Read Western Dani Ndawi 137 Bible Online

Ndawi 137 - Western Dani bible

Ndawi 137

¹Nit niyo Mbaben aa'nggi paga time kwi'na'nuk, O Tiyon nonggop wonage nogo Oba abeppunuk le nggwok yogwe,

²O time eyo ndoolu eno'mbak paga ninanggitat tugunogo pugwi, Eereegurak o.

³Tugunogo punuk wonogwe me, It keele maa'niren nogogwaarak nogo nen, Ndawi tiyanuwok nduk, yo'nirogwe, It piyak-payak ee'ninabit nugwi nogo nen Ndawi ninale'nggen mbariyak mendek waruwok nduk, Inoone omaawi yo'nirogwe, Eeko logonet, “Ndawi o Tiyon wako menggaarak mendek ambi Nit konenuwok nduk, wako logonip o,” Yinuk, yo'nirogogwaarak.

⁴Yo'nirogo mbareegwa, nit mbako logonet, “It aap nggiru menggam o yime wonogo logonet, Aliku ALA endawi nonggoti piyaniyak yo'niraga?” mbareegurak.

⁵Kat Yerutalem yi wae. An nami eerogo pagage neenok, Noone amburu paga nggitat eeke nogo maluk age,

⁶Ndi, kat nami eerogo pagage, kat Yerutalem paga Niniki ale'nggen lombok kombake nogo lek age, Eeke neenok, ndawi ambinom waka'lek namili nalelaan paga nabenak mban wonage, Eeriyak op aret o.

⁷Kaliku ALA wae. O Yerutalem lek eerogo pit wanggwi iigak, It aakumi Erom mendek nen yogo logonet, “O langgu-langgu eerogo pugwi, Langgunogo pit ogowa pugu paga pi wanggwi, Eeko logonip o,” yinuk, Yogogwaarak nogo aberu o.

⁸ O Mbaben Aagalukwe kwak kit o Mbaben mendek yi wae. Kit kunduk lek eerogo pinagarak koonak wonage me, Maluk lombok eeppinaneegutak onggo eeppinagago logonet,

⁹Kinaagalogwe awo ndarak waganogo yugum paga Inanobak yombak inoorogo mbo piigwi nogo nen, “Kayik a!” yinuk, inale'nggen aret kinombako logogun o.