Read Western Dani Ndawi 36 Bible Online

Ndawi 36 - Western Dani bible

Ndawi 36

¹ It maluk eeka nen maluk eerit nugwi nogo o. Ninikime lombok menggerak nogo Ambi yuurak mbakirak me, mbininogo yi o. It aap maluk eeka nogo ti, Ala inagabiti mbakwi ambi mondok lek aret o.

²It nen, “Nit aap abu iya o,” yinuk, Wogoppatit nugu menggaarak me, Eerit nogo logonet, “Yi maluk aret eeke kagi,” mbakwi, “Maluk eeke minggirak neebi o,” yinuk, mbo pugwi, Eekulik aret o.

³Inambeme nen wungge nogo ti, Abe lek maluk mban aret wungge, Ndi, inoone agan nugwi ti, Pilit wone mban agan nugwi, Eeko menggaarak. Iniki warak nen eekwi, Obeelom ambi eeriyak mbakwi, Eekulik aret o.

⁴It nogo yogo menggam logonet kunduk Maluk eeriyak mban koonggwi, It eerit nugwi nogo ti, Obeelom lek maluk mban aret eerit nugwi, Maluk eeriyak eerinake nogo Mbo puurak mbaka'lek aret eekwi, Eeko menggaarak o.

⁵Kaliku ALA wae. Aakumi kiniki kunik eeginake menggendak ti, Mbogut paga kuli aret wonage, Eeppiyoorak mbake'ndak li'lak eeke menggendak ti, Ndugwi paga kuli aret wonage, Eeke menggerak.

⁶Kat abu obeelom mban menggendak ti, Puut-puut abu tiyanak kwak wonage, Eekaatak a'me nggelok eeppiige menggendak ti, Yi nggwok yenggenak laut alobok ambik kwak wonage, Eeke menggerak. Aakumi inom, wam inanebunu abok aret inom, Kaliku ALA nen ndegeninake menggendak o.

⁷Aakumi kiniki kunik eeginake menggendak nogo ti, Abu iya lombok wonage me, Inendage warak inom, warak lek inom, abok aret Towe aagalogwe a'naabit abu'me piinok menggi kwak, Ineebe op logowok nduk, Kat kabu'me unggunuk wonogo menggaarak o.

⁸Kat kame yi mendek ndi mendek abe mban wonage me, It ndonggorogon nawak nduk wogorage, Kaniyo mili eneeri wungge menggenom kinikilom mbake nogo it nawak nduk toologo wogorage, Eeke menggendak o.

⁹Ineenik aganaka alom kat aret o. Kat o eya kwak menggendak me, Pekkeegwi niinok, eya ee'ninake menggendak o.

¹⁰It kinom kunik nogo kiniki kunik eeginake, Iniki abe koonak nogo obeelom mban eeppiige, Eeke logot o.

¹¹It aap iniki wogoppatit nugu menggaarak nen Iniyok aan lebenogo panugwi, It aap maluk eeka nen Ineenggi omaawi paga an mugogo wumbanugwi, Eeriyak mage o.

¹²Aakumi maluk eeko menggaarak nogo Nggween paga ngginnagaarak yi kenegen pegiyet o. It mbo nappiigaarak wonogwe me, Pilak togon mi'nariyak meek aret o.