Read Western Dani Ndawi 20 Bible Online

Ndawi 20 - Western Dani bible

Ndawi 20

¹“Nonggop eeri?” yinuk, Kiniki piirik wonage logonet, Aliku ALA yoge keenok, At nen wone onggo yokkege, At Yakup ogoba Ala endage kungge keenok mulunogo pagage, Eeruwak o.

²At nen yeenggwa kiruwak nduk, Awi wurik alik leenak menggim nen nappiya wage, Puut Tiyon paga nen panggonggabi wage, Eeruwak o.

³Kat nen at ake warogo wogoge nogo abok aret abeke, Ake warogo kani kungge ti, inikilom komba'nuk wagangge, Eeruwak o.

⁴Kat eeriyak mbake nogo ndak-ndak eeppagage, “An yogop eerikit o,” mba'nuk, Koonogo pemenggendak nogo a'me aret nggelok ari, Eeruwak o.

⁵Kat keegin tiyak ari kenok, Niniki ale'nggen nen keekok yogwe, “Ninogoba Ala eegin tiyak yigi o,” yinuk, Ndiimbu walok eeko mengga kwak eekwi, Eerugun me, “Aliku ALA nen eeppanuwak lak, ao,” yinuk, Yoge menggendak nogo abok aret ndak-ndak eeppagawak o.

⁶At Aliku ALA nogo nen Amburu eerogo mippereegerak nogo agap ndake, Ndi, nggino yoge kenok, At leenogo pateegim mbogut paga nen onggo yoge, At eenggi abe'nggan omaawi paga agap ndake, Eeke menggerak neenu agi o.

⁷It ando inanggweendo paga iniki panggombugwi, It ando inaguda paga iniki panggombugwi, Eeko menggaarak kwe, Nit perak, niniki Aliku ninogoba Ala oba panggonak ogoorik o.

⁸It ti, inengga wandinik ninabu'me tebenak wonogwe kwe, Nit perak, ninengga pilanak mondok mi'ndak nu'lek wonogo ogoorik o.

⁹Kaliku ALA wae. Aap endagembogut yi, agap ndake, Ninoone nggwok paga yokkugwi niinok, onggo yo'nirage, Eeru o.