Read Western Dani Ndawi 22 Bible Online

Ndawi 22 - Western Dani bible

Ndawi 22

¹ Nogoba Ala o. Nogoba Ala o. Kat nonggop nduk teppanege, Nonggop nduk yeenggwa nega'lek keebe nda wonage, Niniki andi logonet, noone yokkege kwe, Nonggop nduk konengga'lek keebe nda lombok wonage, Eeke agandik?

²Nogoba Ala o. O liingge paga wone yokkigitak kwe, onggo yo'nega'lek wonage, Ndi, oonikiya kunduk tamban eekitak kwe, Niniki kwi'naga'lek tit wonage, Eeke agarik o.

³Kat Kikak Nakeelik Alik Leenak wonage, It Iterali mendek kalut eekwi enggela'me wonage, Eeke menggendak o.

⁴Nit ninombomini iniki kat koba panggombugwi, Panggombugwi iinok, wondet eerogo piige,

⁵Inoone nggwok paga yokkugwi iinok, inagap ndarogo piige, Eeke nagagindak. Ndi, iniki koba panggonak wonogwe iinok, Inenggali ogo logolik mban.

⁶Togop kwe, an perak, Aakumi abok nen miyuk-meya eerogo panugwi, It abok aret nen, “Ogole o,” yinuk, yo'nugwi, Eekwi me, An abe aap lek o. Puron kwak aret wonage kagi o.

⁷ It inigen wonggonogo an mban pe'neego logonet, Nagi'ndok kanggwi, “Aap yi, we kabot o,” yinuk, meek eerogo panugwi,

⁸ “At iniki Aliku ALA oba panggonak wonage me, Aliku ALA nen aret ili ari, Ndi, at iniki kunik wonage kenok, Agap ndarogo pege, Eeruwak o,” yinuk, yogwe, Eeko agaarik o.

⁹Togop eekwi kwe, an nagalo inikime nen wumbani wage, Nagalo elak awo nengge logonet, Koba panggombagakit nduk eeppanege, Eereegindak o.

¹⁰An nda'nagagirak eyom nen nok, yogondak kuli kat aret ndegennake, Nagalo inikime wonage neegak kunduk, Kat nogoba Ala aret wonage, Eeke menggendak me,

¹¹Noba aaninggin ariyak abu panggoni wage, Ndi, yeenggwa niriyak ambi lek aret wonage, Eeke kagak, An mbo paninuk nda logorak mage o.

¹²Lembu ngguunok kwak Ninom wim mbanak apit nen wangge'nakwi, Tapi ngguunok inigen mbolokwi O Mbatan mendek kwak nen wanggeppaninuk wonogwe,

¹³Singa anini warak nen kok eerogo nappiigak At noorak mbaketak nengge menggi kwak It nogo nen inambeme yonggo'nabuwak nduk, inambe a aago wonogwe, Eeko agaarik o.

¹⁴Niyo kiluk ari logonet lek age menggi kwak An nomaawi lek age, Nowak woro-woro nage, Tu'ngga amburu nggalo agan wangge menggi kwak, Niniki aan ndu agan wangge,

¹⁵Niyoowak woloonak telo agan nage menggi kwak, Nomaawi lek ee'nabit unggwage, Namili piyanogo nalelaan paga nabeni lagangge, Togop eeke kagak Aakumi kanggaatak inowak paga mbo panege agandik o.

¹⁶Yi nggeewo ndi nggeewo ineyak nde agan wangge'nakwi, Aap a'nggan wogonaka nen wanggeppaninuk wonogwe, Neenggi-niyok pulu warogo panugwi, Eekaarak me,

¹⁷Nowak kin eerogo panegerak Neenggi lingginiyak op me, Aakumi inigen lo'nugwi, inigen pippak nugwi,

¹⁸ Nambogoyum abok aret tumbukkologwe, Nayum yirik minggirak kolaawok nduk, iri'ngga mbanogo wakkaanuk kologwe, Eeko agaarik o.

¹⁹Togop me, Kaliku ALA wae. Kat perak, keebe ndaanda logogun o. Nomaawi eeppanega yi wae. Mbet-mbet yeenggwa niri omok o.

²⁰It inawooluwak paga nooriyak eekwi yi, Ineenggime nen nagap ndake, Neenik logorak ti, iya lombok me, Nggeewo eenggi paga nggerembunuk menggi kwak Eeppanugwi me, neebe ndinnake,

²¹Singa ambeme nggerenak kwak wonage me, ndinogo panege, Tapi ngguunok eyak kwak polonogo panggerak wonage me, nggiginogo panege, Eeru o.

²² Kendage wiganogo noreewi wonogwe me yoranet nage, Kapuri kuwak aago inenggela'me kendage tiyappege, Eerigin o.

²³At aap tebenogo pegaarak yagan wake nogo At Aliku ALA nen pekkoorak eebi ombake, “Ogole o,” yinuk, mbo pege, etenggen nobakkolage, Eekeelik, Oone nggwok paga, “Yeenggwa niru o,” Yoge kenok, aruk konengge menggerak me, Aliku ALA kinagabiti mbakwi yi, at tiyappugwi, Kit Yakup paga wiganak yi, at alut eekwi, Kit Iterali paga wiganak yi, at ayuk wukwi, Eeko logonip o.

²⁵Kat Ala eeke paga kapuri nggwok kuwak eerak inenggela'me nen kendage alut eeke, “An yogop eeke logogin o,” yinuk, Wone kumbuk mbaneegirak nogo, Inagabiti kombakwi inenggaanom paga ndak-ndak eeke, Eerigin o.

²⁶Aap ineenggi lek nogo inambi ndonggorogon nunggwi, It Kaliku ALA mukkeren nogo menggaarak nogo It aap ti mendek mondok-mondok aret logogun me, kalut eekwi, Eeko logogun o.

²⁷Kaliku ALA yi o ndi o unde wonage, Yi aakumi ndi aakumi abok aret Wone lengganogo yorage, Eeke menggendak me, It aakumi o irip-irip menggaarak nogo Kaliku ALA koba abeppunuk, Melak togon kowagam wogwe, Yi aakumi ndi aakumi inanebunu lombok kat kabu'me tebe yi wa'nuk kayuk wukwi, Eeko logogun o.

²⁹It aap ineenggi warak o nggween paga wonogwe yi, Abok aret inambi ndonggorogon nenok kalut eekwi, It aakumi kambak mendek inom, It ineenik ambinom logorak meek mendek inom, Abok aret kabu'me tebe yi unggwogwe, Eeko logogun o.

³⁰It aakumi wigannarit wundi wogo logogun nogo nen Kalut eeko logonet kake eekwi, It peebi nda'narit wundi wogo logogun nogo nen Kat nogoba Ala kabok yogwe nogo konenggwi, Eeko logomenggaarik,

³¹“Wone ti, at abu aret eekerak me, at Ala abu obeelom mban eeke menggerak o,” Yinuk, it aakumi awo nda'naga'lek peebi nda'narugun nogo yorogo logogun o.