Read Western Dani Ndawi 39 Bible Online

Ndawi 39 - Western Dani bible

Ndawi 39

¹An nen mbake logonet, “Noone agan nage paga maluk arukwak, Eeke minggirak nogo liippake, It maluk eeka nowagam wa'nuk wonogwe iigak, Tapi inambe keele maakwi kwak, An nambe arum wakkolage, Eerikit,” mbakirak kwe,

²Noone yaga'lek puk wonage, Wone obeelom kunduk ambi yaga'lek wonage, Eeke logonet, Niniki andi nogo, abunuk nggwok lombok ee'nabit unggwage,

³Noone yuurak kani omoonuk negen ee'nake, Ninikime koonit nage neegak, Kani eyak ndi wuke menggi kwak ee'nake, Eeke nagaatik, Noone yoge logonet,

⁴“Kaliku ALA wae. An kambuurak age yoboni wage nogo yo'nege, Nda'nagagirak neegak, ne mande ari nage nogo yo'nege, An mondok mendek lek luulu wonage nogo abe'nake, Eeke logot o.

⁵An ne mande negen logorak ari nage nogo ti, Neenggi ambi wakkaanuk ambi wakkage nogo kwak Abu kuwagaluk eerogo panege, An nda'nagagirak neegak nggorek mbake kwe, Kat nen lek negen aret neege, Eeke menggendak me, Nit aakumi nineenik nggorek logorak mbakwi kwe, Ninambe aagi ne ambit wungge kwak Aret wonogo monggoorak.

⁶Aakumi inagalu'mak ne ambit lek age menggi kwak It aakumi togop aret nugwi, Iniki taganak nugwi kwe, we aanom warogo kagak nugwi, Inamendek kuwak eerogo patit nugwi nogo Ta unde eekkolamenggi? mbaka'lek ineenggo'lek logonet, kambit nogwe, Eeko menggaarak.

⁷Togop aret eeko menggaarak kwe, Ala wae. An perak, ta tokkage logogin o? Lek o! Kat paga niniki lunik aret agarik o.

⁸Aakumi nen, Aap yi, wi yuundurak mendek o, Yinuk, meek eerogo panggwi iyo, Wone yugu tagambunuk, maluk eekirak nogo Abok aret lek eerogo panu o.

⁹Kat nen aret nena koonogo panegendak me, An noone kiyuk wunaka'lek puk aret agarik o.

¹⁰Kat nen nooke nogo tayoppanu o. Keenggi omaawi paga nggwik nooke me, Niniki awi li'lek ee'nake agarik o.

¹¹Aakumi maluk eekwi iinok mberirage, Iniki koonogo piige, Yininuwo nen yi mendek ndi mendek nenet nage kwak, It inamendek iniki kundugu wonogwe nogo Kat nen lek eerogo pege, Eeke menggendak o. It aakumi ineenik logorak nogo ti, Inambe aagi ne ambit wumbugwi kwak aret wonogwe o.

¹²Kaliku ALA wae. An nogo Aap nggiru kwak kat nimbirak luulu wonage, Aap nggiru kwak nombomini nugu nogogwaarak nogo pogom nege, Eeke me, An nale ari nogo Karuk konengga'lek mbo panege ti mage o. Ata, an tamban eeke nogo karuk konengge, Yeenggwa niru o, yinuk, Noone nggwok paga yokkege nogo liippanege, Eeru o.

¹³Nenggaawak ambi neyoorak lek Awo mbuuluk naakit nduk aret wonage me, Niniki ale'nggen ne ambiriluk kaakit nen Kena mbuuluk logu yu o,” yinuk, yoreegirak o.