Read Western Dani Ndawi 143 Bible Online

Ndawi 143 - Western Dani bible

Ndawi 143

¹Kaliku ALA wae. An nggino yokkege yi, karuk konengge, Yeenggwa nirenok nduk, Noone nggwok paga yokkege yi, liippanege, Kapuri liirogon eeppiige logonet, A'me nggelok mban eeppiige menggendak me, Yeenggwa niri wage, Eeke logot o.

² It aakumi o nggween paga wonogwe inenggela'me Aap ambiriluk ambi iniki abe koonak kat kageelik me, Kayeloman an yi, nowak looniyak mage o.

³It nawim nen mu'neren wogwe, Neebe nggween paga aan mbira eerogo panugwi, It maan kambeegwaarak o apit me wonogwe kwak, An time logokit nduk mbo panugwi, Eekwi me,

⁴An niniki lek-lek ee'nabit unggwage, Nogut nggigik ari logonet nagabelelaan mban wonage, Eeke agarik o.

⁵An togop ee'nake kenok, Aa'nduk lombok eerit wagagindak nogo abeke, Eeke menggendak abok aret niniki koonit nage, Keenggi omaawi paga eereegindak nogo liippege, Eeke agarik o.

⁶Nggween mbuk agaatak kwak An niniki togop aret woongge kenok, Kat koba abeke logonet, Neenggi nippunuk tamban eeke agarik o.

⁷Kaliku ALA wae. “Eeppani woraawak lak, ao,” mban kombake logonet, Niniki mondok lek ee'nabit unggwage me, An yokkege yi, onggo mbet-mbet yo'nege logot ubi! Aakumi mbuun ambena wambi nogo mengga kwak, ee'nabukwak me, Kenete kumaappatinuk logorak mage o.

⁸Ata, an kat koba panggonak minggirak me, Aakumi inabuwa nen kiniki kunik mban eeginake nogo, Ko'lu kubondendok an togop ee'nabi wage keyane! Niniki kat paga lunik wonage me, An eerit noorak tu titik nege,

⁹Kaliku ALA wae. Neebe op logokit nen, kabu'me kumaa'nari unggwagarak wonage me, Nawim nen pi'nakwi iyo, nili eerogo panege,

¹⁰Kat nogoba Ala aret me, Kat eeriyak mbake nogo mamunnake, Kimbirak menggendak abu obeelom Aberiniki nogo nen Tu kobappaga wo'neren nawak nduk, nappi wage, Eeru o.

¹¹Kaliku ALA wae. Kat kendage maluk eerukwak, Eeppaniyak yereegindak nogo ndak-ndak neebe nili ari, Kat a'me nggelok eeke menggendak me, Aaninggin noba panugwi nogo te eerogo panege,

¹²Aakumi inabuwa nen kiniki kunik mban aganake menggendak me, Nawim inoone lek eerogo piige, An kayeloman aret me, it maluk eeppaniyak eekwi nogo Abok aret inenggaawak lek eerogo piige, Eeru o.