Read Western Dani Ndawi 33 Bible Online

Ndawi 33 - Western Dani bible

Ndawi 33

¹Kit aap kiniki abe monggotak yi wae. It aap iniki koonak nen At alut eeko logorak op me, Aliku ALA eekkinake paga Kinale'nggen nen ndawi wako logonip o.

²Wako logonet, nggitat paga Aliku ALA tiyappugwi, Aruk konenuwak nduk, nggitat agale 10 aago paga eekwi iigak ndawi wakwi,

³Ale'nggen kaawak nen ndawi iyaalok pugu nogo wakwi, Kinoone amburu paga nggitat eeko logonet, kinale'nggen nen keekok piyanggogwe, Eeko logonip o.

⁴At Aliku ALA nen ari menggerak wone ti, Pilit lek yegetak ndak-ndak eeke menggerak o. At yi eekak ndi eekak eeke menggerak ti, A'me liirogon aret eeke menggerak.

⁵It aap abe mban eekwi, wone yugu li'lak eekwi, Eeko menggaarak nogo ti, Aliku ALA nen inikilom mbake menggerak me, At iniki kunik eeginabit nage menggerak nogo ti, O nggween paga yime abok aret Mondok ndak warak wonage o.

⁶At Aliku ALA oone ari kagak, Mbogut-nggween aret age, At ambe aagi wungge kagak, Laaluguragan ninggirogo piinet nage,

⁷Yi nggwok yenggenak laut nogo Togolowa'na negen yenggenogo pege, Ndi, laut nogo yenggenak logowak nduk, O'luwam nggween nenaarogo punuk, yenggenogo pege, Eereegerak o.

⁸Aliku ALA oone ari kagak, abok aret age, “Yogop a'nip o,” ari kagak, Abok aret nu'lek arit wage, Eereegerak me, It nggween paga yime wonogwe abok aret At Aliku ALA inagabiti mbakwi, Yi aakumi ndi aakumi yi o ndi o wonogwe nogo Abok aret at ayuk wukwi, Eeko logowak o.

¹⁰Yi aakumi ndi aakumi eeriyak koonogo pegaatak nogo At nen lek eerogo pege, It aakumi inanebunu lombok nen, “Ndogop eeruwok,” mbakwi nogo At nen non mbanogo piige, Eeke menggerak kwe,

¹¹Aliku ALA nen eeriyak koonggetak nogo perak, Mondok-mondok nu'lek wonage me, Eeppiyoorak iniki koonogo pegetak nogo Eeppiinet wage kagak nda'narit wundi wogo menggaarak.

¹²It aakumi inanebunu ambi nen, “Aliku ALA ti, nit ninogoba Ala aret o,” yinuk, yogwe, “Neyate kwak logowak o,” yinuk, Aap anebunu ambi at leenogo pateegerak wonogwe, Eekwi nogo Inale'nggen aret mbako logowak o.

¹³Aliku ALA mbogut paga nen enegen wugiya wage, It aap nggween paga mendek abok aret enegen iige,

¹⁴At wonage menggim wonage logonet, aakumi nggween paga wonogwe abok aret liippiige, Eeke menggerak o.

¹⁵It abok aret iniki ena koonogo piige, Inalitak lombok eeko menggaarak nogo liippiige, Eeke menggerak.

¹⁶Aap endagembogut ambi nen Awuri apit aago paga agap ndakkolage, Aap yigin unde ambi nen At wakaa'ngget paga ili eekko'nok mbagangge, Eekulik o.

¹⁷“Ninaguda wonage me, nineegin tiyak yigin o,” yinuk, Inaguda paga iniki panggombunuk wonogwe ti, we aanom warogo aret mbako menggaarak. Kuda nogo ti, inomaawi ambik aret kwe, ti paga inagap ndakkoloorak meek o.

¹⁸Togop aret kwe, It aap Aliku ALA inagabiti mbakwi nogo Iniki kunik mban eeginake menggerak me, “Nit kunduk iniki kunik ee'nabigin o,” yinuk, Iniki at paga lunik wonogwe ti, It kanggwi iyo, inagap ndake, Mbi noogelo wonogwe kwe, Ineebe op logowak nduk eeppiige, Eerikit nduk, Aliku ALA nen enegen wogonake menggerak o.

²⁰At Aliku ALA nen aret yeenggwa nirage, Nit ninanggeemu kwak wonage, Eeke menggerak me, Niniki at paga lunik logonet tokkogwe,

²¹Ndi, at endage abu abe alik leenak wonage me, Nit at oba panggombunuk ninale'nggen aret mbakwi, Eeko ogoorik o.

²²Kaliku ALA wae. Nit kat paga mban niniki lunik wonogwe me, It kiniki kunik mban eeginabit wundi wage menggendak nogo kwak, nit togon togop aret ee'ninake logot o.