Read Western Dani Ndawi 44 Bible Online

Ndawi 44 - Western Dani bible

Ndawi 44

¹Ala wae. Aa'nduk lombok ninombomini wonogwe eyom paga kat eerit wagagindak It nen mbininogo yo'nirogogwaarak nogo Nit ninaruk abe nen koneneegurak o.

²Kat keenggi omaawi lombok paga Aakumi inanebunu abok aret mugogo wumbiinok, It ninombomini inakom kwippiige, It aakumi inanebunu lombok aan lebenogo piinok, Ninombomini wiganggo logowak nduk eerogo piige, Eereegindak nogo o.

³It aakumi yi, kiniki kunik eeginabeegindak me, Yate kwak nggween kologogwaarak nogo ti, Inawooluwak ayuk paga kologwe, Ineenggi omaawi paga ineegin tiyak ari, Eerulik o. Ata, kat keenggi omaawi abe paga inom, Ketenggen eya aago wonage nogo paga inom, Ineegin tiyak yuwak nduk, eeppiyareegindak o.

⁴Kat nogoba Ala kendagembogut aret o. Yakup ombowologwe ineegin tiyak yuwak nduk, Wone lengganogo yorage nagagindak o.

⁵Kat komaawi ninoba pinanege keegak, Ninawim mugogo mappiigwi, Kendage kumbunuk, it ninooriyak eekwi nogo Niniyok konden yigirogo piigwi, Eeko monggoorak o.

⁶An neegin-nomaale ti paga panggombunuk eeke, Nawooluwak ti paga nen Nawim tebenogo piige minggirak mbake, Eekeelik o.

⁷Kat perak, Ninawim tebenogo piinok nineegin tiyappinanege, It aap ineebi ninombako menggaarak nogo Inenggali aruwak nduk eeppiige, Eeke menggendak o.

⁸Kat Ala eeke paga Kubondendok nen nok oonikiya ari nage kagak, Nit wogoppagagwi, kendage mondok-mondok alut eekwi, Eeko logogun o.

⁹Togop aret kwe, Kat nen nit mbo pinanege, Ninenggali aruwak nduk eeppinanege, Nawuri wim eeka ninom wundi nogwe niigak, Kat ambinom ninom naga'lek puk age, Eeke agandik o.

¹⁰Ninawim inayuk nen kole mbaganuwok nduk, Eeppinanegendak paga mbaganggwi niigak, Ineebi ninombaka nen ninamendek kugun waganggaarak o.

¹¹Ndomba waruwok nduk wonok nogo mengga kwak, Nineebe ninawim ineenggime piige, Yi aakumi ndi aakumi inenggela'me yumbunogo mbo pinanit nage,

¹²Nit kapuri we onggo lek aakumi inambik wogorage, Eekendak me, Kat ambi nabenggolagambok oolo terak puk aret agan o.

¹³It aap ninom koorok wonogwe nen, “It yi maluk aret iigo o,” Ninombaruwak nduk eeppiige, It ninaagan-ninambokan wonogwe nen Meek eerogo pinanogo logonet, “Ha!” yo'niruwak nduk eeppiige, Eekendak o.

¹⁴Yi aakumi ndi aakumi inenggela'me mbo pinanegendak wonogwe niigak, “It nogo yi aret nugu agaarik a!” Yinuk, yo'nirogo logowak nduk, Eerogo pinanegendak paga It aakumi inanebunu lombok nen, “It yi meek aret iigo o,” yinuk, Ninagi'ndok kanggo agaarik o.

¹⁵It ninom wim mbanak nen yogo logonet, “Eeppinanggerak onggo at eeppuurak nanonggwan aga o,” Yinuk, an meek eerogo panugwi, “Kayik a! Op togon eerogo pagaga,” yinuk, yo'nugwi, Eekwi paga O kubondendok nen nok oonikiya ari nage kagak, Maluk noba lenggenak mban wonage neenok, Meek eerogo panugwi me, Nenggali nen yum nenete nobakko'nok mban nege agarik o.

¹⁷Nit kat koba mari eerogo pagagwi, Ninom wone nggaruk togon koonogo pereegindak nogo Taganogo mbo pugwi, Eeka'lek niigak kwe, Aaninggin ti abok aret nit ninoba kwi'nagak mban eeke nagaarak o.

¹⁸Kat mbo paganuk mbaganiyak ee'ninake, Tu kat yo'nirage nogo mbo punuk, tu alik paga nogwe, Eeka'lek kwe,

¹⁹Kat nen aan lebenogo pinanege, Mba'ngge nugu menggam kwak eerogo pinanege, Nogoyum lenggenggo mengga kwak o yumaak lombok eerogo pinanege, Eekendak o.

²⁰Nit nen kat ninogoba Ala kendage mari eerogo pugwi, Kat kobaane'me kugi nen ambi eeppinanuwak nduk, Nggino yogwi, Eeko logonetak en,

²¹Kat aakumi inikime kote koonggwi nogo Abok liippinanege menggendak me, Kat keenu aret logonetak nogo lek a?

²² Nit kapuri ogogurak paga Kubondendok nen nok oonikiya ari nage kagak, “Ninooremengga ilik?” mbarit nugu monggoorak. Ndomba wariyak wonok nogo mengga kwak, “Togop aret eeppiyaawok,” ninombako menggaarak.

²³Togop aret me, nogoba o. Kat nonggop nduk nogo yege agandik? Mi'naru o. Kat mondok-mondok mbo pinanege ti mage. Pilak yu o.

²⁴Nit aaninggin-paaninggin ninoba age, Aakumi tebenogo pinanugwi, Eekwi iigak, Kat nonggop nduk mari eerogo pinanege, Kenggaawak kumaappatinuk wonage, Eeke agandik?

²⁵Aaninggin ninoba agaarak paga Nineebe nggween paga nggimbinanege, Nineebe nggween inom kunogo pinanege, Eeke me,

²⁶Kat ninabuwa nen kiniki kunik mban ee'ninabit wundi wage menggendak me, Pilak ari logonet, Yeenggwa nirage, ninagap ndake, Eeru o.