Read Western Dani Ndawi 145 Bible Online

Ndawi 145 - Western Dani bible

Ndawi 145

¹Kendagembogut nogoba Ala yi wae. An nen kat tiyappagage, Kendage mondok-mondok tiyappagit nage,

²Ko'lu-kii'me, “Wa,” mban yokkege, Mondok-mondok kendage wogoppagit nage, Eeke logogin o.

³Kaliku ALA nggwok lombok menggendak me, Kalut eeko logorak ti, op aret o. Kendage mondok nggwok lombok wonage ti, Aakumi nen liippuurak meek aret o.

⁴Kat eeke menggendak nogo It aa'nduk ndarak nen peebi nda'narugun nogo yorogwe, Iya tit eerit nage menggendak nogo mbininogo yorogwe,

⁵Kat tiyanak kobaanggi-kobaangge li'luk eerak keenok, Aakumi nen, “Wi,” yogwe nogo yorogwe, Eekwi iigak, Eerubok mendek eeke menggendak nogo ninikime koonit nage,

⁶Komaawi paga inamineeri ne agan noorak mendek Eereegindak nogo it yorogwe iigak, Kendage nggwok wonage nogo mbininogo yoranet nage, Eeke logogin o.

⁷Kat alik negen obeelom wonage logonet, Eeppiinet nagagindak nogo aberogo yoranet nogwe, A'me nggelok eeke menggendak nogo paga inale'nggen nen keekok agan nogwe, Eeko logogun o.

⁸At Aliku ALA ti, Aakumi inabuwa mbaka, Inabuwa nen iniki yanggonak paga eeppiiga, Anini mbet-mbet wungga'lek iniki yanggoppunuk wonaga, Aakumi iniki kunik nggwok lombok aganaka, Aret menggerak o.

⁹Aliku ALA ti, aakumi abok aret obeelom eeppiige, At nen ogobakkigirogo piyareegerak nogo Abok aret inabuwa mbake, Eeke menggerak o.

¹⁰Kaliku ALA wae. Yi mendek ndi mendek ogobakkigirogo piyareegindak nogo Abok aret kat mban, “Wa,” yokkugwi, Kapuri leenogo piyareegindak nogo nen kalut eekwi, Eeko logogun o.

¹¹Kat mondok iya lombok eeke menggendak inom, Kabu'me piige menggenom mondok iya tiyanak kenok “Wi,” ugwi nogo inom, Aakumi abok aret ineenu aruwak nduk, Kabu'me piige menggenom tiyanak wonage nogo yorogwe, Komaawi lombok menggendak nogo mbininogo yorogwe, Eeko logogun o.

¹³Kat kabu'me piige menggenom ti, o maan nen lek ageelik mondok aret wonage, Wone lengganogo yorage menggendak ti, lek arigin lek At ambi oba agak eerit wundi wage, Eeke logogin o. Kaliku ALA nen wone koonogo yoraga'ndak Abok aret liirogon eeppiinet nage, Kat eeke menggendak abok aret Aakumi inabuwa mba'nuk eeppiinet nage, Eeke menggendak o.

¹⁴Kaliku ALA nen Aap abok aret yigeebu wanggwi iinok piginaka, Inuut wutik wonogwe iinok, pilanogo piiga, Aret menggendak o.

¹⁵Inigen warak abok aret kat inigen wokkakwi iinok, Inambi noorak eyom paga inambi wogorage,

¹⁶Yi mendek ndi mendek ineenik wonogwe abok aret It uugwe mbakwi nawak nduk kalo logonogo wogorage, Eeke menggendak o.

¹⁷Aliku ALA eerit nage menggerak abok aret A'me nggelok mban eerit nage, At eeke menggerak abok aret ti, Aakumi inabuwa mba'nuk eeppiinet nage, Eeke menggerak.

¹⁸It aakumi nen Aliku ALA yogwi, Iniki ambit eeppunuk inoone nggwok paga yogwi, Eekwi iinok, At mbo piigeelik yeenggwaarage menggerak o.

¹⁹It aap at ayuk wuko menggaarak iniki mbakwi nogo Ndak-ndak aret eeppiige, Inoone nggwok paga, “Yeenggwa niret o,” yogwi iinok, At aruk konembunuk inagap ndake,

²⁰It aakumi abok nen Aliku ALA iniki kunik eekwi iinok enegen wogonake, Eeke menggerak kwe, Aap maluk mendek perak, abok aret lek eerogo piyaagin o.

²¹Togop aret me, an nen, “Aliku ALA abu tiyanak o,” yinuk, ari logogin o. Yi mendek ndi mendek inamiya warak abok aret At endage abu abe alik leenak nogo mondok-mondok tiyappogo logowak o.