Read Western Dani Ndawi 148 Bible Online

Ndawi 148 - Western Dani bible

Ndawi 148

¹Aliku ALA tiyappogo logowok o. Kit mbogut paga monggotak nen Aliku ALA tiyappogo logonip o. Kit o abu tiyanak menggim wonogwe nen at tiyappugwi,

²Kit Ala ayonggo nugu monggotak abok yi, at tiyappugwi, Kit at awuri wim eeka mbogut paga mendek abok aret yi, at tiyappugwi,

³Kit oonegen tut yi, at tiyappugwi, Kit eya eeka laaluguragan yi, at tiyappugwi,

⁴Kit mbogut ta'mban-mban eerak irimbaga monggotak yi, at tiyappugwi, Niyo mbogut irimbaga yi, at tiyappugwi, Eeko logonip o.

⁵Aliku ALA nen, “Aruwak o,” yinuk, Oone ari kagak ogobakkigi'narit nogo mbareegup, Kinobaane'me lombok logobagip nduk, pinagit nage, Ambime agak nugwi kiyo, Wone mondok-mondok lengganogo yokkirage, Eereegerak me, Kit abok aret Aliku ALA endage tiyappogo logonip o.

⁷Kit nggween paga monggotak nen At Aliku ALA tiyappogo logonip o. Kit yi waalo ndi waalo yo'nggok niyo kole laut inikime monggotak inom, Kit niyo kole laut kinaloboguk warak abok aret inom,

⁸O yabok inom, mayu anggen inom, Ndugu-ndugu inom, iyaagi inom, at Ala nen yokkirage kenok eeka o wiya nabuninuk naga inom,

⁹Puut tiyanak inom, puut teberogon inom, Eyo anggen yi'nage menggerak inom, Eyo nggabina abok inom,

¹⁰Eyonggaame mendek inigen mbolokwi inom, Oome mendek inigen waanggo inom, Yi mendek ndi mendek nggween paga tu agan nega inom, Towe wiga agan nega inom,

¹¹Aap inendagembogut o nggween paga wonogwe inom, Aakumi inanebunu lombok abok aret inom, Aap nagawan-nagawan inom, Nggween paga wone lengganogo yoraga abok inom,

¹²Wologwe tawe komologwe tawe inom, Aap inanggok inom, elege-aabologwe inom, Kit abok aret Aliku ALA tiyappogo logonip o.

¹³At mban endage tiyanak lombok wonage, At endage abu tiyanak, “Wi!” ugwi nogo ti, O nggween inom, mbogut inom, abu'me kagak Irimbaga lombok tiyanak wonage, Eeke menggerak me, Kit abok aret Aliku ALA endage tiyappogo logonip o.

¹⁴Aakumi at apuri ake leenogo piyareegerak iniki kunik Iterali abok aret at endage tiyappugwi nogo, Inarum logowak nduk, pak wurik kwak, Aap ambi endage abu tiyanak lombok mippereegerak me, Aliku ALA endage tiyappogo logowak o. At Aliku ALA tiyappogo logowok o.