Read Western Dani Ndawi 66 Bible Online

Ndawi 66 - Western Dani bible

Ndawi 66

¹Kit aakumi nggween paga wonogwe abok aret yi wae. Ala ale'nggen mbaruwak nduk Kit kinale'nggen nen keekok yogwe,

²At endage abu tiyanak me, ndawi paga anep pugwi, Endage tiyappit nogo logonet, alut eekwi, Ee'nip o.

³Kinogoba Ala yogo logonet, “Kat iya tit eerit nage paga ninamineeri ne agan nage, Komaawi ambik lombok menggendak paga Kawim inagabiti nen yipik agan kabu'me ari wogwe,

⁴Nit aakumi o nggween paga wonogwe abok ninendobanggun yindumbunuk, Kat kabu'me tebe yi unggwogwe, Eeppunuk logonet, Ndawi paga kanep pugwi, Kendage tiyanak me, ndawi paga wogoppagagwi, Eeruwok o,” Yinuk, yogo logonip o.

⁵At Ala eerit nagagerak nogo liippi wogwe, Aakumi inenggela'me inagabiti warak mendek eeppiyareegerak nogo maloppugwi, Ee'nip o.

⁶ At nen niyo nggwok yenggenak laut nogo mogonogo punuk, Nggween kin eeppege mbareegi, Niyo nggwok nage nogo paga Ninombomini wunda wogogwaarak me, Ninale'nggen mbako logowok o.

⁷At omaawi ambik logonet, Wone mondok-mondok lengganogo yo'nirage, Yi aakumi ndi aakumi enegen wogonake, Eeke menggerak me, It aap at eeke ineebi mbaka nogo nen, “At tebembuwok,” mbarugwaarik o.

⁸Kit yi aakumi ndi aakumi yi wae. Nit ninogoba Ala tiyappugwi, Aakumi konenggo logowak nduk, Kinoone nggwok paga at alut eekwi, Eeko logonip o.

⁹Nineebe obeelom logowok nduk ninarum wonage, Niniyok perak togon yigeebu wambukwak pi'ninake, Eeke nagagerak o.

¹⁰Ala wae. Kat nen ninabut mbanogo pinanege, Mbuti perak abinak aruwak nduk, Kani worako mengga kwak eerogo pinanege,

¹¹Keele pugu me yilunogo pinani nage, Aaninggin nggwok ninoba pinanege,

¹²It nit ninom ogoorak nen Iniyok aan lebenogo pinanit nawak nduk mbo pinanege, Kani kunik kagak, niyo wurik kagak, mbo pinanege, Eereegindak kwe, Nineebe op logowok nduk, o yi mendek ndi mendek Obeelom mban menggim pinani wagagindak o.

¹³Togop aret eereegindak me, Warogo kani kuniyak mendek an nen wonok Kat kawi wurik me unggwi wage, “Yogop eeke logogin o,” yinuk, Wone kumbuk mbangge logonet, yokkereegirak nogo A'me lik togon eeke, Eerigin o.

¹⁴Aaninggin noba ari wage mbareegi, “Yeenggwa nege kenok, ndogop wokkirigin o,” Yinuk, noone abuk nggaruk togon yokkege, “Nogoba Ala owak o,” yinuk kumbuk mbangge, Eereegirak nogo A'me lik yuwak nduk,

¹⁵tapi amok tigiluk warogo kake wokkege, Ka'luk mbogut paga lagi nawak nduk, ndomba ngguunok inoorogo kani kungge, Tapi ngguunok inom, kambin inom, kake warogo wokkege, Eerigin o.

¹⁶Kit Ala kinagabiti mbako monggotak yi wae. Ala nen eeppanit wage kagarak nogo Mbininogo yokkirage neegak, Kinaruk liirogon konenggo logobagip nduk, woraanip o.

¹⁷“Yeenggwa niru o,” yinuk, noone nggwok paga yoge, Yoge logonet, at endage tiyappege, Eereegirak o.

¹⁸An maluk eeriyak ninikime koongge logonet, Nogoba Ala yo'netak en, at aruk konenenetak lek kwe,

¹⁹An tamban eekirak nogo mbo pege, Nabuwa nen iniki kunik ee'nake nogo tayoppege, Eerulik o. Ata, an yoreegirak nogo abet aret aruk konengge, Tamban eereegirak nogo aret liippege, Eereegerak me, Ala endage tiyappege agarik o.