Read Western Dani Ndawi 140 Bible Online

Ndawi 140 - Western Dani bible

Ndawi 140

¹Kaliku ALA wae. It maluk eeka ineenggime nen wondet eeppanege, Inanini mbaka nen maluk eeppanugwi iyo, narum wonage, Eeru o.

²It aap ti nogo, Aakumi maluk eeppiyoorak inikime koonogo pugwi, Ko'lu-kii'me wim wone mban mbanit nugwi, Eeko menggaarak o.

³ Waalo aakumi inooka kwak logonet, Inamili irip paga wone agan nugwi, Waalo muuru eyak inooketak kanggo mengga kwak, wone agan nugwi, Eeko menggaarak.

⁴Kaliku ALA wae. It maluk mendek ineenggime arukwak pippanogo wonage, Aap inanini mbaka nen yigeebu wuppaniyak kooneegwaarak nogo Eeppanugwi iyo, narum wonage, Eeke logot o.

⁵It aap iniki wogoppaka nen Nenggaanok nggerok yuwak nduk keele kote pugwi, Towe pigaawak nduk Yum mbiganogo pogo mengga kwak, eerogo pugwi, An tu nege minggim abok aret Ta'na pogo mengga kwak pit nogwe, Eeko menggaarak o.

⁶Kaliku ALA wae. An nen, “Kat nogoba Ala aret,” yinuk, yokkege agarik o. Kaliku ALA wae. “Yeenggwa niru o,” yinuk, nggino yokkege yi, karuk konenu o.

⁷Kaliku Kitok Menggendak ALA wae. Kat nagap ndaka komaawi lombok wonage, Nawim nen nooriyak eekwi me, Nanobak kin age neyo, noba'nake, Eeke menggendak me,

⁸Kaliku ALA wae. It aap maluk mendek nen an eeppaniyak mbakwi nogo, “E,” mbake, It eeppaniyak koonggwi nogo a'me age kenok, wogoppatukwak, “Op aret eeppuwak,” mbake, Eeriyak ti mage o.

⁹It wanggeppaninuk wonogwe inengga tiyanak nugwi nen An maluk eeppaniyak nduk inoone agan nugwi nogo Melak togon it inoba aret kwi'naruwak o.

¹⁰O mayu wage menggi kwak kani kunik inoba wangge, Ineebe kani omoonu'me nogwe, Mbuun ambena lagi woroorak meek nogome inuut ngguluk wanggwi, Eeruwak o.

¹¹Aakumi meek eerogo piiga ti, o nggween yi paga Obeelom logowak nduk, eeppiyoorak mage o. Ata, aaninggin mendek ti nen, “It aap inanini mbaka ti, Inoba kwi'narikit o,” yinuk, muguren nege logowak o.

¹²It aap tebenak wonogwe nogo, At Aliku ALA nen inaana'le mbangge, Aap ineenggi lek nogo inawone liirogon mbangge, Eeke menggerak ti, neenu aret o.

¹³It aap iniki abe nogo nen kendage tiyappugwi, It aap iniki koonak mban wonogwe nogo kat wonage menggenom kinom wonogwe, Eeko logogun abet aret mbake agarik o.