Read Western Dani Ndawi 144 Bible Online

Ndawi 144 - Western Dani bible

Ndawi 144

¹Wim namburiyak mamunnake, Nawim ninom perenggoloorak ena koonogo panege, Eeke menggerak nayugum lunik kwak At Aliku ALA aret me, tiyappege agarik o.

²At nen aret nabuwa mba'nuk narum wake, Nayugum pak wurik kwak wonage, Nayugum pak wurogo pereegi kwak wonage, An nagap ndarogo panege, Neebe op logokit nen nanggeemu kwak mulunogo panege, Ndi, yi aakumi ndi aakumi nabu'me piya wage, Eeke menggerak o.

³ Kaliku ALA wae. Aakumi ti, taani me nduk, kat nen liippiige, Aakumi inapuri ti, taamini me nduk, aberinake, Eeke menggendak o?

⁴It aakumi ti, Inambe aagi ne ambit wungge kwak wonogo menggaarak o. Inagalu'mak lek age menggi kwak, Nda'nogogwaarak eyom nogo togop aret lek age menggerak.

⁵Kaliku ALA wae. Kat unde menggendak Mbogut nogo nggaganogo punuk wambi wage, Ka'luk lagit nawak nduk puut-puut mbaangga wambi wage,

⁶Nawim inagabiti nen kole ma'naruwak nduk, O yabok kilanogo nappit wage, Ineebe ma'naruwak nduk, komaale namburogo nappi wage, Eeru o.

⁷Kat mondok tiyanak menggenom logonet, Keenggi nggorek paga pi'nake logomenggendik, Niyo wu'nuk wage logonet yi mendek ndi mendek Tebengge menggi kwak, An togop eeppanugwi nogome nen nili ari, Aap alik mendek inoone pilit mban agan nugwi, “Ndogop eerigin o,” yinuk, ineenggi nippunuk Kumbuk mbanggwi kwe, pilit pugunit nugwi, Eekwi nogo ineenggi me nen nagap ndake, Eeru o.

⁹Ala wae. Kat nen mban It aap inendagembogut ineegin tiyappiige, Kayeloman Ndawut warogo pugwi iyo, ili eerogo pege, Eeke menggendak me, Karuk konenenok nduk, an ndawi ngget mendek tiyangge, Nggitat agale 10 aago paga eeke logonet, Ndawi kanep tenok-mbenok ari, Eerigin o.

¹¹It aap alik mendek inoone pilit mban agan nugwi, “Ndogop eerigin o,” yinuk, ineenggi nippunuk, Kumbuk mbanggwi kwe, pilit pugunit nugwi, Eekwi nogo Ineenggi me nen nili eerogo panege, nagap ndake, Eeru o.

¹²Ti eeke keenok, ninapuri wologwe ti, Yi mendek ndi mendek awi yarak mbilangge nagaatik, Abe nggwok lagangge menggi kwak wonogwe, Ndi, ninapurilogwe komologwe ti, Aap endagembogut awi o nggwok abe wurik Eyak yinik paga enete abe kaawak nduk, Ayo waganogo pugu kwak wonogwe, Eerugun o.

¹³Yi mendek ndi mendek anggen mbanak pogo monggom yagabit age, Ninaanggumi kambin-ndomba inagari'ngga nanet nugu menggam nogome Inaagalogwe ndaganabit nogo logonet, seribu ndaganakwi, Ti'nuk, sepuluh ribu ndaganakwi, eerit nogwe,

¹⁴Ninaanggumi lembu-tapi inabila nggween paga nikkenok nugu nagaatik, Aambiranogo piiga'lek obeelom mban ndaganakwi, Eeko logogun o. Ndi, ninawim nen ninawi paga kwi'nari unggwogwe, Ninookwi iinok, le yogwe nogo konenggwi, Eeka'lek Ninale'nggen paga mban wonogo logogun o.

¹⁵It aakumi ti, ti ndak-ndak Obeelom mban wonogo menggaarak kenok Inale'nggen aret mbakwi, “Ninogoba Ala ti, Aliku ALA aret o,” Mbakwi nogo kunduk inale'nggen aret mbakwi, Eeko logowak o.