Read Western Dani Ndawi 112 Bible Online

Ndawi 112 - Western Dani bible

Ndawi 112

¹At Aliku ALA tiyappogo logowok o. Aap ambi at Aliku ALA agabiti mbake, “Yogop ee'nu ndogop ee'nu,” wone yugu nogo eeke logorak inikilom lombok mbake, Eeke menggerak nogo Ale'nggen aret wonage menggerak o.

²O nggween yime at apuri-ombowologwe inendage tiyanak iinok, inoone konenggwi, Iniki koonak paga ndarak nogo inale'nggen aret wonogwe,

³At aaganapuri ineenggi warak me, Inamindik-inamendek ambik wonage, At obeelom mban eeppiinet nage nogo, Lek arigin lek mondok-mondok wonage, Eeke logogin o.

⁴It aap a'me nggelok mban eeppiigwi, Iniki yanggonak logonet, eeppiinet nogwe, Aakumi inabuwa mbakwi, iniki koonak mban wonogwe, Eekwi nogo O yumaak kwak logomenggaarak kwe, O eya pindanogo piige logogin o.

⁵Aap ambi iniki ndoobu wonage, “Namendek luulu porogo logonip o,” yinuk, wogorage, Yi eekak ndi eekak eerit nage logonet, ndak-ndak aret kolage, Eeke menggerak nogo Ale'nggen aret wonage logogin o.

⁶At aap ti nen eerit nage nogo Mondok nu'lek aret logogin o. Aap iniki abe koonak nogo Mari eerogo pega'lek mondok-mondok oba aberak aret logogin o.

⁷Aakumi nen, “Lek o. Wone maluk mendek konenggo o,” Yinuk, yogwi iinok, at agabiti mbaka'lek wonage, Iniki Aliku ALA oba panggombunuk nu'lek wonage, Eeke logogin o.

⁸Iniki nu'lek agabiti mbaka'lek logonet, Inom ogoorak tebenogo piyoorak mbake nogo Tebenogo piinet nage logogin o.

⁹ Ineenggi lek iinok amendek tumburiranet nage, Obeelom mban eeppiinet nage nogo kobak arigin lek mondok aberak wonage, At obaabut abe kenok endage tiyappugwi iigak, at engga teeluk nege, Eeke logogin o.

¹⁰It aap maluk mendek nen at eeke nogo, inigen kogo logomenggaarik, inanini mbakwi, Ineebi nen ineyak nggilik maakwi, Iniki andi eekko'net unggwogwe, Eeko logogun o. “Nit ambi eekkolaawok lak,” mbaremenggaarak kwe, Lek aret age logogin o.