Read Western Dani Ndawi 16 Bible Online

Ndawi 16 - Western Dani bible

Ndawi 16

¹Ala wae. Neebe op logokit nduk, Kabu'me unggwi nage me, narum logot o.

²An nen Kaliku ALA yokkege logonet, “Kat nogoba aret me, An abe mendek porogo minggirak nogo ti, Yi mendek ndi mendek lek o. Kat keebe mban aret porogo minggirak o,” Yinuk, yokkigirak o.

³It kapuri alik leenak nggween yi paga wonogwe nogo It mban tiyanak mondok iya wonogwe, It eekwi paga nale'nggen alik negen eeppanugwi, Eeko agaarik o.

⁴Kat keegak kugi mugurok nogwe paga iniki andi eerogo pako menggaarak me, Inagugi aanggo warogo amiya mburunogo nunggwi me, An ninom nengge, Nambe paga nen inagugi inendage kungge, Eekeelik o.

⁵Kaliku ALA wae. Yate kwak mogonogo wo'nege, Togolowa'na amburu abe toolak kwak eeppanege, Eeke menggendak kat aret. An ee'naburak nogo abok aret Kat mban koongge menggendak.

⁶Yate kwak mogonogo wo'nege logonet, Wakkagak paga wakkaanuk wo'negendak nogo ti, Abe mban aret wo'negendak o. Abet aret abe mban wo'negendak me, nale'nggen ambik mbake agarik o.

⁷Kaliku ALA nen naruk wake menggendak me, An nen kendage tiyappagage, Oonikiya kunduk niniki nen koonogo mamunggolage, Eeke minggirak.

⁸ Kaliku ALA mondok-mondok Nenggaawak paga punuk nege minggirak. Kat Ala an nimbirak wonage menggendak me, An mondok nu'lek aret minggirak o.

⁹ Togop me, An niniki ale'nggen mbake, Noone paga kalut eeke, Eeke agarik o. An kanggo menggam naakit nduk mbo panege, Kaput Kikak Nakeelik Alik Leenak nogo kunduk, kambunuk pili age kagak teppege, Eerumunggun lek me, An kambigin kenok, neebe obeelom aret logogin o.

¹¹An neenik logokit nduk, “Tu yi,” yo'nege, Kat kenggaanom paga nale'nggen nggwok lombok kaakit nduk, eeppanege, Ndi, kat keenggi abe paga wonage neegak, mondok-mondok nale'nggen mbariyak mendek eeppanege, Eeke logomunggun o.