Read Western Dani Ndawi 141 Bible Online

Ndawi 141 - Western Dani bible

Ndawi 141

¹Kaliku ALA wae. Noone nggwok paga yokkege yi, konembunuk, Mbet-mbet aret yeenggwa niri wage, “Yeenggwa niru o,” yinuk, yokkege neenok, noone karuk konengge, Eeru o.

² Obari abe kaga kani kunggwi iinok, Kale'nggen mbake menggen kwak, An tamban eeke nogo ti, karuk konengge, O kiyoma age paga ndomba warogo kani kunggwi iinok, wagangge menggen kwak, Neenggi nippunuk yokkege nogo liippanege, Eerumunggun o.

³Kaliku ALA wae. An nambe liirogon arum wonage, Nambe irip paga agan nege neyo, unde wake, Eeke logot o.

⁴Maluk eeriyak uugwe mbake, It aap maluk eeka nen maluk eerit nugwi nogo ninom a'nuk eerit nage, Iniki nomonuwak nduk, Ineenggi amburu agago lakwi nogo, ninom nengge, Eeke neyo, narum logot o.

⁵It aap iniki abe koonak nen nookwi iinok ti, Nabuwa nen ee'nakwi me, nookwi, It nen aret naruk wakwi iinok ti, Obeelom aruwak nduk amburu eeppiigo mengga kwak Eeppanugwi me, naruk wakwi, Eeruwak o. It eeppanugwi nogo ti, “Neebi,” yigin lek, “Op aret,” yigin kwe, It aap maluk eeka nen eeppaniyak mbakwi iinok perak, “Neebi,” lombok mbake minggirak me, Eeppanugwi iyo, tamban mban eeke minggirak o.

⁶It aakumi nen aap inowak loongga nogo Yugum paga inanep yombak inoorogo piigwi iigak, It nen yogo logonet, “Nggween yigirik-noonom eerogo kabunggo mengga kwak, Nineebe kambunuk nogo menggam ambe paga time Ninowak nggininit naga o,” yinuk, yugun, yagarak nogo abet mban yegerak ineenu arugun o.

⁸Togop kwe, Kaliku Kitok Menggendak ALA wae. Kat mban nengga loolo eeppaganuk wonage, Neebe op logokit nduk, kabu'me ari unggwage, Eekirak me, An kambikit nduk mbo paniyak mage o.

⁹It an nooriyak nduk, keele pegam nggerok ari, It aap maluk eeka nen ta'na kwak pegam nogome nggelok yi nage, Eerukwak, An pippanogo logot o.

¹⁰An ugun kuuri'me nage neegak, Aap maluk mendek nen inageele pakam nogome It aret inenggaanok nggerenggolaawak nduk, eeppiyet o.