Read Western Dani Ndawi 40 Bible Online

Ndawi 40 - Western Dani bible

Ndawi 40

¹“At Aliku ALA nen yeenggwa niruwak o,” yinuk, Niniki yungguppunuk tokkagarak me, at ena logu yinuk pe'neege, Noone nggwok paga yogirak nogo konengge, Eekerak o.

²Eeke nagaarik, aakumi lek ogo menggam mbuun ambe purok ambik me yobonak wonage me, At nen piyanogo nippani wage, Niyok waganogo yugum paga yappanege, Niyok yabegak naakit nduk panggonnake, Eekerak o.

³Ndawi ngget mendek yikit nduk nambe eraabin eeppanege, Ndawi ninogoba Ala endage tiyappugwi mendek yo'nege, Eekerak me, It aakumi ambik aret inigen kogwe, inagabiti mbakwi, Eeko logomenggaarik, Iniki Aliku ALA oba panggombugun o.

⁴Aap ambi it aap, “Nit iya,” mbakwi nogo paga iniki panggombege, Aakumi inoone pilit agan nugwi nogo paga iniki panggombege, Eekeelik Aliku ALA oba panggombege kenok, At ale'nggen aret mbake logogin o.

⁵Kaliku nogoba Ala wae. Kat yi eekak ndi eekak eerubok mendek ambik aret eerit nage nagagindak o. Ti eeke nagagindak kwak ambi lek aret o. Ninake aret eerikit mba'nuk eeke nagagindak me, Eerogo pit wundi wage nagagindak nogo Mbininogo yokkiriyak meek aret o. Mbininogo yuurak op kwe, Ambik aret me yuurak meek aret o.

⁶ Kat kake warogo wokkugwi inom, yi mendek ndi mendek kake pugwi inom, Kat keebi mbake logonet kwe, Koone konengge logokit nduk, An naruk paarogo panegendak o. Kake warogo kani kunggwi inom, Ninomaluk lek aruwak nduk, Kake warogo wokkugwi inom, “Nonggop nduk nake puulik o,” yinuk, Yo'niraamunggun lek kwe,

⁷An nen ari logonet, “Ai, nogoba Ala. An eeriyak nombareegindak Mbuku pirik-perek paga liiru mbanak wonage nogo An neebe nen aret eerikit nduk agarik o. Kat nen wone lengganogo pereegindak nogo An ninikime wonage me, Abet aret eerikit nduk, wagi o,” Yinuk, yereegirak o.

⁹Kaliku ALA wae. Kapuri nggwok kuwak eerak inenggela'me logonet, Kat obeelom mban eeppiige menggendak wone nogo Noone puk logorak ee'naka'lek Yoroorak mban ee'nake menggerak kat keenu aret o.

¹⁰Kat obeelom mban eeke menggendak nogo Ninikime kumaappatinuk wonage, Aakumi kiniki kunik aganake menggendak inom, Wone abe aakumi eeppiyoorak wone inom, Kapuri nggwok kuwak eerak konenggwi iyo, patogo wonage, Eekeelik o. Ata, kat li'lak eeke menggendak wone inom, Inagap ndake menggendak wone inom, Yorage minggirak o.

¹¹Kaliku ALA wae. Kat nen nabuwa mbaka'lek mbo paniyak mage o. Ata, kiniki kunik ee'nake, Obeelom eerogo panege, Eeke logonet, Narum mondok aret logomunggun o.

¹²Aaninggin-paaninggin mondok iya neenggi lingginiyak meek nogo mendek Noba ninggirik wonage, Nomaluk noba luurik-maarak aago wonage me, Nanobak pila yinuk pe'nariyak meek ee'nake, Eeke agarik o. Neeruwak neenggi lingginiyak op negen kwe, Aaninggin noba wonage nogo perak, Lingginiyak meek aret me, meek tit ee'nake o.

¹³Togop me, Kaliku ALA wae. Kale'nggen nombake logonet, nagap ndariyak koongge, Kaliku ALA o. Mbet-mbet yeenggwa niri wage, Eeru o.

¹⁴It aakumi an nooriyak koonggwi nogo inenggali ogwe, Iniki kobak a'nuk ma'nogwe, Eeruwak o. Ndi, it maluk eeppaniyak mbakwi nogo inenggali a'nuk yungguninuk nogwe,

¹⁵It aap, “Kayik a! Ha! Ha!” yo'nugwi nogo nen “Ninenggali aga o,” yinuk, mbaganggwi, Eeruwak o.

¹⁶It aakumi kat mukkeren nogwe nogo perak, Inale'nggen mbakwi, Kat eeke paga inale'nggen kani kunik negen wonogwe, “Ninagap ndakerak o,” yinuk, Iniki kunik eekkologwe nogo nen, “Aliku ALA tiyanak mban logowak o,” Yinuk, mondok-mondok yogwe, Eeko logowak o.

¹⁷An nogo abu tebenak nege, Aakumi ineenggi lek pogom wonage, Eeke neegak kwe, Kat nogoba nen liippanege logot o. Kat nen yeenggwa nege, wondet eerogo panege, Eeke menggendak me, Nogoba Ala wae. Mbo paninuk elaambirik logorak mage o.