Read Western Dani Ndawi 65 Bible Online

Ndawi 65 - Western Dani bible

Ndawi 65

¹Ala wae. Nit o Tiyon kat kalut eeri nogwe, Ndi, eeko logorak kumbuk mbaneegurak nogo, A'me lik togon eekwi, Eeruwok nduk, koonggwi yi, Kat kake aret me, op aret koonggo o.

²Nit tamban eekwi karuk konengge menggendak me, Yi aap ndi aap abok aret kowagam kuwak ari woraagun o.

³Maluk eeko nogoorak paga Aaninggin lombok ninoba kwi'ndak wonage nogo Nit piyaniyak meek me, kat nen waganogo mbo nappegendak o.

⁴It aap kat nen leenogo piige, Kinom logonok nduk kawoore'nggam piya wage, Eeke menggendak kenok, Inale'nggen wonogo mengga kwak, Nit kat kawi wurik me unggunuk wonogwe niigak, Obeelom mban eerogo pinanege ti paga niniki abu kwi'nage, Nit kat kawi alik leenak wurik me Unggunuk wonogo logonet, ale'nggen lombok ee'ninake, Eeke agaarik o.

⁵Ninagap ndaka Ala wae. “Yeenggwa niret o,” yinuk, Yokkugwi onggo inagabiti mbariyak mendek eeppiige, A'me nggelok mban eeppiinet nage, Eeke menggendak o. Aakumi nggween irip-irip wonogwe inom, Yi nggwok laut irip pit nagagim wonogwe inom, Abok aret iniki lunik wonogwe kat yi,

⁶Komaawi ambik kin keyaawak nduk, Puut-puut kwippit nanuk mondok nu'lek logowak nen Omaawi eerogo pit nage,

⁷Niyo nggwok yenggenak laut oone wo ari, Kilaarak-mogonik eerogo nippit wage, Eeke nogo abolok lek eerogo pege, Aakumi noone-koone agan nogwe ti, inoone mbanogo piige, Eereegindak o.

⁸O irip-irip wonogwe abok aret eerubok eeke menggendak inigen kenok, “Ia!” yinuk, inagabiti mbakwi, Oonegen lagi wage menggim alom me nen nok, irip me Oonegen kilu yi nage menggim wonogwe abok aret kat eeke inigen kogo logomenggaarik, Inale'nggen nen keekok yogwe, Eeko menggaarak o.

⁹O nggween yi, kat unde wake logonet, mayu wuppit wage, Nggween mili lubunogo pit nage, Eeke menggendak paga Anggen ka'let age menggerak o. It aakumi inambi-inombaato ambik nonggo logowak nduk, Kat koonogo piige menggendak me, Yi niyo ndi niyo nage nogo porok ari kero, niyo mban logowak nduk, mayu wambi wage,

¹⁰Yomban wogome niyo yenggenogo pege, Nggween wen waganogo nippugu nogo yigirogo pit nage, Mayu aringgik-aringgek eerogo wurabit wage logonet, Wen wogo nogo yawenogo pege, Awi yarak abe kwit agan lagangge, Eeruwak nduk, eeppege menggendak o.

¹¹Kat nen o ena koonogo pinanege logonet, Kiyok pit namenggenom nggween mili agaatak me, Yi mendek ndi mendek yarak mili kwit agan lagangge, Anggen ambik lombok kalo logonogo wo'nirage,

¹²O karume kambin-ndomba iri'ngga nenet nogo menggam Niyo amburu paga iri'ngga mili kwit agan laganuwak nduk, Eeppege me, puurom-alu'me nen inale'nggen yogwe,

¹³O karume kambin-ndomba ineebe ambik me, Iri'ngga enete lek eerogo punuk nenet nugwi, O kobappaga gandum mban yarak me, engga nen nggween enete lek eerogo pege, Eerak logonet, Karu nen inale'nggen yogwe, Kobappaga nen ndawi wakwi, Eeko agaarik o.