Western Dani bible online

Ndawi 119

¹It maluk inoba lenggenak lek logonet eerit nugwi, Aliku ALA wone Muta liiru mbaneegerak nogo mugurok nogwe, Eeko menggaarak kenok, inale'nggen aret mbakwi,

²Aliku ALA aberak logorak wone yugu liippugwi, Iniki ambit eeppunuk, at mugurok nogwe, Eeko menggaarak kenok, inale'nggen aret mbakwi, Eeko logogun o.

³It nogo ti, maluk eekulik At eeriyak mbake nogo mban eerit nogo menggaarak o.

⁴Kaliku ALA wae. Eeko logorak koone yugu nogo Liirogon woppunuk eeko logowak nduk, yereegindak o.

⁵Koone lengganak nogo liirogon porogo logonet, “Eerit nage logokit lak ao,” mbake minggirak.

⁶Koone, “Yogop ee'nu ndogop ee'nu,” yugu nogo Abok aret liippunuk eerit nage neenok, An nenggali arigin lek aret o.

⁷A'me nggelok eeko logorak koone yugu nogo An mamunggolage logonet, niniki koonak paga, “Wa,” lombok yokkege logogin o.

⁸Wone lengganogo pereegindak nogo An liirogon aret eerit nage logogin me, Kat mbo paniyak mondok mage o.

⁹It wologwe tawe nogo, nano eekwi paga Maluk eeka'lek inobaabut obeelom mban logorak mbakop? Lek o. Koone yugu ndak-ndak eekwi paga nen aret o!

¹⁰Togop me, an niniki ambit eeppunuk, kat mukkeren wage minggirak me, Koone, “Yogop ee'nu ndogop ee'nu,” yugu nogo Teppunuk, nomo agan nage neyo, Eraangge mbo paniyak mage o.

¹¹Kat maluk eeppagukwak, koone yugu nogo woppunuk, Ninikime liirogon porogo minggirak o.

¹²Kaliku ALA wae. Kendage mondok tiyanak logowak o. Koone lengganak nogo an mamunnake logot o.

¹³Eekaatak ndak-ndak eeppiigo logorak wone koone paga nen yo'nege menggendak nogo, An noone paga mbininogo yoranet nege,

¹⁴Aap eenggi warak age kenok ale'nggen mbake menggi kwak, Aberak logorak koone yugu nogo An mugurok nage logonet, nale'nggen mbake,

¹⁵Eeko logorak koone yugu nogo an aberit nage, Eerit nogo logorak mbake menggendak an liippit nage,

¹⁶Koone lengganak nogo ninikilom mbake, Eeke minggirak me, An nen kat koone kobak eerogo pigin lek o.

¹⁷An neenik logonet, Koone yugu liirogon eeke logokit nduk, Kiniki obeelom paga an kayeloman yi, eeppanege,

¹⁸Kat iya tit eerit wage menggendak koone yugu Muta nen liiru mbaneegerak nogo, Nenegen maloppikit nduk, nenegen eya eerogo panege, Eeke logot o.

¹⁹An aap nggiru negen o nggween paga yime luulu wonage me, Koone, “Yogop ee'nu ndogop ee'nu,” yugu nogo, An kage neyo, kumaappunuk logorak ti mage o.

²⁰Eekaatak ndak-ndak eeppiigo logorak koone yugu nogo An ko'lu-kii'me pekkage logokit lak, “Ao,” Mbake logonet, niniki andi negen age menggerak o.

²¹It aap pulunik iniki wogoppatit nugu logonet, Koone, “Yogop ee'nu ndogop ee'nu,” yugu mbo punuk, Nomo agan nugwi nogo mberirage menggendak o.

²²Aberak logorak koone yugu nogo An liirogon porogo minggirak me, It aakumi an meek eerogo panugwi, Abeelik-abeelek eerogo panugwi, Eekwi nogo Yamburogo nappiige logot o.

²³Aap inengga warak nagawan-nagawan nogo nen iniki ambit eeppunuk, Maluk eeppaniyak wone koonogo pugwi iigak kwe, An kayeloman perak, koone lengganak nogo Ninikime mbininit nage logogin o.

²⁴Koone aberak logorak yugu nogo ti, Eeriyak wone koonogo panega aret me, Ninikilom mbake logogin o.

²⁵An liirubu enggela'me ndenen warak wonage me, Wone koonogo pereegindak nogo ndak-ndak An aa'nduk wonagagi kwak eerogo panu o.

²⁶An eerit wage minggirak nogo abok aret Mbininogo yokkege mbaki, onggo yo'negendak me, Koone lengganak nogo an mamunnake logot o.

²⁷Eeko logorak wone mamunnake menggendak nogo Alom liippikit nduk, eeppanege keenok, Kat iya tit eeke menggendak nogo Ninikime mbininit nage logogin o.

²⁸An niniki puru ari logonet, Niniki aaninggin ndugu agan wangge me, Kat koone yugu ndak-ndak niniki kwippanege,

²⁹Abe eerikit nduk negen eerit nage neyo pi'nake, Koone yugu Muta nen liiru mbaneegerak nogo Ndak-ndak eeke logokit nduk yanggorogon mamunnake, Eeke logot o.

³⁰Kat ari menggendak nogo Liirogon eerit nage logokit nduk, miikkolage, Eekaatak ndak-ndak eeppiigo logorak koone yugu nogo Ti mban nengga loolo punuk eerit naakit mbake,

³¹Ndi, Kaliku ALA wae. Aberak logorak wone yereegindak nogo Nggirik-nggerok porogo wonage, Eeke minggirak me, An nenggali aruwak nduk eerogo paniyak ti mage o.

³²Kat koone ambinom neenu arikit nduk Niniki kole eerogo panumunggun me, Koone, “Yogop ee'nu ndogop ee'nu,” yugu nogo Nale'nggen paga liirogon aret eerit nage logokit o.

³³Kaliku ALA wae. Koone lengganak nogo Mugurok nage logokit nduk, Alom liirogon mamunnake keenok, Porogo neegak, kambuurak kuli ari nagin o.

³⁴Koone yugu Muta liiru mbaneegerak nogo Alom neenu arikit nduk, eeppanege keenok, An wone ti liippege, Niniki ambit eeppunuk eerit nage, Eeke logogin o.

³⁵Koone, “Yogop ee'nu ndogop ee'nu,” yugu nogo, Eerit nage logorak ninikilom mbake minggirak me, Eerit nage logokit nduk, yo'nege,

³⁶“An ambi eekkola,” mba'nuk, Ti mban mugurok noorak ee'nabukwak, Aberak logorak wone yereegindak nogo Mugurok nage logokit nduk, nena koonogo panege,

³⁷Aanom warogo kagak mugurok nage logokwak, nena koonogo panege, Eeke logomenggendik, Eerit nage menggendak nogo an eerit nage logokit nen, Aa'nduk wonagagi kwak eerogo panu o.

³⁸It aakumi kayuk wuko logowak nduk, An kayeloman yi, wone koonogo yo'nireegindak nogo Ndak-ndak eerogo panege,

³⁹Eekaatak ndak-ndak eeppiigo logorak koone yugu nogo Obeelom aret me, an meek eerogo panugwi paga Nagabiti mbake nogo mbo pege, Eeru o.

⁴⁰Eeko logorak koone yugu nogo, An eeke logokit lak, “Ao,” mbake minggirak o. Kat obeelom a'me nggelok eeke menggendak me, An aa'nduk wonagagi kwak eerogo panu o.

⁴¹Kaliku ALA wae. Aakumi inabuwa nen Kiniki kunik mban aganake menggendak nogo An kunduk ee'nabi wage, Nagap ndariyak koonogo pereegindak nogo Ndak-ndak eeppani wage, Ee'nok lak, “Ao,” mbake agarik o.

⁴²Ti ee'nabi wage keenok, Koone yugu niniki panggombunuk abet mbake me, It an meek eerogo panugwi nogo Wone onggo an op aret yoraagin o.

⁴³Eekaatak ndak-ndak eeppiigo logorak Koone yugu ti paga niniki lunik wonage me, Kat abet mban ari menggendak wone nogo An yuurak kobak eerogo paniyak mage o.

⁴⁴Kat koone Muta nen liiru mbaneegerak nogo An ko'lu-kii'me eeke, O yogondak nen peebi mondok-mondok eerit wundi wage, Eeke logogin o.

⁴⁵Eeko logorak wone yereegindak nogo An mugurok nage minggirak me, Niniki ugun tayenak aret nege,

⁴⁶Koone aberak logorak yugu nogo, It aap inendagembogut inenggaanom paga Nenggali lek logonet yorage, Eeke logogin o.

⁴⁷Koone, “Yogop ee'nu ndogop ee'nu,” yugu nogo Niniki kunik minggirak me, Eerit nage logorak ninikilom mbake minggirak o.

⁴⁸Koone, “Yogop ee'nu ndogop ee'nu,” yugu nogo Niniki kunik minggirak me, Ayuk wuke logonet, neenggi nippege, Koone lengganak nogo ninikime mbininit nage, Eeke minggirak o.

⁴⁹Niniki ambi lunik logokit nduk Wone koonogo pereegindak me, An kayeloman yo'nireegindak nogo aberu o.

⁵⁰Maluk eerogo panugwi me, niniki eyak wappanega ti, Wone koonogo paneegindak ti aret. Wone koonogo pereegindak paga Aa'nduk wonagagirak ndak-ndak eeppanege logogin o.

⁵¹It aap wogoppako menggaarak nen Meek eerogo panegak mban eeko menggaarak kwe, Kat koone Muta nen liiru mbaneegerak nogo An mbo punuk, alik eerit nageelik o.

⁵²Kaliku ALA wae. Eekaatak ndak-ndak eeppiigo logorak koone yugu Itok menggerak nogo an abeke neenok, Niniki mondok kwippanege menggerak o.

⁵³It aap maluk mendek nogo nen kat koone yugu Muta liiru mbaneegerak nogo mbo pereegwaarak kenok, Nanini kani omoonuk kwak mi'nage menggerak o.

⁵⁴An ya agak nda agak nogo yit nage logonet, Koone lengganak nogo aret ndawi pit nage minggirak.

⁵⁵Kaliku ALA wae. Oonikiya paga kendage aberit nage, Koone Muta nen liiru mbaneegerak nogo Porogo logonet eerit nage, Eeke minggirak o.

⁵⁶An eeke minggirak nogo ti, Eeko logorak koone yugu nogo aret.

⁵⁷Kaliku Ala wae. An namendek punik kwak ti, Kaliku ALA keebe aret. “Kat koone yugu ti mban eerit nage logokit o,” Yinuk, nggaruk togon koonogo pateegirak o.

⁵⁸Nabuwa mbake logonok nduk, An niniki abu ambit eeppunuk yokkigirak me, Kat eeppaniyak koonogo pereegindak ndak-ndak Kiniki yanggonak logonet eeppanege logot o.

⁵⁹An eerit nage minggirak nogo liippatinuk, Kat koone aberak logorak yugu ti paga Niyok panggombunuk eerit nage agarik o.

⁶⁰Koone, “Yogop ee'nu ndogop ee'nu,” yugu nogo An elaambirik lek mbet-mbet aret eerit nage logokit, mbake agarik o.

⁶¹Aap maluk mendek nen yilunogo panuwak nduk, Keele pit nogo menggaarak kwe, Koone yugu Muta nen liiru mbaneegerak nogo An kobak eerogo pigin lek o.

⁶²Kat a'me nggelok eeppiigo logorak wone Yereegindak paga, “Wa,” yokkirikit nduk, O nogo iniki mbere eeke paga neenik age minggirak o.

⁶³It aap kat kayuk wukwi, Eeko logorak koone yugu mugurok nogwe, Eeko menggaarak abok aret Ninom niniki kunik minggirak o.

⁶⁴Kaliku ALA wae. Aakumi inabuwa nen Kiniki kunik aganake menggendak nogo ti, O nggween paga yime abok aret ndak warak wonage me, Koone lengganak nogo liirogon mamunnake logot o.

⁶⁵Kaliku ALA wae. Kat koone yugu ndak-ndak An kayeloman obeelom mban eeppanege,

⁶⁶Koone, “Yogop ee'nu ndogop ee'nu,” yugu nogo, Niniki panggombunuk wonage me, niniki warak ariyak inom, Yi wone ndi wone liirogon neenu ariyak inom, an mamunnake, Eeke logot o.

⁶⁷An aaninggin awo noba kwi'naga'lek kagak, Koone mbo punuk nomoninuk nagagirak kwe, yogondak perak, Koone yugu nogo liirogon aret eerit nage agarik o.

⁶⁸Kat obeelom aret wonage, ndi, obeelom mban eeke, Eeke menggendak me, Koone lengganak nogo an mamunnake logot o.

⁶⁹It aap iniki wogoppaka nen Inoone pilit noba lenggenogo panit nugwi kwe, Niniki ambit lombok eeppunuk, Eeko logorak koone yugu nogo porogo logonet, Eerit nage agarik o.

⁷⁰Inamok me inookaatak andi lek menggi kwak, It aap ti, iniki togop aret menggaarak kwe, An perak, koone yugu Muta liiru mbaneegerak nogo An ninikilom minggirak o.

⁷¹Koone lengganak an mamunggolaakit nduk, Aaninggin noba paneegindak nogo ti, Op aret mbake agarik o.

⁷²Mbuti perak inom, mbuti emas inom, ambik lombok me, lingginiyak meek ti, Niniki kundugu lek negen aret kwe, Koone wumbereegindak Muta nen liiru mbaneegerak perak, Niniki kundugu lombok minggirak o.

⁷³Keenggi paga ogobakkigirogo paneegindak me, Neebe op logokit nduk, narum wonage keegak, Koone, “Yogop ee'nu ndogop ee'nu,” yugu nogo Mamunggolaakit nduk, neenu eeppanu o.

⁷⁴Koone yugu nogo mban niniki lunik minggirak me, It aap kayuk wuka nen an eerit nage nogo Neego logomenggaarik, inale'nggen aret nombarugun o.

⁷⁵Kaliku ALA wae. Eekaatak ndak-ndak eeppiige menggendak wone neenu me, Kat liirogon eeppanege logonet, Aaninggin-paaninggin noba paneegindak keege agarik o.

⁷⁶Kayeloman eeppaniyak koonogo yo'nereegindak ndak-ndak Nabuwa nen kiniki kunik mban ee'nake nogo ti, Niniki kwippanega aret logowak o.

⁷⁷Koone Muta liiru mbaneegerak ti, Ninikilom mbake minggirak me, Neenik logokit nduk, nabuwa nen eeppanege logot o.

⁷⁸An eekirak alom ambi lek kagak maluk eeppanugwi me, Iniki wogoppatit nugwi nogo inenggali aruwak o. Ndi, an perak, eeko logorak koone yugu nogo Ninikime mbininit nage logogin o.

⁷⁹It aap inagabiti kombakwi, Aberak logorak koone yugu nogo ineenu wonogwe, Eekwi nogo Yungguninuk neya wogo logowak o.

⁸⁰Koone lengganak nogo eeka'lek neenok, “Iniki mbere nen agan nege,” nombakwi paga An nenggali arukwak, Niniki ambit eeppunuk, eeke logokit o.

⁸¹“At nen nagap ndari woraawak lak, ao,” Mbake logonet, niniki lek-lek ee'nake kwe, Kat koone yugu nogo niniki lunik mban wonage,

⁸²Wone koonogo pereegindak nogo nen Eeppani woraawak nduk, nenegen tit neegak, An nenegen andi ee'nake, “Mandenom niniki eyak wappani woraamunggun?” Yinuk, tokkeege, Eeke agarik o.

⁸³Yiiwak ka'luk nen mili puru eerogo pege menggi kwak, An togop aret eerogo panegerak kwe, Koone lengganak nogo an kobak eerogo pegeelik o.

⁸⁴An kayeloman yi, nagap pu aga'lek kagak, ne mande ari nage, An maluk eeppaniyak nduk mu'neren wogwe yi, Onggo aaninggin inoba piiga'lek keegak, ne mande ari nage, Eerigin o?

⁸⁵Koone yugu Muta liiru mbaneegerak liirogon eekulik iniki wogoppaka nogo nen Neebe yobok togon wambikit nduk, labu pugu kwak eerogo panit nagaarak o.

⁸⁶Koone, “Yogop ee'nu ndogop ee'nu,” yugu abok aret Niniki at paga panggombuurak op me, It aap alom lek kagak maluk eeppanit nugwi me, Kat nen yeenggwa niru o.

⁸⁷It aap ti nen o nggween paga yime nenggaawak Lek eerogo paniyak eereegwaarak kwe, Eeko logorak koone yugu nogo an mbo puulik o.

⁸⁸Nabuwa nen kiniki kunik ee'nake menggendak ndak-ndak An neenik logokit nduk, nili ari keenok, Wone lengganogo wumbereegindak nogo An porogo logonet, eerit nage logogin o.

⁸⁹Kaliku ALA wae. Koone ti, lek arigin lek mondok itok wonage, Mbogut paga mondok nu'lek aret wonage, Eerak menggerak o.

⁹⁰Kat liirogon eeppiinet nage menggendak nogo ti, Aa'nduk ndarak inom, yogondak nda'nogwe inom, Peebi nda'narugun inom, Mondok eeppinanit wundi wage menggendak o. O nggween yi, alom yarogo pereegindak me, Mondok aret wonage menggerak o.

⁹¹Wone lengganogo pereegindak paga Yi mendek ndi mendek ogobakkigiri'nagagerak kayeloman mini negen aret wonogwe me, Lek aga'lek o yogondak wonogwe aret o.

⁹²Koone Muta nen liiru mbaneegerak nogo Ninikilom mbake logonetak lek en, Maluk noba age logonet, neebe lek eerogo paninetak o.

⁹³Eeko logorak koone yugu nogo, Eeke paga nili eerogo panggendak me, Wone ti, an kobak eerogo pigin mondok lek o.

⁹⁴Eeko logorak koone yugu nogo an mugurok nage, An neebe kat kamendek aret kombake, Eeke me, An nagap ndaru o.

⁹⁵It aap maluk mendek nen An lek eerogo paniyak nduk enaarit nugwi iigak kwe, Koone aberak logorak yugu mban aberit nege logogin o.

⁹⁶Yi mendek ndi mendek abu obeelom wonage Mbako menggaarak nogo ti, Abu obeelom lek kagak obeelom aret mbakwi kwe, Koone, “Yogop ee'nu ndogop ee'nu,” yugu nogo perak, Maluk ambi lek abu obeelom wonage kage minggirak o.

⁹⁷Koone yugu Muta nen liiru mbaneegerak nogo Niniki kunik lombok minggirak me, Ninikime mbininit nage neegak, Kubondendok nen nok oonikiya ari nage menggerak o.

⁹⁸Koone, “Yogop ee'nu ndogop ee'nu,” yugu nogo An mondok-mondok ninikime porogo minggirak me, Nawim iniki lek negen iigak, an perak wone ti paga Niniki warak lombok eerogo panege menggerak o.

⁹⁹Koone aberak logorak yugu nogo Niniki mbininit nage minggirak me, Aap mamunnaka yi wone ndi wone alom mbuuluk liippogo menggaarak kwe, an perak, Wone alom abok aret liippege minggirak o.

¹⁰⁰Eeko logorak koone yugu nogo Porogo logonet, eerit nage minggirak me, Aakumi inoweewi yi wone ndi wone mbuuluk negen Ineenu iigak, an perak, iya negen neenu minggirak o.

¹⁰¹Koone liirogon porogo logonet Eerit nage logokit nen maluk eeko menggam nookwak, Niyok awiirak minggirak o.

¹⁰²Eekaatak ndak-ndak eeppiigo logorak koone yugu Kat nen aret mamunnakendak me, An mbo punuk nomoninuk noolik o.

¹⁰³Nggiin amburu ombat abe negen kage kwe, Wone koonogo pereegindak ti perak, Ombat tele lombok kage minggirak o.

¹⁰⁴Eeko logorak koone yugu nogo Liippit unggwage minggirak paga Abe eeriyak lek kagak eerit nugwi nogo An neebi lombok mbake minggirak o.

¹⁰⁵Niyok pit nage neegak ndi wuninogo panega, Nage neegak, tu eya eerogo panega, Nogo ti, kat koone aret o.

¹⁰⁶“A'me nggelok eeko logorak koone yugu nogo An porogo logonet eerit nage logokit o,” yinuk, Kumbuk mbaneegirak me, ndak-ndak eerit nage agarik o.

¹⁰⁷Kaliku ALA wae. Tebenogo panggaarak paga niniki andi ee'nake me, Koone yugu ndak-ndak nale'nggen mbakak nege logokit nen Teeluk eerogo panege,

¹⁰⁸Kaliku ALA wae. Niniki nen kat tiyappagage nogo Kinikilom logonet liippege, Eekaatak ndak-ndak eeppiigo logorak koone yugu nogo Liirogon mamunnege, Eeru o.

¹⁰⁹Kulinik-kalinik nooruwak nduk, Neebe we eraangge teppege logonet kwe, Koone yugu Muta liiru mbaneegerak nogo perak, An kobak eerogo mbo pigin lek o.

¹¹⁰Towe yilunnaruwak nduk, keele pogo mengga kwak, It aap maluk mendek nen an togop eeppanugwi kwe, Eeko logorak koone yugu nogo An mbo punuk nomoninuk nageelik o.

¹¹¹Kat koone aberak logorak yugu nogo nen Nale'nggen eerogo panege menggerak me, Yate kwak an unde logonet, mondok eeke logogin o.

¹¹²Kat koone lengganak nogo ti, “Mondok eerit nage logokit o,” yinuk, Niniki nggaruk togon koonogo pigirak me, Eerit nage neegak kambi noorak kuli aret ari nagin o.

¹¹³It aap iniki mbere wonogwe nogo Neebi lombok inombake minggirak kwe, Koone yugu Muta nen liiru mbaneegerak nogo perak, Niniki kundugu minggirak o.

¹¹⁴Keebe ti, noba'naka nanggeemu kwak aret me, Koone yugu ndak-ndak eeppaniyak Ti mban niniki lunik minggirak o.

¹¹⁵“Nogoba Ala oone, Yogop ee'nu ndogop ee'nu, Yugu nogo porogo logonet eerit nage minggirak me,” Kit aap maluk eeka yi, an wonage me nen mbaganinip o.

¹¹⁶Neenik logokit nduk, wone koonogo pereegindak nogo Ndak-ndak nomaawi eerogo panege, An eeriyak niniki lunik nogo eeka'lek neenok, Nenggali arukwak eerikit nduk, eeppanege, Eeke logot o.

¹¹⁷Nomaawi eerogo panege keenok, nagap ndarak wonage, Koone lengganak nogo an ko'lu-kii'me liippege, Eeke logogin o.

¹¹⁸It koone lengganak mbo punuk, nomoninuk nugwi nogo, Kat mbo piige menggendak o. It aakumi inambokan laganit nugwi ti, We aanom warogo aret agan nugu menggaarak o.

¹¹⁹Aap maluk mendek nggween paga menggaarak abok aret Inambeebuk negen mbo piige menggendak me, Eekaatak ndak-ndak eeppiigo logorak koone yugu nogo Niniki kundugu minggirak o.

¹²⁰Kat keebe paga nagabiti nen naganak wake, Eekaatak ndak-ndak eeppiigo logorak koone yugu nogo paga Nagabiti nen neenggi neyak tikkolage, Eeke minggirak o.

¹²¹An abu obeelom a'me nggelok mban Eerit nage minggirak me, It an tebenogo panegak mban eekwi nogo Ineenggi me paniyak mage o.

¹²²“Nayeloman obeelom eerogo pikit o,” yinuk, Wone abuk nggaruk togon koonogo pege, It iniki wogoppaka nen tebenogo panegak yukwak Non mbanogo piige, Eeke logot o.

¹²³Kat nen an nagap ndari wage, Wone abe liirogon koonogo pereegindak nogo A'me nggelok togon eeppani wage, Eeke logonok nduk, Nenegen tit neegak, An nenegen andi ee'nake agaarik o.

¹²⁴Kat inabuwa nen eeppiige menggendak ndak-ndak An kayeloman eeppanege, Koone lengganak nogo an mamunnake,

¹²⁵Ndi, aberak logorak koone yugu nogo Neenu arikit nduk, kayeloman an yi, Niniki ngget eerogo panege, Eeru o.

¹²⁶Kaliku ALA wae. Koone yugu Muta liiru mbaneegerak nogo Tagambunuk alik eekwi me, Kat eeppiyoorak eyom muk panggoni wagaarak wonage o.

¹²⁷Togop me, mbuti emas inom, Mbuti emas at mendek mban inom, ti, Niniki kundugu negen kwe, “Yogop ee'nu ndogop ee'nu,” koone yugu ti perak, Niniki kundugu lombok wonage,

¹²⁸Ndi, eeko logorak koone yugu ti, Obeelom ndak-ndak aret yo'nege mbake, Eeke me, Wone alik agan nugwi ti, An neebi lombok mbake minggirak o.

¹²⁹Aberak logorak koone yugu ti, iya lombok me, Ninikime woppunuk eerit nage minggirak o.

¹³⁰Koone ari menggendak waganggwi iinok, Inikime eya eerogo piige, It iniki yuundurak nogo ineenu eeppiige, Eeke menggerak o.

¹³¹Koone, “Yogop ee'nu ndogop ee'nu,” Yugu nogo “Konenikit lak, ao,” mbake minggirak me, Niyo abu nen wen-wen aganake menggi kwak, An togop aret ee'nake menggerak o.

¹³²It aap kat keebe iniki kunik eekwi iinok, Inabuwa mbake menggendak kwak, Kena logurogon pe'neenok nabuwa mbake,

¹³³Yi maluk ndi maluk abok aret eeriyak Ee'nake logonet, tebenogo panukwak, Kat eeppaniyak koonogo pereegindak nogome mban Niyok pit nage logokit nduk, nu'lek eeppanege,

¹³⁴Eeko logorak koone yugu nogo woppunuk Eerit nage logokit nduk, It aakumi tebenogo paniyak eekwi me nen Wondet eerogo panege,

¹³⁵An kayeloman kenete eyarogon logonet pe'neege, Koone lengganak nogo mamunnake, Eeke logot o.

¹³⁶Koone yugu Muta liiru mbaneegerak nogo It aakumi woppunuk eeka'lek paga Niyo wu'nuk wage menggi kwak Nale togop aret wambit wage menggerak o.

¹³⁷Kaliku ALA wae. Kat kiniki abe koonak mban menggendak me, Eekaatak ndak-ndak eeppiigo logorak koone yugu ti, Abet mban aret wonage menggerak o.

¹³⁸Aberak logorak koone yugu ti, Eekaatak a'me nggelok eeppiigwi, Niniki ti paga panggombunuk eerit nugwi, Eeko logorak op aret o.

¹³⁹It aap an nawim nen Koone yugu kobak eerogo mbo pugwi iinok, Nanini inombake paga Nomaawi lek eerogo pake minggirak o.

¹⁴⁰Wone koonogo pereegindak nogo, “Abet aret ilik?” yinuk, wakkagak eeke, An kayeloman nen koone ti, niniki kunik eeke, Eeke minggirak o.

¹⁴¹An aap abu tebenak meek mendek aret kwe, Eeko logorak koone yugu nogo perak, An kobak eerogo mbo pegeelik o.

¹⁴²Kat obeelom mban eerit nage menggendak nogo ti, Lek ageelik mondok-mondok aret wonage, Koone yugu Muta nen liiru mbaneegerak nogo ti, Abet aret wonage, Eerak aret menggerak o.

¹⁴³An aaninggin-paaninggin noba kwi'nage, “Nonggop eekkoloobok,” eerogo panege, Eeke kagak kwe, Koone, “Yogop ee'nu ndogop ee'nu,” yugu nogo Ti mban ninikilom mbake minggirak o.

¹⁴⁴Aberak logorak koone yugu nogo ti, Wone abe abu koonak wonage me, Neenik logonet eerit nage logokit nduk, Neenu eeppanege logot o.

¹⁴⁵Kaliku ALA wae. Niniki ambit eeppunuk Noone nggwok paga yokkege neenok, Wone onggo yo'nirimenggendak paga Koone lengganak woppunuk eerit nage,

¹⁴⁶“Nagap ndaru o,” yinuk, Noone nggwok paga yokkege neenok, An nagap ndaremenggendak paga Aberak logorak koone yugu nogo Porogo logonet eerit nage, Eeke logogin o.

¹⁴⁷O kilim nagake kagak neenik a'nuk, “Yeenggwa niru o,” yinuk, noone nggwok paga yokkege, Koone yugu mban niniki lunik wonage,

¹⁴⁸Oonikiya paga aap tum ambi wakak eekwi iigak, An nogo yega'lek neenik logonet, Wone koonogo pereegindak nogo ninikime mbininit nage, Eeke minggirak o.

¹⁴⁹Kaliku ALA wae. Kat nabuwa nen Kiniki kunik ee'nake menggendak me, noone konengge, Eekaatak a'me eeppiigo logorak koone yugu ndak-ndak Aa'nduk nale'nggen paga wonagagi kwak eerogo panege, Eeru o.

¹⁵⁰An maluk eeppaniyak mba'nuk Mu'neren wogwe nogo panggo yi wogwe, Koone Muta liiru mbaneegerak nogo “Nineebi o,” yinuk, tayoppugwi, Eeko menggaarak kwe,

¹⁵¹Kaliku ALA wae. Kat perak, Nimbirak koorok aret wonage me, Koone, “Yogop ee'nu ndogop ee'nu,” yugu ti, Pilit lek abet aret o.

¹⁵²O aa'nduk nen aberak logorak koone yugu nogo Liippege logonet, “Wone ti, mondok-mondok eeko logowak nduk koonogo pereegindak,” An neenu agagirak o.

¹⁵³Kat koone Muta liiru mbaneegerak nogo An kobak eerogo mbo pegeelik me, Eeppanugwi paga niniki andi ee'nake nogo Lek eerogo panege,

¹⁵⁴Nawone amburu mbanogo wondet eerogo panege, Eeppaniyak koonogo pereegindak ndak-ndak Aa'nduk nale'nggen wonagagi kwak eeppanege, Eeru o.

¹⁵⁵It aap maluk mendek nen Koone lengganak, “Konenuwok o,” yinuk, Mugurok nogwe lek iinok, It ambi inagap ndariyak lek aret o.

¹⁵⁶Kaliku ALA wae. Kat mondok iya ninabuwa mbake menggendak me, Eekwi ndak-ndak eeppiigo logorak koone yugu ndak-ndak Aa'nduk nale'nggen wonagagi kwak eerogo panu o.

¹⁵⁷It ninom wim mbanak nen Piyak-payak ee'nabit wogwe ti, Ineebe ambik aret wonogwe kwe, Aberak logorak koone yugu nogo, An nomonogo mbo punuk, negeelik o.

¹⁵⁸It aap koone ineebi mbaka nen Koone yugu porogo logonet eekulik iinok, Nenegen pegiyoorak neebi mbake minggirak o.

¹⁵⁹Kaliku ALA wae. Eeko logorak koone yugu nogo Niniki kunik lombok minggirak yi, pe'neege, Nabuwa nen kiniki kunik ee'nake me, An neebe nili eerogo panege, Eeru o.

¹⁶⁰Koone ari menggendak abok ti, abet aret o. Eekaatak a'me nggelok eeppiigo logorak wone Koonogo pereegindak nogo ti, Lek arigin lek mondok-mondok aret logogin o.

¹⁶¹Eekirak alom ambi lek kagak, It aap inendage warak nen Piyak-payak eerogo panit nugwi iigak, nagabiti mbakeelik kwe, Koone yugu ti perak, nagabiti mbake logonet, Naganak wake minggirak o.

¹⁶²It aakumi inamendek kugun ambik waganggo nagaatik, Inale'nggen mbako mengga kwak, Wone koonogo pereegindak nogo paga Nale'nggen ambik mbake minggirak o.

¹⁶³It aap pilit agan nugwi ti, mondok neebi mbake, Peyak wurik kwak agan nugwi mbake, Eeke minggirak kwe, Koone Muta nen liiru mbaneegerak ti perak, Niniki kundugu lombok minggirak.

¹⁶⁴Aakumi a'me nggelok mban eeppiige menggendak me, O ambit weege paga ne 7 kuli kat tiyappagage minggirak o.

¹⁶⁵Kat koone yugu Muta liiru mbaneegerak It iniki kundugu wonogwe nogo Iniki ugun mondok tayenak menggaarak me, Iniyogobit lik togon yigeebu wambugun lek aret o.

¹⁶⁶Kaliku ALA wae. Nagap ndari woraanok nduk, tokkeege, Koone, “Yogop ee'nu ndogop ee'nu,” yugu nogo Ndak-ndak eerit nage,

¹⁶⁷Aberak logorak koone yugu nogo Niniki kunik lombok minggirak me, Liirogon porogo logonet, eerit nage,

¹⁶⁸An eerit nage minggirak abok ti, kenegen keegak eerit nage minggirak me, Eeko logorak koone yugu inom, Aberak logorak koone yugu inom, Woppunuk liirogon eerit nage, Eeke minggirak o.

¹⁶⁹Kaliku ALA wae. Yeenggwa nirenok nduk, Noone yokkege nogo karuk me ari woraawak o. Ari wage kenok, Koone yugu ndak-ndak an neenu eeppanumunggun o.

¹⁷⁰An nagap ndarenok nduk Nggino yokkege nogo karuk me unggwi woraawak o. Unggwi wage kenok, Eeppaniyak koonogo pereegindak nogo ndak-ndak An nagap ndarumunggun o.

¹⁷¹Koone lengganak nogo kat mamunnake menggendak me, Noone paga kat tiyappagagak mban eeke,

¹⁷²Koone, “Yogop ee'nu ndogop ee'nu,” Yugu nogo ti, abu abe koonak menggerak me, Wone koonogo pereegindak nogo ndawi paga wake, Eeke logogin o.

¹⁷³Eeko logorak koone yugu nogo ti, Mugurok nage logorak miikkolagagirak me, Keenggi nggorek paga yeenggwa nege logot o.

¹⁷⁴Kaliku ALA wae. Kat lombok nen nagap ndari woroorak niniki, “Ao,” mbake, Ndi, koone Muta nen liiru mbaneegerak nogo ti, Ninikilom lombok mbake, Eeke minggirak o.

¹⁷⁵An tiyappagage logokit nen nili eerogo panege, Eekaatak ndak-ndak eeppiigo logorak Koone yugu nogo paga niniki eyak wappanege, Eeru o.

¹⁷⁶Ndomba kobak a'nuk tu nomoninuk nogo mengga kwak, An togop aret ee'nakerak kwe, Koone, “Yogop ee'nu ndogop ee'nu,” yugu nogo An nami ageelik porogo minggirak me, An kayeloman yi, kwaa'nabi mok o.

Read Western Dani Ndawi 119 Bible Online

Ndawi 119 - Western Dani bible

Ndawi 119