Read Western Dani Ndawi 146 Bible Online

Ndawi 146 - Western Dani bible

Ndawi 146

¹At Aliku ALA tiyappogo logowok o. Niniki yi wae. Aliku ALA tiyappege logot o.

²An neenik wonage logonet, Aliku ALA tiyappege, An kangga'lek awo wonage logonet, nogoba Ala konenuwak nen ndawi paga anep pege, Eerigin o.

³Aap kanggo menggaarak ti, kambunuk inogoma nggigik togon nogwe iinok, Inagabolo iyokan nggween aret ari nogwe iigak, Ne ti eyom paga aret it eeriyak koonemenggaarak nogo Lek aret arigin me, It nagawan-nagawan nen kinagap ndakkinaburak meek Kanggo menggaarak mendek iigak, It paga kiniki panggombunuk logorak mage o.

⁵“Yakup ogoba Ala nen yeenggwa niraawak o,” yogwi, Inogoba Aliku ALA iniki lunik wonogwe, Eeko menggaarak nogo Inale'nggen aret wonogo menggaarak.

⁶ Mbogut inom, nggween inom, niyo kole laut inom, Yi niyo ndi niyo inikime menggaarak abok inom, Ogobakkigirogo piyareegerak inogoba Aliku Ala aret o. Aliku ALA yorage nagaatik, Li'lak mondok-mondok eeppiinet wundi wage,

⁷Aap tebenak wonogwe nogo at nen aret inawone mbanogo piige, Mbi abu wonogwe nogo inambi wogorage, Aliku ALA nen aap keele maarak wonogwe nogo wondet eerogo piige,

⁸Aliku ALA nen aap inigen mbuk kenok, Inigen obeelom eerogo piige, Aliku ALA nen aap inuut wandunik wonogwe nogo inuut pilanogo piige, Aliku ALA nen aap iniki abe koonak kenok, Iniki kunik aganake,

⁹Aliku ALA nen aap nggiru iinok unde wogonake, Elege moono inom, kumi nanu inom, yeenggwaarage, Eeke menggerak kwe, Aap maluk mendek perak, it eeriyak koonggwi nogo yale-pale eerogo piige menggerak o.

¹⁰Aliku ALA ti, Endagembogut mondok-mondok aret wonage, Kat kota Tiyon yi wae. Kat kogoba Ala nogo, O aa'nduk nen nok, peebi kuli mondok-mondok wone lengganogo yokkege, Eeke logogin o. Aliku ALA tiyappogo logowok o.