Read Western Dani Ndawi 24 Bible Online

Ndawi 24 - Western Dani bible

Ndawi 24

¹ At Aliku ALA nen Niyo yenggenak abena kagak, Nggween ogumbaga ndoonogo pege, Niyo nage irimbaga nu'lek eerogo pege, Eereegerak me, Nggween inom, yi mendek ndi mendek nggween paga wonage abok aret inom, Aliku ALA unde wonage. O nggween yi inom, yi aakumi ndi aakumi nggween paga wonogwe abok aret inom, At mban unde wonage, Eeke menggerak o.

³Aap ta nen Aliku ALA abuut paga lagi nage, Ta nen o abe alik leenak menggim mi'nari nage, Eeriyak op mbakop?

⁴ Lek o. Aap ineenggi paga maluk eekwi, Iniki maluk koonggwi, Ala kagak obaane'me kugi eekwi, “Kumbuk mbanggi o,” yinuk, pilit yogwe, Eekulik kenok, Aap ti mendek o time mi'nari noorak op aret o.

⁵It aap ti, Aliku ALA nen ale'nggen inoba piige, It inagap ndaka inogoba Ala nen, “Aap yi maluk eerulik o,” yinuk, yorage, Eerigin o.

⁶Aap ti ndak-ndak ndarak nen Ala mugurok nogwe, Aap ti mendek Yakup ogoba Ala enete kaawok nduk, kwaarit nogwe, Eeko menggaarak o.

⁷At Endagembogut abu tiyanak wonage nogo Unggwi woraawak nduk, Kit tungga yi, kinambe wigak togon paakkologwe, Kit tu kinitok monggotak yi, pilak togon laganggwi, Eeko logonip o.

⁸At Endagembogut tiyanak lombok wonage ti ta o? Lek o! At mondok omaawi, iya tit eeke, At inom wim perenggolage logonet, mondok yigirogo piige, Eeke menggerak Aliku ALA nogo aret o.

⁹At Endagembogut abu tiyanak wonage nogo Unggwi woraawak nduk, Kit tungga yi, kinambe wigak togon paakkologwe, Kit tu kinitok monggotak yi, pilak togon laganggwi, Eeko logonip o.

¹⁰At Endagembogut abu tiyanak wonage ti ta o? Lek o. At Endagembogut abu tiyanak wonage ti, At Mondok Omaawi Menggerak Aliku ALA aret o.