Read Western Dani Ndawi 49 Bible Online

Ndawi 49 - Western Dani bible

Ndawi 49

¹Kit yi aakumi ndi aakumi abok kinaruk konenggwi, Kinendage lek kinendage warak inom, Kineenggi lek kineenggi warak inom, Kit nggween paga wonogwe yi abok liirogon konenggwi, Eeko logonip o.

³Aap iniki warak logonet, Wone ari menggerak mendek an nen ari, Wone yelok koorak mendek ninikime nen, “Yu o,” yinuk, yo'nege kenok ari,

⁴Woneelom ambi naruk paga pege kenok ari, Nggitat eeke logonet, wone eegu laarogo yokkirage, Eerigin nogo yi o.

⁵An maluk eeppaniyak eyom ari wage kenok, It aap maluk eeka nen ineenggi warak paga iniki panggombugwi, “Nineenggi warak me,” yinuk, wogoppatit nugwi, Eekwi nogo nen Inoone yanggok-yanggok agan wangge'nakwi iinok, An nonggop togon nagabiti mbariyak? Lek aret o.

⁷Aap ambi kambunuk nogo menggam noorak lek Eenik mondok logorak onggo puurak nogo ti, Oreewi nen puurak abu meek mondok iya aret me, It aap ineenggi warak ti nen Inoreeluk ambi kambuurak eeke me, Eenik logorak ake wu pugwi, Wake kero onggo wu ambi Ala wogogwi, Eeriyak meek aret o.

¹⁰It aap iniki warak nogo inom, Iniki wi inom, yuundurak nogo inom, Ndak-ndak aret kanggwi iigak, Inamendek yumbunogo pemenggaarak nogo Aap alik nen unde ogwe iigo monggoorak nogo o.

¹¹It mbako logonet, “Ninombo wologwe nda'narit wundi wogo logonet, Ninendage mondok ki eeko logowok o,” yinuk, Inendage toonak kwak, Inanggween endage ndak-ndak toonogo pemenggaarak kwe, It kanggwi mambiigo menggam ti, iname aret age, It taambiigo menggam ti, inawi alom aret age, Eerigin o.

¹²Aakumi ti, ineenggi warak logonet, obeelom mban wonogolik o. Ata, ndiimbu-nggwiya negaatak-negaatak Inowak ngginingge menggi kwak aret ogo menggaarak o.

¹³It aap ti mendek iniki ti mban lunik logonet, mugurok nogwe inom, “Op aret yogo agaarik o,” yinuk, inoone konenggo menggaarak inom, Togop ndak-ndak aret arugun o.

¹⁴It aap ti, ndomba kanggo mengga kwak, Kambunuk nogo menggam noorak koonak wonage, Kambunuk nogo menggam nen ndomba ndegeninaka kwak, Wogoren nok nggween taambiyawam piya nage, Eerigin kwe, O kubondendok age kenok perak, Aap iniki koonak nogo nen Wone lengganogo yorogo logogun o. Inawi abe kigirikwe wurogo pemenggaarak nogo O nda wonage kagak inagabolo nogo ti, Nggween taambiyawam time aret pili arigin o.

¹⁵Togop eerugun kwe, Kambunuk nogo menggam nen wo'neren pani nookwak, Ala nen wondet eerogo paninuk, Ndinneren at owagam pani nagin o.

¹⁶Togop me, aap ineenggi warak ogwe, Inawi abu kigirikwe wurik kenok, “Wi!” ugwi, Eekwi iinok, Iya inombarugup o.

¹⁷It kambunuk nogo logonet, Inamendek inom ko'nok nogwe, Inamendek abe kenok, “Wi!” yogwe nogo wonok kambunuk nogo menggam nogwe, Eekulik o.

¹⁸Ineenik wonogo logonet, “An abu obeelom mban agarik,” mba'nuk, Iniki ale'nggen mbakwi, “Aap yi, eenggi warak lombok me, Wi!” yogwe, Eeko logomenggaarak kwe,

¹⁹Kanggo logomenggaarik, Inombomini aa'nduk ndak-ndak ndarak nogo Kambunuk nogogwam wonogwe me, inom lambuni nogo logomenggaarik, O eya inigen kaga'lek o apit aago me, time mondok-mondok aret logogun o.

²⁰Aap wone liippega'lek we ineenggi warak logonet Obeelom mban wonogwe nogo ti, Ndiimbu-nggwiya negaatak-negaatak Inowak ngginingge menggi kwak aret menggaarak o.