi wonogwe me ya ye mbanggak nugwi, Aap ambi abu'me piinok menggim nen at ambi abu'me piinok menggim ya agak nugwi, Eeko nogogwaarak.

¹⁴ Eerit nugwi iigak, aakumi nen tebenogo piigwi iyo, Aliku ALA nen, “Mage,” yorage, Iterali inili nen it aap inendagembogut mberirage logonet,

¹⁵“It aap an nen leenogo piinok, amburu kilippiyareegirak yi, kineenggi mbaaniigwi, It aap an yorage neegak yoraga yi, Maluk eerogo piigwi, eerugup o,” yinuk, yorage, Eereegerak.

¹⁶ O time mbi noogelo inoba ari woraawak nduk eeppiige, Inambi pipuk aago nogo a'nggan waganogo piige,

¹⁷ It awo iigak at aa'nduk ari nawak nduk, at Yutup nappege, Eereegerak. Yutup nogo aakumi inayeloman logowak nduk, At eebe onggo mbanggologwe,

¹⁸ At eenggi-iyok keele maarogo pugwi, Enggaanok mbuti omanggen yiluk-yiluk aago paga nggelenogo pugwi, Eereegwaarak kagak,

¹⁹Eeriyak obagari yoragagerak nogo ndak-ndak ari nage, Aliku ALA nen at yoge mbareegi, yoragagerak nogo Abet aret mbaruwak nduk, a'me nggelok yi nage, Eereegerak.

²⁰ Eeke mbareegi, Aap endagembogut nen At piinogo wumbi woraawak nduk, awuri yorage, Yi aakumi ndi aakumi inowe nagawan nen yoragagerak paga keele piinogo pugwi, Eeko mbareegwa,

²¹ At awi nggwok abe wurik unde logowak nduk eeppege, Amindik-amendek abok aret at mban unde eeppege,

²²Ndi, at iniki koombunuk, aap endagembogut awuri inom eeka nogo wone lengganogo yorage, Oweewi inom wone koongga nogo iniki warak logonet, Eeko logowak nduk wone mamunirage, Eeke logowak nduk, Unde eeppereegerak o.

²³ Togop aret eerogo pereegerak wonage kagak, Aakumi Iterali mendek o Metit unggwi nogo nogogwaarik, At Yakup nogo aap nggiru kwak o Kam wonagagerak.

²⁴ Wonage kagak, at Aliku ALA nen at apuri nggwok lombok wiganogo piige, It inawim nogo inomaawi lek negen iigak, It inomaawi ambik eerogo piige,

²⁵At apuri ineebi lombok inombako logowak nduk, inikime mambiige, At ayeloman mini inambokan laganggo logowak nduk, inikime nggaganogo piige,

²⁶ At ayeloman Muta nogo ayonggo nappege, Aap leenogo pereegerak Karun nogo imbirak nappiige, Eereegerak.

²⁷Eeke mbareegi, It imbirak nen Ala iya tit eeke menggerak mendek Inenggela'me time eekwi, O Kam time eerubok mendek eekwi, Eereegwaarak.

²⁸ “Ala oone nineebi,” mbakwi iinok, o yumaak nappi wage mbareegi, o apit age,

²⁹ Inaniyo nogo amiya eerogo pege kenok, inayikwe niyoome wonage nogo kambit nogwe,

³⁰ Ogolem inanggween paga ninggirogo punuk, Aap endagembogut awuri inom iname inago ogoorik-ogoorak me unggwit nogwe,

³¹ At Aliku ALA oone ari kenok, Ti'neebon ninggi'nuk wogwe, Iname abok aret laami nggit-nggit unggwit wogwe, Eereegwaarak.

³² At nen iname mayu wage nogo obaane'me mayu kumulinggen wurabit wage, O kimbik iname paga pindanogo nappit wage,

³³Inageyo anggur inom, wuli inom, Yigirogo pit wage, Inanggween paga yi eyo ndi eyo Nggaganak-mbilinggin eerogo pit wage, Eereegerak o.

³⁴ Aliku ALA nen ari kenok, wurin unggwit wogwe, Yibila ineenggi lingginiyak meek nogo ninggirit wogwe, Eeko nogogwaarik,

³⁵It inanggween paga yi mendek ndi mendek yarak lelenogo nenet nogwe, Ineyabu yarak me yi mendek ndi mendek anggen yugu mbanogo nenet nogwe, Eereegwaarak.

³⁶ Eeko mbareegwa, It Metit menggaarak inapuri aap manggu ndarak kero, Abok aret inoorogo piige, Iyaalok inomaawi paga ndarak nogo inoorogo piinet nage, Eereegerak o.

³⁷ Ti eerogo piinok, it aakumi Iterali mendek nogo O Metit nen wogoren wage, Mbuti emas inom, mbuti perak inom, Inoba luurik-maarak aago ineebe obeelom inaani aret wogoren wundi wage, Eereegerak.

³⁸It aakumi Metit mendek nogo Iterali ineebe paga inagabolo ne agan nage nagagerak me, Wundi wogo mbareegwa, inale'nggen mbareegwaarak.

³⁹ At Aliku ALA nen yum tabak negen ndugwi wiganogo punuk, inarum kagak wogwe, Oonikiya eya paga woraawak nduk, kani wunumborogo kagak wogwe, Eerit wogogwaarak.

⁴⁰ Nggino yogwi iinok, towe nggimabut nappiya wage, Ndonggorogon nawak nduk, mbi mbogut paga nen wuppiya wage, Eereegerak.

⁴¹ Puut lunik nggaganogo pege mbareegi, Niyo kilak togon wundi wage, Niyo nage kwak, yi lek me karume wu'nuk nage, Eereegerak.

⁴²Ti eerit wagagerak nogo ti, Aliku ALA nen wone abu abe abuk nggaruk togon koonogo Ayeloman Abarakam yoreegerak nogo Aberak logonet, eerit wagagerak.

⁴³Inale'nggen mbakwi iigak, Aakumi at apuri wogoren wundi wage, At leenogo piyareegerak inale'nggen nen keekok piyanggogwe iigak wogoren wage,

⁴⁴ Yi aakumi ndi aakumi inanggween at apuri wogorage, It aakumi ligak wuundamo eereegwaarak nogo Waganogo yate kwak unde logowak nduk, at apuri eeppiige, Eereegerak.

⁴⁵Ti eereegerak nogo ti, Eeko logorak wone lengganak nogo ndak-ndak eekwi, Ndi, wone, “Yogop ee'nu ndogop ee'nu,” yugu nogo Liirogon mugurok nogwe, Eeko logowak nduk, Eereegerak o. Aliku ALA tiyappogo logowok o.