Read Western Dani Ndawi 32 Bible Online

Ndawi 32 - Western Dani bible

Ndawi 32

¹ It aap wone yugu taganggwi iinok ti, Maluk aret me, inomaluk ti mari eerogo piige, “Kinomaluk lek o,” yinuk, taborogo piige, Eeginabeegerak nogo Inale'nggen mbako logowak o.

²It aap inomaluk mbo pereegwaarak nogo Aliku ALA nen eenggi lingginggeelik kenok, Iniki mbere lek ambit eeppunuk wonogwe iige kenok, Inale'nggen aret mbako logowak o.

³“Maluk ti neebi o,” yinuk, mbo pega'lek, “Nela nen kumaappatinuk wonagarak me,” yinuk, O kubondendok nen nok kiyoma kuli niniki koonit nage neegak, Nowa'na nenet unggwage nagaarak o.

⁴Liingge-kii'me keenggi noba tebembaninuk wonage paga Mo andi nen inomaawi lek eerogo piige menggi kwak Nomaawi lek eerogo panegerak o.

⁵Togop aret ee'nakerak me Maluk eekirak nogo yokkege, Nomaluk kiraappunuk wonaga'lek kin paga pege, “An nen Kaliku ALA koone tagambunuk, Maluk eekirak nogo paganogo yokkirikit o,” Yinuk, paganogo yokkege, Eeke mbaki, Kat nen nomaluk lek eerogo panggendak o.

⁶Togop me, nit yokkugwi niinok, Ninoone koneniyak nanonggwan wonage me, It aakumi kat koone liippugwi nogo Abok aret kat yokkogo logowak o. Togop eekwi iinok, Niyo nggwok wuketak wik agan lagi wage logonet, It lebeninabigin lek o.

⁷An kumaa'nage minggim kat keebe aret o. Aaninggin noba age kero, kat unde wo'nake, “Ala nen kagap ndakerak o,” yinuk, Neebe yendok-wandok ndawi warit nogo logowak nduk, Eerogo piige, Eeke logomunggun o.

⁸Aliku ALA nen ari logonet, “An wone mamunggake, tu noorak titikkege, Wone karuk wake, nenegen wokkake, Eeke logogin o,” Yinuk, yegerak me,

⁹Kuda ilik, kuda kwak bagal a, Iniki lek me, “Mok,” yoragaatak kwe, Inowagam wogwe lek kenok, Inanobak keele maarogo piinok, Mbutigeele inambeme mambiinok, Wogoren nogo mengga kwak eeriyak mage o.

¹⁰It aap maluk eeko menggaarak nogo ti, Andi-pandi inoba ari wagak mban eeke menggerak kwe, Aliku ALA oba panggombunuk wonogwe iinok perak, At nen iniki kunik aganabit nage menggerak o.

¹¹Togop me, aap kiniki abe mendek yi wae. Aliku ALA nen eekkinake paga Ale'nggen mbako logonet, keekok yogwe, Kit abok kiniki abu koonak monggotak yi wae. Kiniki ale'nggen nen ndawi lubuk yogwe, Eeko logonip o.