Read Western Dani Ndawi 58 Bible Online

Ndawi 58 - Western Dani bible

Ndawi 58

¹Kit o unde monggotak nagawan-nagawan yi wae. Kit wone a'me liirogon mbanggwi mbakop? Aakumi eekaatak ndak-ndak inowak loonggwi mbakop?

²Lek aret o. Yiluk-yiluk inowak loonuwok nduk, koonggwi, Eekaatak liirogon koonggwi lek Kinoone omaawi paga, “Eekendak o,” yinuk, Aakumi o yime maluk eeppiinet nogwe, Eeko ogotik o.

³Kit aap maluk mendek yi, Nda'nogwe kuli nen aret tu abe paga nogwe lek Tu alik me nomoninuk nogwe, Kinagalomini inikime nen nda'nogo nogogotik, Wone abe yaga'lek pilit mban pugunit nugwi, Eeko monggotak me,

⁴Kinoone yogwe ti, Waalo aakumi inooka inameyo kwak wonogwe, Waalo aap yanggoninake menggerak abu eenu nen Waalo muuru yanggonuwak nduk Oone yanggok-yanggok yoge nogo konengge kwe, Aruk logu negen eeppunuk menggi kwak aret wonogwe, Eeko ogotik o.

⁶Togop me, kat Ala wae. It aap ti, Togop kwak aret me, ineyak langgunogo piige, Kaliku ALA wae. It singa kwak aret me, ineyak nggiginogo piige, Eeru o.

⁷It nogo ti, niyo nage nagaatik, Pili ari nage menggi kwak lek ogwe, Maale inookwi iinok, ngget lek me Put togon wangge menggi kwak wonogwe,

⁸Togobanggen nage kagak mo andi nen Amburu tigi-tigi wangge logonet Kanggwi kwak aret kanggwi, Kwe aagaluk inikime nen warak nda'nagaatak me, O eya enegen kage lek menggi kwak ogwe, Eeruwak o.

⁹Kani alok mendek kumbunuk, Togolowak kwippegaatak awo aganggen aga'lek kagak Abera'lek me o wiya nen kani ki inom, mbuk inom, kunik nogo Iyaarak-mbiyaarak eerogo nappege menggi kwak It aap maluk eekaarak inom, eeriyak koonggwi inom, Togop aret eerugun o.

¹⁰Aap iniki abe koonak nogo nen Maluk eeppiigaarak onggo eeppiige nogo inigen iigwi, It aap maluk mendek inamiya paga iniyok kookkologwe, Eeko logonet, Inale'nggen mbako logogun o.

¹¹Ti eekwi nogo aakumi nen inigen iinok, Yogo logonet, “It aap iniki abe koonak nogo Ala nen onggo wogorage, O nggween paga eekaatak ndak-ndak inowak loongge, Eeke menggerak abet aret kogo o,” Yinuk, yogo logogun o.