Read Western Dani Ndawi 18 Bible Online

Ndawi 18 - Western Dani bible

Ndawi 18

¹ Kaliku ALA wae. Nomaawi eerogo panege menggendak kat aret me, An niniki kunik eekkake agarik o.

²At Aliku ALA ti, an nayugum kwak, Nayugum pak wurogo pereegi kwak, An nagap ndaka, aret menggerak o. At nogoba Ala ti, Aakumi nen an nookwi iyo, Yugum lunik kwak abu'me pani unggwage, Nggeemu pogom mulunogo panit nege, Omaawi paga nagap ndarogo panege, Yugum pak wurogo pereegi kwak eerogo panit nege, Eeke menggerak o.

³Nawim nen nookwi iyo, “Yeenggwa niru o,” Yinuk, noone omaawi paga Aliku ALA yoge neenok, Nagap ndarogo panege menggerak me, At endage tiyanak aret logowak o.

⁴Kanggwi ageele paga pirik-perek eerogo panege, Niyo wu'nuk nage logonet, Mu kale'ngga wonok nage menggi kwak An togop aret ee'nake,

⁵Kambunuk nogo menggam ageele paga an maarogo panege, Kanggwi ti, keele pugu kwak me, Nenggaanok nggerok yi wage,

⁶Eeppanit wage paga aaninggin noba wonage logonet, Aliku ALA noone nggwok paga yoge, “Nogoba Ala yeenggwa niru o,” yinuk, yoge, Eekirak paga, At awi wurik me logonet noone konengge, Le ari logonet, nggino yogirak nogo aruk konengge, Eekerak o.

⁷Aliku ALA anini mi'nage mbaki, O nggween yi nogo, nuk-nuk eeke logonet ndipuk eeke, Puut-puut nogo, alom na'ndo-wa'ndo eeke, Eekerak o.

⁸At ogobak me nen ka'luk wungge, Ambeme nen kani omoonuk yenan-menan agan wungge, Eebe paga nen kani kunik kwindagala eeke, Eeke logonet,

⁹Mbogut oolo nggagambunuk wambi wage, Ndugwi yumaak enggela'me iyok wuppi wa'nuk wage,

¹⁰Malayikat kwak kerub nen piyaninuk nage, Towe wiga agan nage menggi kwak, O wiya nen wigak togon at wonok nage,

¹¹O apit ti, at eebe nobaarogo pake, Awooliya negen yengget-wangget eerogo pake, O woraakit nduk, ki wandu aago enggela'me wonage,

¹²Enaame eya ndelenak-welenak aago logonet, Ndugwi kilanogo wumbit wage, Mayu anggen wambit wage, O kimbik pindanogo nappit nage,

¹³Aliku ALA mbogut paga nen oone ngguurubu kwak ari, At Tiyanak Lombok nen oone eerogo nappit nage,

¹⁴Awim mbaganit nawak nduk, omaale namburogo nappege, Ineebe ma'naruwak nduk o kimbik nggwok kilanogo nappege, Eekerak o.

¹⁵Aliku ALA nen aakumi mberirage, Anini aagi ogobak me nen wundi wage, Eeke kenok, Yi nggwok laut abena aluk-puut kin eeppege, Ndi, o yi, alom yarak kin eeppege, Eekerak o.

¹⁶At tiyarogon logonet, eenggi pi'nabi wambi wage, Niyo alobok ambik nen ndonggonnaburak eeke me, Pilanogo nippani wage, Eekerak o.

¹⁷Nawim inomaawi ambik me, ineenggime nen ndinnake, It ineebi nombakwi nogo, An nen tebenogo piyoorak meek me, At nen tebenogo piinok nagap ndake,

¹⁸Aaninggin-paaninggin eerak wonage neegak, Nooruwok nduk eekwi me, Aliku ALA omaawi eerogo panege nagaarik,

¹⁹O nggwok obeelom me, pani nage, Eekerak nogo ti, An at iniki kunik aret me, nagap ndakerak o.

²⁰An obeelom mban eeke neenok, Aliku ALA nen ndak-ndak obeelom eeppanege, An maluk eeka'lek wonage neenok, Onggo maluk eeppanega'lek wonage, Eekerak o.

²¹Nogoba Ala mbo punuk maluk eerit naga'lek, Aliku ALA eerit nage mban mugurok nage,

²²Eeko logorak wone yereegerak nogo, mondok liippege, Wone lengganogo yo'niragagerak nogo, Nomonogo mbo pega'lek mondok porogo wonage, Eerit nage logonet,

²³An maluk eeka'lek neyaawak nduk eeke, An maluk eerit nookwak, narum wakkolage, Eeke minggirak me,

²⁴An obeelom eeke minggirak ndak-ndak At Aliku ALA onggo eeppanege, An maluk eeka'lek neegerak ndak-ndak, Onggo maluk eeppanega'lek wonage, Eekerak o.

²⁵Kaliku ALA wae. Wone yoragaatak nogo li'lak eekwi iinok, Kat nen yoraga'ndak nogo li'lak eerogo piige, “Maluk eekotak,” yorookwak, liirogon eekwi iinok, “Maluk eekendak,” yokkirukwak, liippunuk eeppiige,

²⁶It iniki kikak naka'lek wonogwe iinok, Kiniki kikak naka'lek keyaawak nduk eeppiige, It wi-wi aganakwi iinok perak, Kat nen melak togon wi-wi aganake,

²⁷Iniki tebeppakwi iinok, kat nen inagap ndake kwe, Iniki wogoppakwi iinok perak, Iniki tebeppatuwak nduk, kenegen wogoren nage, Eeke menggendak me,

²⁸Kaliku ALA wae. Nandi wuninik logowak nduk eerogo panege, An o apit paga wonage neenok, Kat nogoba Ala nen eya eerogo panege,

²⁹Yeenggwa nege keegak, Aap awuri ambi aago ninom nagabiti lek namburi nage, Kat nogoba Ala nimbirak me, Pak wurik obaga mbo wungge, Eeriyak op aret o.

³⁰Kat nogoba Ala perak, Eerit nage menggendak nogo ti, abu abe mban aret o. Kaliku ALA koone ti, Pilit lek abet mban ari menggendak o. Ineebe op logorak kabu'me wonogwe iinok, Keebe nggeemu kwak nobappiirogo menggendak o.

³¹Kaliku ALA wonage keegak, Ala alik ambi ta wonage o? Yugum nu'lek menggi kwak, Kat ninogoba Ala aret wonage keegak, Alik ambi wonage mbakop? Lek aret me,

³²Kat Ala nen aret nomaawi eerogo panege, An obeelom mban eerit nage logokit nduk, Naru koonogo panege,

³³ Rusa iyok nggilik-nggelok pit nege menggi kwak, An niyok togop aret eeppanege, Puut kirin paga mi'ndak logokit nduk, Nomaawi eerogo panege,

³⁴Wim op nambuke logokit nduk, yigin woorak mamunnege, Neegin linggira kwak, mbuti tembaga paga wurik kagak kwe, Neenggi yomok togon miirikit nduk eeppanege,

³⁵Nagap ndarak logokit nduk kanggeemu wo'nege, Keenggi abe'nggan paga panggonneren nage, Nendage nggwok aruwak nduk mippani wambi wage,

³⁶Nandelen koguk yukwak, naru nggwok yarogo panege, Eeke menggendak o.

³⁷Nawim muguren nage logonet, tebenogo piinet nage, Ineebe pup eerogo piiga'lek kenok, Niyokan waga'lek inoorit nage,

³⁸Ineebe aan lebenogo piigirak ti, An niyok pugu me wambit nagaarak me, It ambi nen mi'naga'lek aret wonagaarak o.

³⁹Nawim ninom namburiyak nduk, kat komaawi eerogo panege, Ninom ogoorak nogo nabu'me tebe yi woraawak nduk eeppiige,

⁴⁰Ineebi nombakwi nogo, Inamborowak kin-kin mbaganuwak nduk eeppiige, Eekendak paga, Ineebe abu lek eerogo piigirak o.

⁴¹Inoone nggwok paga, “Ninagap ndari woraanip o,” Yagaarak kwe, inagap ndari wogwe, “Kaliku ALA o,” yokkegaarak kwe, Karuk konembunuk, onggo yorage, Eerulik o.

⁴²Wun o wiya nen Wonok nage menggi kwak eerogo piige, Purok tu paga wonage nogo Aap iniyok amok mbanogo pogo mengga kwak, Ineebe togop aret eerogo piinet nage, Eekirak o.

⁴³Aakumi nen an nooriyak wogwe me nagap ndake, Yi aakumi ndi aakumi inowe logorak unde eeppanege, Eeke keegak, Aakumi neenggo'lek mendek nabu'me ari wogwe,

⁴⁴Awo yorage neegak, konembunuk aret eekwi, It aap nggiru nogo, Inagabolo nirik-kirik agan neya wogwe,

⁴⁵Noone ari paga inomanggen tayok ari logonet, Inaganak wakak inawi pak wurik kagak kole wundi wogwe, Eeko menggaarak o.

⁴⁶Kaliku ALA mondok keenik menggendak o. Kat nayugum kwak me, kalut eeke, Kat nagap ndaka Ala aret me, kendage mondok tiyappege, Eeke agarik o.

⁴⁷It an nookwi nogo onggo inooke, It aakumi inanebunu lombok nabu'me piya wage,

⁴⁸Nawim ineenggime nen nagap ndarogo panege, Ineebi nombakwi nogo tebenogo piinok tiyappanege, It inogogun ambik ineenggime nen nagap ndake, Eekendak kat nogoba Ala aret o.

⁴⁹ Togop me, Kaliku nogoba ALA wa. Yi aakumi ndi aakumi inenggela'me logonet kalut eeke, Ndawi kanep pege logonet kendage tiyappagage, Eeke logogin o.

⁵⁰Nendagembogut mippaneegindak nogo Neegin tiyak yuwak nduk eeppanege, Amburu eerogo mippaneegindak nogo An Ndawut inom, napuri-nombowologwe inom, Ninabuwa nen eeppinanit wundi wage tit logomunggun o.