Read Western Dani Ndawi 42 Bible Online

Ndawi 42 - Western Dani bible

Ndawi 42

¹At rusa nen, “Tat wake logonet niyome unggwi naakit lak, ao,” Mbake menggi kwak, An niniki togop aret, “Kat Ala, ao,” yinuk, mbake minggirak.

²Niyo abu ee'ninake menggi kwak, Kat mondok-mondok keenik menggendak Ala, “Ao,” lombok kombake minggirak me, “Kat wonage me mandenom keya woroorak?” mbake agarik o.

³Kubondendok nen nok oonikiya ari nage kagak, It aap nen, “Kogoba Ala nggeeme wonage o?” Yo'nugwi tit iigak, Liingge oonikiya nambi-mbiingga nengge pogom Nale amburu mban wangge agaarik o.

⁴Aa'nduk lombok aakumi ambik inale'nggen paga Ala awi wurik me kuwak eeri nogwe me, An naa'nduk a'nuk ninom nage logonet, Ninale'nggen paga keekok yogwe, “Wa!” yogo logonet ndawi wakwi, Eeko nogogurak nogo Abeppunuk niniki abu puru agan nage agaarik o.

⁵Niniki yoge logonet, “Niniki yi wae. Kat nonggop nduk puru ari, Nonggop nduk, Ai, lombok mbake, Eeke agandik? Nagap ndaka nogoba Ala endage tiyappege logogin me, Niniki yi, at paga panggonak logot o,” yinuk, yoge agarik o.

⁶An niniki mondok puru aago wonage logonet, Puut-puut Keromon enggela'me puut Mitat nen, Yoraran ndirok nen, Ala eerit nage nagagerak nogo abeke minggirak o.

⁷Yi taakut wurabit wagagindak oone wo-wo ari ti, Niyo kole yenggenak ambi inikime nen Niyo kole yenggenak ambi inikime yoge, Yi nggwok kilaarak-mogonik eerogo wunabit nage menggendak nogo, An aret tebenogo panit wage, Eeke agaarik o.

⁸O liingge wonage kagak Aliku ALA nabuwa nen iniki kunik ee'nake, Neenik alom ti, Ala aret me, Oonikiya Ala yoge neenok, ndawi wake logokit nduk eeppanege, Eeke menggerak.

⁹An nen at nayugum kwak Ala yoge logonet, “Kat nen mari eerogo panege, Nawim nen tebenogo panugwi iinok, niniki puru aago wonage neegak mbo panege, Nonggop nduk eeke agandik?” Yinuk, yoge agarik o.

¹⁰Wooluwak paga ndanuk togon Inookaatak kanggo mengga kwak, It ninom wim mbanak nen O kubondendok nen nok oonikiya Meek lombok eerogo panogo logonet, “Kat kogoba Ala nogo eebe ngge o?” Yinuk, yo'nogo menggaarak.

¹¹Niniki yoge logonet, “Niniki yi wae. Kat nonggop nduk puru ari, Nonggop nduk, Ai, mbake, Eeke agandik? Nagap ndaka nogoba Ala endage tiyappege logogin me, Niniki yi, at paga panggonak logot o,” Yinuk, yoge agarik o.