Read Western Dani Ndawi 37 Bible Online

Ndawi 37 - Western Dani bible

Ndawi 37

¹Mbaa'mbuk ndoonak tebat arit nage, Iri'ngga-kale'ngga mbet-mbet mbuk age, Eeke menggi kwak, Aap maluk eeka ti, togop aret aganake menggerak me, It maluk eerit nugwi paga kinanini age, It wone taganogo punuk eekwi ti, “An eerikit lak it mban eekwi yi ao!” Yinuk, kineebi inombakwi, Eerugup o.

³Kiniki Aliku ALA oba panggombunuk obeelom mban eekwi, Ndomba inikilom paga iri'ngga mili nenet nugwi kwak, Kit togop aret o nggween yi paga wonogo logonet, Abe wone mban mugurok nogwe,

⁴Aliku ALA eeppinagage paga kinale'nggen mbakwi, Eekwi kiinok, Kit kiniki uugwe mbakwi nogo, At nen eeppinagage kaamunggup o.

⁵Kit eeriyak koonggwi nogo Abok aret waganogo Aliku ALA wogogwi, Kiniki at paga panggombunuk wonogwe, Eekwi kiinok, At nen eeppinagage kaamunggup o.

⁶O ket yanggo aago weege menggi kwak, kit abe mban eekwi kin eeppinagage, O liingge teretak eerogo pege menggi kwak, Kinawone mbanogo punuk, “Kit maluk eerulik abe o,” yinuk, yokkirage, Eeke logogin o.

⁷Togop aret me, Aakumi nen eekkoloorak mbakwi nogo aret eekkologwe, Ndi, aap inambokan laganiyak koombunuk, Inambokan aret laganggwi, Eekwi iinok, Kinanini age ti mage o. Ata, kiniki aan aganggenggwi lek puk aret wonage, “Aliku ALA nen eeppinanigin o,” yinuk, tokkogwe, Eeko logonip o.

⁸It aap maluk eeka inenggaawak lek ogwe, “Aliku ALA nen mban eeke kaawok o,” yinuk, at tokkogwe nogo o yi yate kwak unde ogwe, Eerugun me, Kit kinanini age nogo mbo pugwi, Kiniki aagi mi'nage nogo teppugwi, Eeko logonip o. Kinanini ti paga maluk aret eeriyak me, Kinanini mbako logorak ti mage o.

¹⁰It aap maluk eeko menggaarak nogo ti, Inenggaawak lek ariyak abu panggonak wonage me, It wonogo menggam kwaarinabit namonggotak kwe, Ineebe wonogwe lek aret iyaamunggup o.

¹¹ Togop eerugun kwe, It aap iniki tebenak menggaarak nogo perak, Nggween yi, yate kwak aret kolaagun me, Obeelom eeppiige kagak, iniki ugun logonet, Inale'nggen alik negen mbako logogun o.

¹²It aap maluk mendek nen it iniki abe koonak nogo Maluk eeppiyoorak wone koonogo pugwi, Inanini inombako logonet, ineyak nggilik maakwi, Eeko menggaarak kwe,

¹³At Aliku ALA nen Aap maluk eeka inenggaawak lek ariyak eyom abu panggoni wage at eenu wonage me, Inagi'ndok kangge menggerak o.

¹⁴It aap aaninggin inoba wonogwe inom, ineenggi lek menggaarak nogo inom, tebenogo piigwi, It iniki koonak nogo inoorogo piigwi, Eeruwok nduk, It aap maluk eeka nen Inawooluwak nggiginogo waganggwi, It ineegin agale wukwi, Eeko menggaarak kwe,

¹⁵It inawooluwak paga nen Yungguk togon it aret wakkologwe, Ndi, ineegin nogo kalenogo pakwi, Eerugun o.

¹⁶It maluk mendek inomaawi lek aremenggerak kwe, It aap iniki abe koonak nogo Aliku ALA nen panggombiige menggerak me, Aap maluk mendek inageerok ambik aret wonage kwe, Ti iya lek o. It aap iniki abe koonak nogo inamendek mbuuluk aret kwe, Abu iya aret wonage o.

¹⁸It aap maluk inoba lenggenggulik nogo “Ne ndi paga eeppiyoorak,” abok aret Aliku ALA eenu menggerak me, Ineyate kwak wogoroorak nogo ti, Mondok-mondok aret logogin o.

¹⁹Aaninggin mendek inoba ari wage kenok, inenggali ogwe, Mbi noogelo aremenggerak kwe, Inambi lek age, Eerigin lek Ndonggorogon aret nonggo logogun o.

²⁰It aap maluk eeka perak, inenggaawak lek ogwe, Aliku ALA awim ti, Yabume iri'ngga-kale'ngga abe kwit agan lagangge nagaatik, Mbuk age menggi kwak, it togop aret lek ogwe, Ka'luk lek age menggi kwak ineebe lek ogwe, Eerugun o.

²¹It aap maluk mendek nen, “Kamendek luulu waganggi o,” yorogo nagaatik, Iyokan wogorogolik mbo pugwi, Ndi, it aap iniki abe koonak nen perak, Inabuwa nen iniki ndoobu paga wogorogwe, Eeko menggaarak o.

²²It aap Aliku ALA ale'nggen inoba piige nogo O yi, yate negen unde eekkolaagun kwe, It aap pulunogo piige nogo perak, Inenggaawak lek aret arugun o.

²³It tu nogo logorak Aliku ALA nen koonogo piige, Ndi, it eerit nogo logorak nogo at inikilom mbake, Eeke menggerak o.

²⁴It iniyogobit liniraagin kwe, Aliku ALA panggoniren nege me, Yigeebu wambugun lek o.

²⁵An aa'nduk neebe tawe wonagagirak nen nok, yogondak abu nanggok ari wagarak me, It iniki abe koonak nogo munogo piigetak nugwi, Inombowologwe nen inambe nggino yoranet nugwi, Eekwi ambi an iige logolik aret o.

²⁶Iniki abe koonak ti, iniki ndoobu logonet, Inawu luulu wogorogwe nogo, “Oba lunogo wo'niroorak o,” yoraga'lek, “We aret porogo logonip o,” yinuk, yorogwe Iige minggirak me, inombowologwe paga Aakumi obeelom eeppiiga aret arugun o.

²⁷Kit maluk eekwi nogo mbo punuk, Obeelom mban eeko logonip o. Ti eekwi kiinok, O yime mondok-mondok aret logomunggup o.

²⁸At Aliku ALA nen Aap a'me nggelok eeka nogo iniki kunik eeginake, Aap at oone liirogon eerit nugwi nogo Mbo piinok mbaganigin lek inom wonage, Eeke logogin o, Togop me, at mondok-mondok inaani aret ndegeninabit wundi wage logogin kwe, It aap maluk eeka inombowologwe kenok perak, Inenggaawak lek eerogo piige logogin o.

²⁹It aap iniki abe koonak nogo O yi, yate negen unde eekkologo logomenggaarik, Ye mbambatinuk, mondok-mondok aret logogun o.

³⁰Aap iniki warak nen yogo mengga kwak It iniki abe koonak nen inoone togop aret yogwe, Eekaatak ndak-ndak eeppiigo logorak kenok mban agan nugwi, Eeko menggaarak.

³¹Ala wone yugu Muta liiru mbaneegerak nogo Inikime porogo wonogwe kenok, Tu nogo logonet, eraabin tuk togon yigeebu wambugun lek o.

³²It aap maluk mendek nen Aap iniki abe koonak wogwe iyo enaakwi, “Alom ngge paga yilumbunuk inooruwi o?” yogwe, Eeko menggaarak kwe,

³³Aliku ALA nen aap iniki obeelom nogo inawim ineenggime wonogwe iinok teppiige, Inowak looniyak wogoren wogo nagaatik, “Maluk eekotak o,” yorogwe iigak, mbo piige, Eerigin lek o.

³⁴At Aliku ALA tokkogwe, “Tu yi paga nawak,” mbake nogo mugurok nogwe, Eeko logonip o. Ti eekwi kiinok, o yi, yate negen Unde eekkolaabagip nduk tiyappinagage, Kit kinigen kiigak, it aap maluk eeka nogo lek eerogo piige, Eerigin o.

³⁵Eyo anggen wangge me, taati nen mbilambunuk Kwit agan lagangge nagaatik, mbuk age menggi kwak, Aap maluk eeka inogogun worokot ambi togop aret wonagaatik,

³⁶Enggaawak lek agaarak kage nagarik, Kwaarit eekirak kwe, eebe kwaakkoolik o.

³⁷It aap mage mili mbangga nogo Inapuri ambik wigannarit wundi wogo menggaarak me, It aap maluk inoba lenggenggulik nogo liippiigwi, It aap iniki koonak nogo maloppiigwi, Eeko logonip o.

³⁸It aap maluk eeko menggaarak nogo perak, Ineebe lek eerogo piyaagin aret me, It aap maluk mendek ti, inapuri wigannarugun lek Inenggaawak lek aret logogun o.

³⁹Aap iniki abe koonak nogo inagap ndarogo piige, Aaninggin inoba kwi'nage kero, Yugum pak wurogo pereegi kwak eerogo piinok wonage, Eeke menggerak nogo ti, Aliku ALA aret o.

⁴⁰It aap nogo ti, Aliku ALA nen Yeenggwaarage logonet wondet eerogo piige, Ineebe op logowok nduk, Aliku ALA abu'me menggaarak me, Aap maluk mendek ineenggime nen ndinogo inagap ndarogo piige, Eeke menggerak o.