Read Western Dani Ndawi 55 Bible Online

Ndawi 55 - Western Dani bible

Ndawi 55

¹Ala wae. An tamban eeke, nggino yokkege, eeke yi, Karuk konengga'lek negen eeppunuk logorak mage o. Ata, karuk konengge,

²Karuk liirogon konembunuk, onggo yo'nege, Eeru o. It ninom wim mbanak inoone yogwe, It maluk eeka inigen lo nirit unggwogwe, Eekwi nogo nen aaninggin-paaninggin noba panugwi, Ineebi nomba'nuk inanini nen maluk eeppanugwi, Eekwi iinok, “Nonggop eekkola?” yinuk, Niniki piirik-paarik ee'nake agaarik o.

⁴Niniki aaninggin ndugu agan nage, Kambuurak nagabiti nen namineeri ne agan nage,

⁵Niniki ma'nage logonet, naganak wake, Nagabiti ee'nabit unggwage logonet, neeri-nagabolo kangge, Eeke agaarik o.

⁶Togop ee'nake kenok, an nen ari logonet, “Towe kurona wiganinuk nege menggi kwak, An na'naabit warak eeppunuk, Wiganinuk o abolok lek menggim nage,

⁷O nda karume time ari nanuk, Time mondok aret ye mbambatinuk wonage,

⁸O wiya omaawi lombok warit wage logonet, Wo'neren nookwak, neebe op logowam mbet-mbet kwaarit nage, Eerikit lak, Ao, mbake agarik o.”

⁹Nogoba wae. O kota paga aap inanini nen maluk eeppiinet nogwe, Ndugwi pit nogwe, O liingge-oonikiya kota pak wurik obaga wanggerit nugu logonet, ugun-ugun eerit nogwe, O kota oolome inanini nen naalop-kaalop eerogo piinet nugwi, It o kota time wone koonak nogo Yale-pale eerogo pit nogwe, Wone mbanggo menggam nen yaga-taga eerogo pugwi, Wi-wi aganabit nogwe, Eekwi iigirak me, Kat nogoba nen it maluk eeka ti, Iniki kobak eerogo piige, Inoone yuurak naalop-kaalop eerogo piige, Eeru o.

¹²It an nawim nen inoone yi-wu eerogo panugwi iinok, Niniki yanggo yinuk puk age, Ineebi nombaka nen tiyappako logonet, Meek eerogo panugwi iinok, Inigen neegwi iyo, kumaa'nage, Eeriyak op kwe,

¹³Kat nore nimbirak ndak-ndak Niniki ambit kunik me, nimbirak perenak nugwi, Ala awi wurik me aakumi inale'nggen mbarit nogwe, Inenggela'me ninom wonogwe, Eeko monggoorak Kat nen aret eeppanege keenok, An puk logorak meek ee'nake o.

¹⁵Togop me, an nawim nogo Inikime maluk eeriyak mban koonggwi, It menggam kunduk maluk mban eerit nugwi, Eeko menggaarak me, Abera'lek kagak kanggwi, Kambunuk nogo menggam ineenik ngge-ngge wambi nogwe, Eeruwak o.

¹⁶Togop eerugun kwe, an perak, “Yeenggwa niru o,” yinuk, Ala yoge neenok, Aliku ALA nen nagap ndake,

¹⁷Kubondendok inom, liingge inom, oonikiya inom, “Ee'naburak,” neebi mbake nogo Noone nggwok paga at yoge neenok, aruk konengge, Eeppunuk,

¹⁸It an nawim ineebe ambik aago Tebenogo panuwok nduk noba kwi'nari wogwe me, Nagabolo mbangga'lek kagak nagap ndake menggerak o.

¹⁹It aap ti, iniki yunggup-melak eekwi, Ala inagabiti mbakwi, Eekulik me, “Togop eeppiyet o,” yinuk, At wone lengganogo yorage menggim mondok-mondok menggerak nogo yoge neenok, At nen it tebenogo piige logogin aret o.

²⁰At nimbirak kunik wonagagirak nogo nen oreewi nit aret ninooke, Inom wone abuk nggaruk togon koonogo pereegerak nogo Aret lalenogo pege,

²¹Wam amburu anen pera aago menggi kwak, oone amburu ndik-ndik agan wage, Eeke menggerak kwe, Ogogumbuk anini ambik menggerak o. Inagabolo abe aruwak nduk, amburu eeko mengga kwak, Iniki nomonikit nduk oone yanggorogon agan wage kwe, At ari ti, Wooluwak engget mbup nggabenak kwak aret menggerak.

²²Aap iniki abe koonak iniki lek-lek aruwak nduk, Aliku ALA nen mbo piigeelik me, “Nonggop ee'ninabigin o?” yinuk, Kiniki piirik wonogwe nogo Abok aret waganogo at mban wogo'nuk logonip o. Togop eekwi kiinok, Aliku ALA nen unde wokkinake logogin o.

²³Togop aret me, Ala wae. It aap maluk eeka nogo Lek ogo menggam mbuun ambena kabelogo wuppiige, It aap inoone pilit yaga inom, inamiya nengga inom, It ndarak eyom awo ari naga'lek iigak, kambuwak nduk eeppiige, Eerumunggun kwe, An perak, kat nen an eeppanenok nduk, Niniki koba panggombunuk aret agarik o.