Read Western Dani Ndawi 41 Bible Online

Ndawi 41 - Western Dani bible

Ndawi 41

¹Aap ambi nen Aakumi lebenak mendek enegen wogonake kenok, Ale'nggen mbake logogin o. Aaninggin oba age eyom paga At Aliku ALA nen agap ndarigin o.

²Aliku ALA nen aap ti, Eebe obeelom logowak nduk, arum wonage, Ili eerogo pege, O yime wonage kagak, ale'nggen mban oba pege, Eeke logonet, At awim nen maluk eeppuwak nduk, ineenggime pigin lek o.

³At andi nen windak wonage kenok, Aliku ALA nen yeenggwaage, Andi nen nogo yege menggim wonage nogo Obeelom eerogo mippege, Eerigin o.

⁴An nen yoge logonet, “Kaliku ALA wae. An nabuwa mbake, An nen maluk lombok eeppagagirak me, Andi lek eerogo paninuk, obeelom eeppanege, Eeru o,” Yinuk, yoreegirak.

⁵It ninom wim mbanak nen Ineebi lombok nomba'nuk yogo logonet, “At endage lek logowak nduk mbet kambiyok!” Yinuk, yogo agaarik o.

⁶It ambi nen an pe'neya wogo nagaatik, Inikime nen, “At wone ngge yemenggerak paga Endage maluk eerogo puwok,” mbako logonet, We inambe paga abet ari mbaruwak nduk, yo'nogo nagaatik, Wundi nanuk tu paga nogo logonet, Nabok wiganogo pit nogo menggaarak o.

⁷Ineebi lombok nombako menggaarak nogo Abok nen, “Wologwe! Yogop eeppuwok o,” yinuk, Yagap wone paga yogwe, Maluk eeppaniyak kote wone koonogo pugwi, Eeko logonet,

⁸“Wologwe! Andi abu alik mendek eekerak me, At windak menggim nen mi'nariyak mondok meek aret agaarik o,” Yinuk, yogo agaarik o.

⁹ An nore niniki kunik abet aret mbake, Nimbirak mbi nengge, Eeke minggirak nogo nen kunduk, Nimbirak logorak, “Neebi o,” yinuk, mbo panegerak o.

¹⁰Togop aret eeppanugwi iigak kwe, Kaliku ALA perak, nabuwa mbake, It an maluk eeppanugwi nogo ti, Onggo eeppiyaakit nduk andi lek eerogo panege, Eeru o.

¹¹It ninom wim mbanak nen Tebenogo paniyak mbakwi nogo Non mbanogo piigendak ti paga An kinikilom nombake menggendak ti, neenu agi o.

¹²An abet aret maluk eekeelik Obeelom mban eeke neenok, Niniki eyak wappanege, An kenggaanom paga mondok-mondok logokit nduk Wo'neren pani wage, Eekendak o.

¹³ Togop aret me, Iterali inogoba Kaliku ALA nogo o! O aa'nduk nen, yogondak nen nok, peebi nen Mondok-mondok kendage tiyanak aret logowak o. Abet aret yagi o. Abet aret yagi o.