Read Western Dani Ndawi 2 Bible Online

Ndawi 2 - Western Dani bible

Ndawi 2

¹ It yi aakumi ndi aakumi nanini-kanini agan nogo logonet, Maluk eerogo piinet nugwi, Aap inanebunu lombok we aanom warogo wone kote koonit nugwi, Eekwi ti, Nonggop nduk eeko agaarik o?

²At Aliku ALA tebenogo pugwi, At Amburu Eerogo Mippereegerak nogo maluk eeppugwi, Eeruwok nduk, Aap inendagembogut yi o ndi o nen pipuk eekwi, Aakumi inoweewi nagawan-nagawan kuwak eeppunuk, Wone koonogo pugwi, Eekwi nogo ti, Nonggop nduk eeko agaarik o?

³“Nineenggi mbuti keele kwak maappinanegaarak nogo mbanogo pugwi, Niniyok keele negen yilunogo pinanggaarak nogo piinogo pakwi, Eeruwok o,” Yinuk, yogwe kwe,

⁴At wone lengganogo yorage menggim mbogut paga nen inagi'ndok kangge, Ala nen it miyuk-meya eerogo piige,

⁵At anini nen mberirage, Eeke nagaarik, Inogut nggigik yuwak nduk, etenggen aagi paga yorage logonet,

⁶“At endagembogut logorak leenogo pigirak nogo Nabuut leenak Tiyon nogo paga mippigirak o,” Yinuk, yegerak o.

⁷ An nendagembogut nogo nen Aliku ALA wone lengganeegerak nogo yokkira o. “At nen an yo'nege logonet, Yogondak kat an naput age, Ndi, an kat kogoba age, Eekoorak o.

⁸Togop me, an yo'nege keenok, Yate kwak yi aakumi ndi aakumi unde logonok nduk, wokkege, Kamendek kwak o irip-irip time unde eeppagage, Eerigin me,

⁹ Mbim obate mbanak eenggime logonet, oone omaawi paga wone lengganogo yorage, Yi mendek ndi mendek nggabok paga ogobakkigirik telenogo pogo mengga kwak eerogo piige, Eerumunggun o,” Yinuk, yo'nereegerak o.

¹⁰Togop aret me, Kit kinendagembogut yi wae! Kiniki warak a'nuk eekwi, Kit yi o ndi o unde nagawan-nagawan yi wae! Wone kurumbi yokkirogwe nogo liippugwi, Eeko logonip o.

¹¹Aliku ALA ayuk wuko logonet amugurok nogwe, Kinaganak wake logonet, kinale'nggen yogwe, Eeko logonip o.

¹²At Aput anini mbet-mbet mi'nage menggerak me, Kit eerit nogwe kiigak, Anini nen lek eerogo pinagukwak, At iyok paga pirik-perek yi wogo logonip o. Yi aap ndi aap at abu'me wonogwe nogo, Inale'nggen aret mbako menggaarak o.