Read Western Dani Ndawi 14 Bible Online

Ndawi 14 - Western Dani bible

Ndawi 14

¹ It aap yuundurak iniki me nen, “Ala eebe lek aret,” mbako menggaarak. Aakumi ti, ineraambe abu maluk lombok logonet, Ogole warak mendek mban eerit nugu menggaarak. It ambiriluk ambi obeelom eekulik maluk mban aret eeko menggaarak.

²At Aliku ALA mbogut paga nen Aakumi abok aret nggween paga wonogwe yi, Enegen wugiya wage logonet, “It ambi iniki warak a'nuk eerit nugwi, An mu'neren wogwe, Eekwi iyaamun ilik?”

³Mbaketak kwe, lek aret iige menggerak o. It abok aret tu abe paga naga'lek Nomoninuk alik paga nogwe, It abok ndak-ndak ineraambe maluk lombok ogwe, Eeko logonet, It ambi obeelom eeriyak mbakwi, Ambiriluk ambi nen obeelom eeriyak mbake, Eekulik aret iige menggerak.

⁴Aap mbi ne ambit lek eerogo nonggo mengga kwak, Aap maluk eeka nen An napuri inambeme yonggorinabit nugwi, “Kaliku ALA o,” yinuk, yoga'lek we nugwi, Eerit nugwi yi, “Nonggop eeko ogoorik o?” yinuk, liippaka'lek agaarik ya?

⁵Aap iniki abe koonak Ala inenggela'me menggerak kwe, It aap maluk eeko menggaarak time wonogwe nogo, “At nen eeppinanege kero,” yinuk, Iniki mak aago wonogo agaarik o.

⁶Kit maluk eerit nogo monggotak yi, It aap ineenggi lek tebenak mendek nogo Inaru non mbanogo piigo monggotak kwe, Ineebe op logowak nduk, Aliku ALA nen it piirogo menggerak.

⁷It Iterali inagap ndariyak nduk, Puut Tiyon paga nen woraawak lak, ao! At Aliku ALA nen at apuri aa'nduk obeelom wonogogwa kwak, Obaane'me obeelom eerogo piige kenok, at Yakup paga wiganak nen inale'nggen mbakwi, Ndi, it Iterali mendek nen ndawi lubuk yogwe, Eeko logogun o.