Read Western Dani Ndawi 31 Bible Online

Ndawi 31 - Western Dani bible

Ndawi 31

¹Kaliku ALA wae. An neebe op logokit nduk, Kabu'me ari unggwagarak wonage me, nenggali arukwak teppanege mage o. Kat abu liirogon abe mban eeke menggendak me, An nagap ndarogo panu o.

²An yokkege neenok, karuk liirogon nggoongge, Mbet-mbet aret yeenggwa niri wage, Puut lunik abu'me mengga kwak An neebe op logorak togop aret eerogo panege, An nagap ndarak logokit nduk, Yugum pak wurogo pereegi pogom eerogo panege, Eeru o.

³An nayugum kwak, yugum pak wurogo pereegi kwak, Kat keebe aret o. Kat kendage abe menggendak me, tu ni'neege, pi'neren nage, Eeru o.

⁴Neebe op logorak keebe aret me, Towe pigaawok nduk yum tugunogo pogo mengga kwak, Time nggelok yi nage neyo, Tu nomonogo nappanege logot o.

⁵ Kaliku ALA yaga'ndak nogo Ndak-ndak aret eeke menggendak me, Kat nen aret wondet eerogo panenok nduk, Niniki kat unde logonok nduk, wokkigi o.

⁶Kugi nen ambi eeppiyoorak lek We aanom warogo kagak eeko menggaarak aap ti, “Neebi,” inombake minggirak o. Niniki Kaliku ALA koba panggonak aret agarik o.

⁷Kat nen andi-pandi eerogo panugwi nogo neege, Ee'nakwi paga yagan wake nogo liippanege, Eekendak me, An niniki ale'nggen mbake, Kiniki kunik ee'nake kenok, Nale'nggen nen ndawi wake, Eerigin o.

⁸Kat nen neebe waganogo Ninom wim mbanak ineenggime panulik O tini nggwok obeelom me niyok yarogo panegendak o.

⁹Kaliku ALA wae. An aaninggin lombok noba kwi'nagaarak paga Nale ari logonet, nenegen andi eerogo pake, Neebe-niniki mondok andi negen ee'nabit unggwage, Eeke me, Nabuwa mbake logot o.

¹⁰Niniki wakko'net unggwage logonet, Neebe kambuurak aret ee'nake, “Yi ee'nabit unggwage, ao,” mbake neegak, Neenik logorak eyom aret lek ari nage, Maluk eekirak paga nomaawi lek ee'nabit unggwage, Nowa'na nenet unggwage, Eeke agaarik o.

¹¹An ee'nakwi paga nawim nen meek eerogo panugwi, An neenok ninom minggirak nen nogole yogwe, Noreewi ninom kunik kunduk, inogut nage, Ndi, tu paga nage me, inigen neenok kole mbaganggwi,

¹²Aakumi kanggwi iinok, inoba aberak lek mengga kwak, An noba abe'naka'lek kobak eerogo panugwi, Niyoowak yigirik mbo pugwi kwak, An togop aret mbo panugwi, Eeko agaarik o.

¹³It aakumi ambik nen nabok agan nugwi, Nenaagan-nambokan eerit nugwi paga naganak waruwak nduk, agan nugwi, Maluk eeppanuwok nduk, Iniki ambit eeppunuk, wone mbanggwi, Nooruwak nduk wone koonogo pugwi, Eeko agaarik o.

¹⁴Togop aret kwe, Kaliku ALA wae. An perak, niniki koba panggombege, “An nogoba ti, Ala aret o,” yinuk, ari, Eeke agarik o.

¹⁵An ee'naburak koonak nogo ti, Kat keenggime wonage agaarik o. Nawim ineenggime nen ndinnake, It mu'neren wogwe nogo mugogo nappiige, Eeru o.

¹⁶Kat kenggaawak abinak wonage ti, An kayeloman neebe paga eya eerogo panege, Kiniki kunik lombok ee'nake menggendak me, nagap ndake, Eeru o.

¹⁷Kaliku ALA wae. Noone nggwok paga yokkege me, An nenggali arukwak mbo paniyak mage o. Aap maluk eeka perak, inenggali ogwe, Kambunuk nogo menggam nanuk inabolok lek wonogwe, Eeruwak nduk, eeppiyet o.

¹⁸It aap ti, iniki wogoppakwi, Aap abe kagak, “Abe lek o,” yinuk, meek eerogo piigwi, Eerit nugu logonet, We ugun pilit-pilit agan nugwi nogo inoone lek eerogo piyet o.

¹⁹Kat mondok obeelom logonet, It aap kayuk wukwi inake pipuk eerogo piige, Aakumi inigen iigak, Ineebe op logowok nduk kowagam nogwe nogo eeppiige, Eeke menggendak nogo ti, Mondok iya nggwok lombok eeppiige menggendak o.

²⁰Aap maluk eeko menggaarak nen eeppiyoorak kote koonit nugwi nogo eeppiyookwak, It ineebe op logowak nduk, kenggaawak paga piige, Aakumi inoone agan nugwi paga inom yawi pukwak, Kat wonage menggenom kumaappiige, Eeke menggendak o.

²¹An pi'nabuwok nduk, O kota pak wurik punggagak eekwi iinok, Nagabiti mbake logonet, “Kat aret kenegen wo'nake mbake kwe, Mbo panege keegi o,” yinuk, yokkege, Le ari logonet, “Nabuwa nen yeenggwa niru o,” yinuk, yokkege, Eekirak nogo konembunuk, Mondok iya tit kiniki kunik eeginabit wundi wage nogo An aret eeppanegendak me, Kaliku ALA kalut eeke agarik o.

²³Togop me, Ala apuri ake leenak monggotak yi wae. At Aliku ALA kiniki kunik eeko logonip o. It aap at oone li'luk eeka nogo At Aliku ALA enegen wogonake menggerak kwe, It iniki wogoppatit nugwi iinok perak, Eekaatak abu ndak-ndak onggo eeppiige menggerak o.

²⁴Togop me, “Aliku ALA nen eeppinanuwak lak, ao,” yinuk, Kiniki lunik wonogwe kit aap abok yi wae. Kinomaawi eekkologwe, Kiniki nu'lek eeppatinuk wonogwe, Eeko logonip o.