Read Western Dani Ndawi 21 Bible Online

Ndawi 21 - Western Dani bible

Ndawi 21

¹Kaliku ALA wae. Kat komaawi lombok wonage keenok, Aap endagembogut yi, ale'nggen mbake, At eegin tiyappegendak me, ale'nggen alik negen kombake, Eeke agarik o.

²At iniki uugwe mbakerak nogo aret eeppege, At nggino yokkegerak nogo mbo puulik ndak-ndak aret eeppege, Eekendak o.

³Kat nen yi mendek ndi mendek Kalo logonogo wogoge logonet, eebe wagangge, Mbuti emas at mendek paga mban Nggare-nggare negen mendaarak At anobak paga yirippege,

⁴“Neenik logorak eeppanu o,” Yinuk, yokkege kenok eeppege, “Neenik nggorek mondok-mondok logokit nduk, Eeppanu o,” yinuk, nggino yokkege kenok eeppege, Eekendak o.

⁵At eegin tiyappege nagandak paga endage mondok tiyak ari agaarik o. Ayuk warak lombok kogwe, Aakumi nen, “Wi!” yogwe, Eeko logowak nduk, mondok iya lombok eeppege, Eeke nagandak o.

⁶Aap endagembogut yi, Iniki Kaliku ALA koba panggonak wonage me, Mondok-mondok ale'nggen oba pege, Kat kenggaanom paga iniki ale'nggen mban kage logowak nduk eeppege, Eekendak o. Ndi, kat Mondok Tiyanak Menggendak nogo nen Kiniki kunik eeppit wagandak nogo Lek aga'lek kundugu aret wonage me, iniki nu'lek aret agaarik o.

⁸Kinom wim mbanak abok aret Keenggi omaawi paga tebenogo piinet nage, It aap kat ineebi kombakwi nogo Keenggi abe paga pigogo piinet nage,

⁹Ndi, keebe kin ari wage logonet, Kani kunggo menggam omoonuk wunuk ari menggi kwak Ineebe togop aret eerogo piige, Kani nen yi mendek ndi mendek nenet nage menggi kwak Kaliku ALA kanini nen ineebe lek eerogo piige, Keebe paga kani wunuk togon wungge logonet, ineebe nenet nage,

¹⁰It paga wiganak o nggween paga wonogwe nogo lek eerogo piige, It aakumi inapuri inenggela'me inombowologwe nogo Inenggaawak lek eerogo piige, Eerumunggun o.

¹¹Inamborowak kin-kin mbaganuwak nduk, kat nen komaale mba'mbak irage keenok, Aaninggin koba pagawak nduk wone mbanogo pugwi, Kat maluk eeppagi woroorak koonogo pugwi, Eeremenggaarak kwe, Mbeyok yigin o.

¹³Togop me, Kaliku ALA wae. Kat komaawi ambik menggendak me, Kendage tiyanak aret logowak o. Kat komaawi ambik me, nit ndawi wako logonet, Kat kalut eeko logogun o.