Read Western Dani Ndawi 61 Bible Online

Ndawi 61 - Western Dani bible

Ndawi 61

¹Ala wae. An tamban eeke yi, karuk konengge, Niniki puru ari logonet yokkege yi, liippanege, Eeru o.

²O irip me nen noone nggwok paga yokkege, Niniki lek ee'nabit unggwage kagak yokkege, Eeke me, Yugum nu'lek tiyarogon wonage nogo paga Nalik lagarak meek me, Kat nen aret wo'neren pani lagu o.

³Neebe op logokit nduk, kabu'me paninuk wonage, Ninom wim mbanak nen noori wogwe iyo, Nobak wurik kwak keebe aret wonage, Eekendak o.

⁴Ala wae. An eeke logorak Wone kumbuk mbaneegirak nogo karuk konengge, It aap kendage yogwe iinok, kayuk wuko menggaarak nen Keyate wogorage menggendak nogo an ninom wo'nege, Eekendak me, An kat kawooliyana mondok-mondok wonage, Towe a'naabit abu'na tebenak mengga kwak, An kabu'me tebenak wonage, Eerikit lak, “Ao” , mbake agarik o.

⁶An nendagembogut nda'nagagirak ambinom tayoppege, Napuri-nombowologwe nda'narit wundi nogwe iigak, Yi tahun ndi tahun ari nawak nduk koonogo pege,

⁷Kenegen keegak wone mondok-mondok lengganogo yoranet wundi wage logokit nduk eeppanege, Neebe op logokit nduk, kiniki kunik ee'nake, Wone yo'nereegindak nogo li'luk eerogo panege, Eeke logot o.

⁸Ti eeke keenok, Kendage tiyappagage logonet, ndawi wake, Eeke logorak wone kumbuk mbaneegirak nogo Ko'lu-kii'me a'me nggelok aret eerit nage, Mondok-mondok eeke logogin o.