Read Western Dani Ndawi 139 Bible Online

Ndawi 139 - Western Dani bible

Ndawi 139

¹Kaliku ALA wae. Kat liirogon maloppanege, An nobaabut abu keenu age, Eeke menggendak o.

²An kwi'nage, mi'nage, eeke neegak, liippanege, Niniki koonit nage minggirak nogo O nda nen yelok na'neya wage, Eeke menggendak o.

³Yabu eeri wungge, yonggonggola unggwi wage, Eeke nogo kat liippanege, An eerit nage minggirak abok aret keenu wonage,

⁴Kaliku ALA wae. Wone nambe paga awo wumbega'lek neegak, An yuurak nogo kat abok keenu wonage, Eeke menggendak o.

⁵Kat nen nenaagan-nambokan abok aret yengget-wangget eeppaninuk wonage, Kat keenggi omaawi paga nobappaninuk wonage, Eeke menggendak o.

⁶An eeke abok kat keenu menggendak ti, Kiniki me menggendak abu iya lombok me, An nen alom kibinit ungguurak meek aret o.

⁷Aberiniki kimbirak menggendak nogo nen An kwaa'neyokwak, nggeeme na? “At time eebe lek,” mba'nuk, nggeeme mbagani?

⁸An kole mbogut paga lagi naminggirak kwe, Kat time aret wonage, Aakumi kambunuk nogo menggam nogome, “Ninom nogo yege a na o,” yinuk, naminggirak kwe, Kat time aret wonage,

⁹Towe wiganinuk nage menggi kwak, o weerikit nduk, Eya eerit wage nogo paga an kwi'na'nuk wage, Yi kole laut irip me time Ye mbambatinuk logokit nduk, nabuninuk wambi nage, Eeriminggirak kwe,

¹⁰Keebe time wonage mban me, Time nen aret keenggi abe'nggan paga pi'nake, keenggi pi'neren wage, Eerumunggun o.

¹¹Ndi, an nen ari logonet, “O apit nen an neebe kumaarogo panege, O eya nogo yumaak eerogo punuk, an wanggeppaninuk wonage, Eerigin kwa?” yinuk, yiminggirak kwe,

¹²O yumaak age, o eya age, kat togop mbakeelik o. O yumaak wonage ti, o mo pege kwak kage, Ndi, o apit ti, o eya kwak kage, Eerumunggun o.

¹³An neebe nagalo inikime ogobakkigi'nake logonet, Niniki kunogo panege, Neebe yeregerak-peregerak abok aret abu li'luk eerogo panege, Eereegindak o.

¹⁴Neebe mondok iya, “Wi,” yuurak mendek Ogobakkigirogo paneegindak me, “Wa,” yokkege agarik o. Kat eerit nage menggendak ti, Mondok iya lombok an abu neenu aret o.

¹⁵O kumaarak me nen ogobakkigirogo panege, Nggween abu'na kiiniki paga lombok nen Neebe yeregerak-peregerak li'luk eerogo panege, Eeke kagak, Nenggaanggum nabennaga'lek nowak mban kagak kenegen neyoolik lek kenegen neege,

¹⁶Neenggi-niyok awik-owak aago neege, Eereegindak o. An nda'nariyak eyom ne ambiriluk ambi aga'lek kagak “At nda'naremenggerak ne ndogop logogin o,” yinuk, Koonak nogo kambuku paga liiru mbanogo pereegindak o.

¹⁷Ala wae. Kat lombok koongge menggendak nogo ti, Mondok iya lombok wonage, An neenggi lingginiyak meek tit wonage, Eeke me,

¹⁸Neenggi lingginiyak op logonetak en mbini niyo aa'nggi paga wonage nogo ti, Abu mbuuluk aret kaanetak o. Neenik age kenok, nimbirak mban aret wonage kaagin o.

¹⁹Ala wae. Kat nen aakumi maluk mendek Inoorogo piyaanok lak, “Ao,” kombake minggirak o. Kit aap inamiya nengga yi wae. An wonage me nen mbaganit nanip o.

²⁰Kaliku ALA wae. It aap ti, kat abeelik-abeelek eerogo pagagwi, Kinom wim mbanak nen kendage meek eerogo pagagwi, Eeko menggaarak me,

²¹It aap kat ineebi lombok kombarit nugwi nogo an nen neebi inombake, It aap pilak yogo logonet, Maluk eeppagit nugwi nogo inogole inombake, Eeka'lek logorak op a? Meek aret me,

²²it aap ti, neebi lombok inombake, It ninom nawim aret inombake, Eeke minggirak o.

²³Ala wae. Kat nen an liirogon malennake, Niniki mbake keenu age, nabut mbangge, Niniki koonit nage nogo liippanege, Eeru o.

²⁴An maluk eerit noorak ee'nake kero, pe'neege, Ineenik mondok-mondok wonogo menggam tu ti paga wo'neren nage, Eeke logot o.