Read Western Dani Ndawi 118 Bible Online

Ndawi 118 - Western Dani bible

Ndawi 118

¹ Aliku ALA abu obeelom mban wonage, Aakumi inabuwa lombok mbake nogo ti, Lek ageelik mondok-mondok wonage, Eerak menggerak me, “Wa,” lombok yogo logonip o.

²It Iterali nen, “At ninabuwa mbake nogo, Lek ageelik mondok-mondok wonage o,” yinuk, yogwe,

³It aap Karun mendek nen, “At ninabuwa mbake nogo, Lek ageelik mondok-mondok wonage o,” yinuk, yogwe,

⁴It aap Aliku ALA inagabiti mbakwi nen, “At ninabuwa mbake nogo, Lek ageelik mondok-mondok wonage o,” yinuk, yogwe, Eeko logowak o.

⁵An nonggop eerubok ee'nake kenok, “Yeenggwa niru o,” yinuk, Noone nggwok paga Aliku ALA yoge neenok, At aruk konembunuk wondet eerogo panegerak o.

⁶ At Aliku ALA nimbirak wonage me, aakumi nen an eeppaniyak mbakwi iinok, An nagabiti mbarigin lek o.

⁷At Aliku ALA nimbirak wonage, At nen aret yeenggwa nege, Eeke menggerak me, Nawim ti, ndak aret tebenogo piyoorak mbake agarik o.

⁸Nineebe op logowok nen, Niniki aakumi paga panggombuurak ti, meek aret me, Aliku ALA paga mban panggombunuk logorak perak, Op aret kagi o.

⁹Nineebe op logowok nduk, Niniki aap nagawan-nagawan inoba panggombuurak ti, Meek aret me, Aliku ALA paga mban panggombunuk logorak ti, op o.

¹⁰It yi aakumi ndi aakumi abok aret an wanggeppaninuk wonogwe kwe, Aliku ALA omaawi paga mugogo-magago mappiige,

¹¹Nenaagan-nambokan wakkumbaninuk wonogwe kwe, Aliku ALA omaawi paga mugogo-magago nappiige,

¹²Nggiin aap inoba ninggirinakwi kwak, an ninggi'nakaarak kwe, Kani nen iri'ngga ne ambit wunuk togon nengge kwak, It togop aret neenogo piinet nage, Aliku ALA omaawi paga niyok konden yigirogo piige, Eekirak o.

¹³It nen nakom panggonneren wogwe me, Ngginnarikit nduk eeke neenok, Aliku ALA nen yeenggwa negerak o.

¹⁴ At Aliku ALA nomaawi eeppanege, At nen aret an nagap ndake, Eekerak me, An ndawi paga at anep pege agarik o.

¹⁵Aap iniki abe koonak inawooliya wurik me logonet, Inale'nggen nen keekok yogwe, “Aliku ALA nen eenggi abe'nggan paga iya tit eekerak me, nineegin tiyak yigi o,” Yinuk, kuum-keek yogwe, Eekwi konenggo ogoorik o.

¹⁶Aliku ALA eenggi abe'nggan paga, Aliku ALA eenggi omaawi paga, Mondok iya eerit nagaarak nogo tiyappogo ogoorik o.

¹⁷An kangga'lek neenik logonet, Aliku ALA eerit nagaarak nogo Mbininogo yoranet nage logogin o.

¹⁸Niniki koonnaruwak nduk, Aliku ALA nen mondok iya eeppanegerak kwe, An kambikit nduk, mbo panulik o.

¹⁹At Aliku ALA owagam nogwe, It aap iniki abe koonak kenok, at owagam nogwe, Eekwi nogo Unggwogo menggam tu yi aret me, An Ala awi wurik me unggwi nage, Aliku ALA, “Wa,” yori unggwage, Eerikit nen, It aakumi iniki abe koonak unggwogo menggam tu ti, Paarogo paninip o.

²¹An nen Aliku ALA yoge neenok, Aruk konengge, an nagap ndake, Eekerak me, “Wa,” lombok yorigin o.

²² It yugum paga o wuka nen O wuko logonet yugum ambi mbo pereegwaarak nogo Yugum ogowa ndoonnaga o.

²³Ti agagerak nogo ti, At Aliku ALA nen aret eereegerak me, Mondok iya lombok eereegerak kogo nogoorik, pi wako ogoorik o.

²⁴Ne yi paga Aliku ALA nen mondok iya eereegerak me, Nit niniki mondok ale'nggen mbakwi, Ninale'nggen nen keekok yogwe, Eeko logowok o.

²⁵ Kaliku ALA wae. Ninagap ndake, Kaliku ALA wae. Eeriyak mbakendak nogo a'me lik yuwak nduk eeke, Eeru o.

²⁶ Aap ambi Aliku ALA endage paga wage kenok, wogoppuwok o. Nit Aliku ALA awi wurik me wonogo logonet, Ninale'nggen kinoba pogo ogoorik o.

²⁷At Aliku ti, Ala aret o. At eya ninoba pindanogo pinaneegerak me, Kinale'nggen nen laago lariyak nduk, Eyo engga kalenogo wonok kuwak ari wogwe, Aliku ALA ake warogo wogoriyak nogo, Wogogo menggam irip-unggut to ari nogo paga keele maarogo pugwi, Ee'nip o.

²⁸Kat nogoba Ala aret me, “Wa,” lombok yokkege, Kat nogoba Ala aret me, tiyappagage, Eeke logogin o.

²⁹At Aliku ALA abu obeelom aret wonage, Ninabuwa mbake menggerak nogo Lek ageelik mondok-mondok wonage, Eeke menggerak me, “Wa,” lombok yogo logonip o.